تاني يوم الصبح، ناصر كان نازل لقى منه صاحبة مليكة الانتيم جاية تزورها. منه بنت روشة ولبسها مختلف شوية وبتضحك بصوت عالي. ناصر شافها وهي بتخبط على باب مليكة فقال لها:
— إنتي مين ورايحة فين يا بنتي؟
— إنت مال أهلك إنت كمان؟
— أنا جار مليكة ومسؤول عنها هنا.
— مسؤول عنها إزاي يعني؟ إنت جوزها ولا خطيبها؟
— لا، أنا جارها، والصعايدة عندنا الجار مسؤول عن جارته.
— لا يا حبيبي، الكلام ده في بلدكم، هنا في القاهرة الجار للجار مش حارس للجار.
وسابته ودخلت عند مليكة وحكت لها اللي حصل. مليكة ماتت على نفسها من الضحكة، وقالت لها: “والله الواد ده مجنون رسمي”. بس منه قالت لها: “خلي بالك يا مليكة، الواد ده شكله واقع لشوشته وإنتي مش واخدة بالك”.
— يقع إيه؟ ده كل شوية يقولي غطي نفسك، ده بيكرهني!
— لا يا هبلة، اللي يكره واحدة ما يبصش عليها كل شوية كده، ده بيغير عليكي ومركز معاكي قوي.
مليكة سكتت وفكرت في كلام منه، وحست إن قلبها دق حتة صغيرة. وعدت الأيام والخناقات بقت أقل، بس الغيرة بقت أكتر. ناصر بقى يعمل حاجات غريبة؛ بقى يجيب طلبات ميادة عشان ما يخليش مليكة تنزل السوبر ماركت بالليل، وبقى يزعق لأي حد يبص على مليكة في الشارع.
مرة كان فيه شاب صاحب سوبر ماركت تحت العمارة بيحاول يعاكس مليكة، ناصر شافه وطالع يجري عليه ومسكه من هدومه وقال له: “لو بصيت لجارتي تاني هكسر رقبتك، أنت فاهم ولا لا؟”. ماجد خاف جداً وقال: “خلاص يا عم ناصر، ما كنتش أعرف إنها تبعك”.
مليكة شافت الموقف ده من البلكونة واتصدمت، نزلت تجري وقالت له:
— إنت اتجننت يا ناصر؟ إنت بتعمل إيه؟
— بعمل اللي المفروض أي راجل يعمله لما يشوف حد بيعاكس واحدة ست محترمة.
— وأنا قلت لك إني محترمة ولا مش محترمة؟ إنت مالك بيا أصلاً؟
— عشان إنتي تخصيني يا بنتي!
— أخصك إزاي يعني؟
— ما أعرفش، بس إنتي تخصيني وخلاص. من يوم ما شفتك وإنتي مش بتطلعي من دماغي؛ أنا كل ما أشوفك دمي بيثور، مش عشان بعيب فيكي، لا، عشان بخاف عليكي وبغير عليكي بجنون، وبحس إنك بتاعتي أنا لوحدي!
مليكة وقفت متنحة ومش عارفة ترد؛ أول مرة تشوف ناصر بيتكلم بجد من غير أوامر، وأول مرة تشوف في عينه حب مش تحكم.
— بتاعتي إزاي يعني؟ إنت عايز مني إيه يا ناصر؟
— عايزك تبقي مراتي يا مليكة. أنا عارف إني صعيدي ودبش وكلامي ناشف، بس والله العظيم من يوم ما جيت القاهرة وإنتي اللي شاغلة بالي. بصق الصبح أدور عليكي وأنا نازل وأنا طالع أفضل أبص على بلكونتك، لو سمعت صوتك بتضحكي بفرح، ولو سمعتك بتعيطي قلبي بيتقطع. أنا عمري ما حبيت حد قدك، إنتي أول واحدة تخليني أحس إني عايز أبقى أحسن عشانها.
مليكة عيطت وقالت له:
— إنت عارف أنا إيه؟ أنا بحب ألبس اللي أنا عايزه وأخرج وأدخل براحتي، ومش هبقى الست اللي تقعد في البيت وتسمع الكلام وخلاص.
— وانا عمري ما طلبت منك تبقي كده؛ أنا حبيتك زي ما إنتي، بعنادك، وبلبسك، ولسانك الطويل ده. أنا بس بغير عليكي عشان بحبك مش عشان اتحكم فيكي، ولو وافقتي تبقي مراتي هسيبك تعيشي زي ما إنتي عايزة بس أعرف إن وراكي راجل يحميكي ويخاف عليكي.
مليكة سكتت شوية وقالت له:
— أديني فرصة أفكر يا ناصر، الموضوع مش سهل، إنت صعيدي وأنا قاهرية، وإنت دمك حامي وأنا دماغي ناشفة، هنعمل إيه؟
— فكري براحتك يا بنتي، بس اعرفي إنك من النهاردة مراتي حتى لو ما وافقتيش قدام الناس كلها، إنتي مرات ناصر ولو حد قربلك هاكله بسناني!
عدى أسبوع ومليكة ما بتكلمش ناصر خالص وهو هيموت من القلق، كل يوم يخبط على ميادة يقول لها: “يا خالة ميادة مليكة عاملة إيه؟”. تقول له: “سيبها يا ولدي، هي بتحبك بس خايفة شوية، بكره ترجع لك”.
