توقف مراد عن لكمه قائلا: – جدع يلا، أنا سامعك… مسح الدماء من على شفتيه قائلا: – قاعدين في… هتف بتحذير ووعيد: – ولو كنت بتكذب.. أسرع قائلا بتعب: – لا يا باشا، ما بكذبش… – تمام، هنشوف. إندفع مراد إلى الخارج بسرعة البرق وكأنه يسابق الزمن. صعد إلى سيارته وانطلق مسرعاً في طريقه لذلك العنوان…
بعد دقائق، كان قد وصل للمكان فطرق الباب وانتظر أن يفتحه أحد. قام عابدين بفتح الباب وشهق بصدمة حينما رأى الطارق! – والله ووقعت في إيدي يا عابدين أخيراً! هتق بصدمة: مررراد!!!! جز على أسنانه بحقد دفين قائلا: – أيوة، مراد اللي إنت قتلت أبوه، كويس إنك فاكر! ثم أمسكه من ياقة قميصه بقوة يكاد يقتله قائلا بغضب: – دا أنا هقتلك النهاردة! ثم أخذ يكيل له اللكمات غافلاً عن كبر سنه فهو يرى صورة والده الراحل وهو ملقى بين ذراعيه. توقف عن الضرب فجأة وأسودت الدنيا، فخر أرضاً فاقداً الوعي.
في إحدى الحواري الشعبية بالإسكندرية، وفي شقة بسيطة، كان يفترش الفراش رجل كبير يبدو عليه المرض الشديد فهو مصاب بالشلل الكلي.. وإلى جواره تجلس ابنتها الغالية تعانقه بخوف وبكاء تحتمي فيه رغم عجزه قائلة: – بابا، قوم علشان خاطري، ما تسبنيش لوحدي، أنا خايفة من ناصر يا بابا… ربت محمود بضعف على رأسها قائلا: – ما تخافيش يا بنتي، إن شاء الله ربنا هيحلها من عنده… قاطع ذلك دلف الابن العاق كالثور قائلا بغضب: – هتتجوزيه غصب عنك سامعة ولا لا؟! هتفت بشجاعة مزيفة: لا مش سامعة، أنت ملكش كلمة عليا طالما بابا موجود! صفعها بقوة قائلا: يا سلام يا ستنا الشيخة! طيب وريني هعملي إيه إنتي وأبوك اللي مش بيتحرك من السرير دة، وبكرة كتب الكتاب على المعلم خميس! إرتمت تحت قدميه ممسكة بها تترجاه قائلة: – لا، لا حرام عليك، دة قد أبويا، حرام عليك! أزاحها بقدميه بقوة قائلا بغضب: – مليش دعوة، طالما هستنفع من وراكي يبقى خلاص مش مهم… قال ذلك ثم خرج صافعاً الباب خلفه. هرولت سجود إلى أبيها قائلة: إلحقني يا بابا.. إلحقني منه! بكى والدها مشفقاً على حالها ويبكي على ضعفه قائلا: ما تخافيش يا حبيبة أبوكي… ثم شرد في ماضيه وعاد قائلا: هاتي ورقة وقلم بسرعة.. واكتبي ورايا اللي هقولهولك. استغربت سجود ولكنها ذهبت وأحضرت ما أخبرها به والدها، وأخذت تكتب وهي لا تفهم شيئاً، ولكن بعد ذلك بدأت الخطوط تتضح لها فنظرت له بصدمة. فقال: مش وقت صدمات دة يا بنتي، ربنا عاقبني وأنا راضي بده، المهم دلوقتي تروحى تلبسي وتروحي على العنوان اللي كتبته ليكي من شوية، دي الحاجة الوحيدة اللي هتنجدك من منصور وشره… – وإنت يا بابا؟ أنا لا يمكن أسيبك. هتف بإعياء: يا بنتي ريحيني واعملي اللي قلت لك عليه بقى، ما تتعبنيش، أنا كلها كام يوم وهودع الدنيا دي، روحى علشان أبقى مطمن عليكي… قبلت يده قائلة: بعد الشر عنك يا بابا، متقولش كدة.. – يلا يا بنتي، مفيش وقت، يدوب تلبسي وتمشي. هزت رأسها بنفي قائلة: لا، لا مش همشي، مش همشي يا بابا، خليني جنبك بس يا بابا… – طيب يا بنتي ماشي، بس لو حصلتلي حاجة لازم تروحى للمكان اللي قلت لك عليه… – بابا إحكيلى، مين الست دي اللي عاوزاني أروحلها؟ هتف متأملا إياها: دي تبقى عمتك.. شهقت بصدمة قائلة: إيه! إزاي.. فهمني يا أبا الله لا يسيئك.. أردف بندم وهو يعود بذاكرته إلى الوراء قائلا: – زمان، أكتر من تلاتين سنة أيام ما كنت في عز شبابي.. كنت زي ناصر في كل حاجة حتى جبروته وكأن الزمن بيعيد نفسه… كان الطمع عاميني لدرجة إني اتهمت أختي في شرفها علشان أخد الفلوس والورث اللي حيلتها، وخليت أبويا يطردها من البيت ومحدش عرف عنها حاجة، أمي ماتت بحسرتها عليها، وبعد أما أبويا مات أخدت الفلوس وأخدت أمك اللي الله يسامحها لعبت في دماغي وخلتني أعمل كل دة، وأشترينا شقة في حتة نضيفة وفتحت مشروع وكان معانا ناصر وبعد كدة خلفتك وماتت بعديها بفترة مقتولة زي ما إنتي عارفة لما إتعرضلها حرامي وأخد منها الفلوس وقتلها، وأنا زي ما إنتي شايفه ربنا سلط عليا ناصر علشان يعمل اللي عملته زمان، خسرنى تجارتي في لعب القمار والمخدرات اللي بيشربها دي، وأديني أهو المرض بينهش فيا… من كام سنة فوقت من اللي أنا فيه وسألت عليها لقيتها بسم الله ما شاء الله متجوزة لوا بس توفي ومخلفة ولد ماشاء الله دلوقتي ظابط، ربنا أخد حقها مننا كلنا يا بنتي، لما تشوفيهاب قوليلها تسامحنى علشان أعرف أنام في تربتي، أنا إتكسفت أروحلها بعد اللي حصل بس المرض زي ما إنتي شايفه مانعني من كدة.. أنا عارف إزاي إنتي بصالي بس كانت ساعة شيطان عمتني عن الحق… – متعدبش نفسك تاني يا بابا، إرتاح دلوقتي.. وأنا هروح أعمل لك حاجة تشربها… تنهد محمود بتعب قائلا: سامحني يارب، وسامحيني يا بنت أمي وأبويا…
دلف محسن إلى الداخل وتفاجأ بمراد يضرب والده، فأمسك بالمزهرية الموجودة على الطاولة ثم توجه إليه وقام بضربه بها بقوة على رأسه فنزفت رأسه وفقد وعيه في الحال. نظر عابدين ومحسن إلى جسد مراد الهاوي على الأرض. هتف بصدمة: يلا بينا نهرب بسرعة بدل ما نروح في داهية! محسن وهو يمسك بالسكين ويتموج إليه: اقتله الأول! أمسكه بقوة مانعاً إياه عما ينوي فعله: إنت عاوز تودينا في داهية؟! إخلص بينا نلحق نهرب بدل ما ييجي البوليس وراة وتبقى مصيبة.. إعقل ويلا بينا قبل ما يفوق ودة لو فاق أصلا بعد الضرب اللي خدها دي… نظر محسن له بغل ثم رحل مع والده على مضض.
بعد مرور بعض الوقت، نهض مراد متألماً ووضع يده على رأسه موضع الألم فوجد نفسه ينزف، غلت الدماء في عروقه وأخذ يضرب بيده بقوة على المنضدة قائلا بصراخ ودموع: – يا ولاد الـ.. يا ولاد الـ.. آااااه! سامحني يا بابا، مقدرتش أجيبلك حقك المرة دي… ثم أكمل بفحيح: بس وعد مني، حقك هاخده وقريب أوي كمان… نفض ملابسه ثم نزل إلى الأسفل وصعد إلى سيارته منطلقاً إلى عمله.
في فيلا فريد المنشاوي، توقفت لمار عن البكاء أخيراً. هتفت أمينة بحنان: أحسن دلوقت؟ هزت لمار رأسها دون أن تنطق بكلمة. – مالك بقا؟ أنا سايباكي الصبح نايمة، هو إنتي كل ما بتصحى بتعيطي ولا إيه؟ أجابتها بكذب: لا، مش بعيط بس.. أصل إفتكرت ماما الله يرحمها، أصلها زارتني في الحلم. ربتت أمينة على كتفها قائلة: الله يرحمها.. يلا طيب دلوقتي رضي غيري هدومك علشان تنزلي تفطري… شهقت بتذكر وقالت: يا خبر! أنا معملتش الفطار، أنا آسفة هروح دلوقت والله معلش… ضحكت قائلة: إهدى بس مفيش داعي، أنا جبت الخدم من تاني وبعد كدة إنتي مش هتعملي حاجة تاني… إلتمعت الدموع في عينيها قائلة: بس.. بس حضرة الظابط هيضربني! – لا مش هيضربك متخافيش، أنا معاكي. أردفت بدموع: هو إنتى حضرتك بتعامليني حلو ليه؟ إنتي المفروض تكرهيني وتعذبيني! تنهدت بحزن قائلة: إنتي مكيش ذنب في حاجة أبدا، وربنا يجازي اللي كان السبب… – حضرتك طيبة أوي، أنا والله ماليا ذنب في حاجة، دة أنا حتى بكرهم أكتر منكوا كفاية إنهم خلوا ماما تروح مني.. أنا مش هسامحهم أبدا… ثم إنخرطت في البكاء مرة أخرى على ذكرى رحيل والدتها. أحتضنتها أمينة بشدة وقد أنسابت دموعها هي الأخرى: خلاص يا بنتي إهدى، دي راحت عند اللي أرحم مني ومنك.. أدعيلها بالرحمة والمغفرة… هتفت بانهيار وهي تستعيد تلك الذكرى: – كنت.. كنت في المدرسة وجيت وأخدتني في حضنها زي كل مرة، وبعدين أتغدينا وكنا بنعمل الواجب فجأة الباب خبط جامد أنا إتخضيت ساعتها وماما حضنتني علشان ما أخافش، بس سابتني وراحت فتحت الباب وياريت ما فتحته! طلع واحد من البلطجية اللي يعرفهم أبويا دخل زي المجنون يدور على بابا ولما مالقيهوش قعد يزعق لماما ويقولها فين بابا بس هى ما كنتش تعرف وهو مصدقهاش، راح لمحني وقام مسكني من شعرى وقال لماما إنه هياخدني رهن عنده لحد ما بابا يجيب فلوس البضاعة اللي سرقها، بس ماما ما سكتتش وراحت ماسكة فيه علشان تاخدني، راح طلع مطوة من جيبه وفتحها علشان يهدد ماما بس بردو قاومتوه من خوفها عليا، وفجأة راح غارزها في قلبها وقعت على طول! هو هرب على طول وأنا قعدت جنب ماما أعيط وأقولها قومي يا ماما بس هى مرضيتش وسابتني لوحدي.. آااه يا ماما! وحشتيني أوي.. تعالي خديني علشان أرتاح من اللي أنا فيه… عانقتها بدموع قائلة: خلاص يا حبيبتى إهدى ووحدي ربنا… – لا إله إلا الله.. بس هي وحشتني أوي… – إهدى وأنا هوديكي تزوريها ماشي؟ هتفت بفرح: بجد حضرتك بتكلمي جد؟! بس ابنك.. – مالكيش دعوة بيه، خليكي معايا أنا.. يلا غيري لبسك علشان تنزلي معايا… – حاضر…
ظهراً، في فيلا حامد الداغر: كانت ورد تلاعب سليم الذي أخذته للتو من والدته، نظرت له بحنان قائلة: – بتضحكي يا كميلة إنتي ياختي، خراشي قمر.. ثم أكملت بغيظ: مش زي عمك البارد دة! – ياه! دة إنتي شايلة من عمه أوي على كدة! صرخت بقوة ثم نظرت خلفها قائلة بضجر: – ربنا يسامحك خضتني يا ندى… هتفت بضحك: أعملك إيه يعني؟ ما تكلميش نفسك تاني بصوت عالي، المرة دي جات فيا أنا، المرة الجاية الله أعلم… – مش بعيد يكون البارد نفسه! هههههه… ذمت شفتيها بتذمر قائلة: متضحيش تاني كدة ماشي؟ قهقهت عاليا قائلة: خلاص، خلاص أنا آسفة… – سليم شكله حبك أوي، عقبال الكبير يارب.. المهم أنا رايحة أنا وسليم نشتريله شوية هدوم إيه رأيك تيجي معانا؟ – بجد يعني ينفع؟ – أه طبعا يا حبيبتي، يلا هاتي سليم أروح ألبسه على ما تجهزي.. – طيب، رايحة أهو…
بعد دقائق وصلوا إلى مول كبير، ترجلن من السيارة ثم دلفن إلى الداخل بصحبة الصغير سليم. كانت ورد تتطلع للمكان بانبهار شديد فهى لم يسبق لها التواجد في أماكن مثل هذه من قبل. هتفت بعيون متسعة انبهاراً: – الله! المكان حلو أوي… – أي حاجة تعوزيها شاوري عليها بس. – بس أنا معايا فلوس.. – طيب دة اسمه كلام يا بنتي؟ محدش بيمتن عليكي دي فلوسك، يلا يلا قدامي ولا إتصل بماما صفاء تشوف شغلها معاكي؟ – لا خلاص خلاص! – أيوا كدة، يلا قدامي بقا…
ذهبن لإنتقاء الملابس لسليم ثم أنتقيا بعض الملابس لأنفسهن، وذهبوا للمطعم وتناولوا الطعام وسط سعادة ورد العارمة. غادرن إلى الفيلا.
وصل مراد إلى مكتبه وهو يركل كل ما تطوله يداه من الغيظ. مراد صارخا معاتباً نفسه: غبي! غبي! سيبتهم ليه؟ إزاي تسيبهم؟ إزاي؟! دلف عمر إلى المكتب فوجده في حالة يرثى لها، ووجد صديقه يجلس على الأريكة يضع يده على رأسه. تقدم عمر منه وجلس إلى جواره ووضع يده على كتفه، أما الآخر عندما رآه نظر له بندم قائلا: – هربوا يا عمر، هربوا وحق أبويا راح تاني… ربت على كتفه قائلا بتشجيع: متزعلش يا صاحبي هيتمسكوا، ما تقلقش كل الحكاية إن أجلهم لسه مجاش… هتف بنبرة محملة بالندم: متزعلش مني يا عمر، إنت عارفني لما بغضب مابشوفش قدامي… ضحك عاليا ثم أضاف بمرح: لا يا عم أنا زعلان، وديني أي مطعم ناكل وأنا هصالحك… هتف بغيظ: طفس من يومك! عمر بصدمة وقد سقطت عينيه على لياقة قميص مراد التي تحولت إلى اللون الأحمر: – مراد! إنت بتنزف؟! هتف بدون اهتمام: متخدش في بالك، دة جرح صغير… صاح فيه غاضبا بقلق: قوم معايا بلا جرح صغير! إنت رأسك بتنزف وحضرتك ولا هنا! تأفف قائلا: بس زن يا عمر أنا كويس. هتف بإصرار: لا مش هبطل إلا لما تطلع معايا على الدكتور… – عمر.. عمر بس يا بابا، إنت عامل كدة زي الست الزنانة. ضحك بنبرة أنثوية قائلا: ما طبعا مش لازم أخاف على جوزي؟ يلا يا بيبي! إبتسم على مزاحه قائلا: والله مجنون.. يلا يا سيدي…
وبعد دقائق وصلوا المشفى وقام الطبيب بتخييط الغرز وسط نظرات عمر الحانقة. وبعد انتهاء الطبيب كتب له بعض الأدوية. أخذ عمر يقضم شفتيه بغيظ قائلا: بقا مش مستاهلة مش كدة؟ واخد سبع غرز ومش مستاهلة؟! يا جبروتك يا أخي يا جبروتك! ضحك قائلا: خلاص يا عمر مش حكاية هي، يلا بينا نمشي… – ماشي يا سيدي إتفضل قدامي…
في فيلا فريد المنشاوي، نزلت لمار برفقة أمينة بخجل شديد، وعندما رأت الجميع ينظر إليهن بدهشة فتركتها بآلية متوجهة للمطبخ. مسكتها أمينة بسرعة من يدها قائلة: – إنتي رايحة فين؟ أجابتها وهي تنظر أرضاً خجلاً من البقية: رايحة المطبخ هقعد هناك… هتفت بإصرار: لا تعالى إقعدي معانا علشان تفطري… هزت رأسها بسرعة قائلة بترج: لا، لا أنا هاكل في المطبخ الله يخليكي سيبيني أروح… هتفت باستسلام: ماشي، إعملي اللي يريحك…
توجهت أمينة إلى الطاولة وألقت عليهم تحية الصباح وجلست تتناول فطورها معهم. كان الجميع ينظر لها بصدمة. لاحظت هي نظراتهن فهتفت قائلة: إيه مالكم بتبصولي كدة ليه؟! صاحت فاطمة بغضب شديد: إنتي إيه اللي عملتيه دة ها؟! أجابتها ببرود: عملت إيه يعني؟ – يعني ما انتيش عارفة إنتي إزاي تتعاملي مع البنت دي؟! إنتي ناسية هي مين؟! – لا مش ناسية يا فاطمة، بس هي ملهوش ذنب. هتفت زينة بسخرية: الله الله! هي لحقت تضحك عليكي؟! – إيه تضحك عليا دي كمان؟ هو أنا عيلة صغيرة؟! – ما أقصدش يا مرات عمي.. بس دي واحدة مجرمة إزاي تأميني على نفسك كدة وعلينا؟ – أنا عارفة بعمل إيه كويس جداً…
جزت على أسنانها بغيظ قائلة:
– براحتك يا أمينة، براحتك…
بعد لحظات، كانت زينة تقف إلى جوار والدتها تهتف بحقد:
– بقى كدة؟! البت ضحكت عليها وخلتها زي الخاتم في صباعها وهي مالهاش يومين!
– مش خايبة زيك، ليكي سنين هنا ومش عارفة تكسبيها…
– بس وحياتك لأجيبلك عاليها واطيها وبكرة تقولي زينة قالت…
– لما نشوف يا أختي، قدامي بدل ما حد يسمعنا.
ليلا في شقة محمود بالإسكندرية:
دلفت سجود لتعطي والدها الدواء، جلست إلى جواره وأخذت تهزه برفق قائلة:
– بابا، بابا قوم علشان تاخد الدوا بتاعك… بابا!
ثم أخذت تهزه بقوة وتصيح باسمه ولكن دون فائدة، فأحتضنته بقوة وأخذت تصرخ وتبكي:
– بابا، بابا قوم! ما تسبنيش… قوم يا بابا.. آااه يا بابا! أنا محتجالك، متسبنيش.. قوم يا بابا، قوم…
في فيلا حامد الداغر، كانت ندى مع ورد كالعادة يتسامران.
هتفت ورد بعيون ذابلة:
– هو.. هو صحيح فرح سليم الأسبوع الجاي؟
نظرت لها بحزن قائلة:
– أه، هو قال كدة، مصطفى قالى…
هتفت بتردد ودموع:
– وهو بيحبها؟
قوست شفاهها بعدم معرفة قائلة:
– مش عارفة، هما بيخرجوا كتير مع بعض بس دة اللي أعرفه…
تنهدت بحزن قائلة:
– ربنا يسعدهم…
– حبيبتي ما تقلقيش، إن شاء الله ربنا هيرضيكي، إنتي طيبة وتستاهلي كل خير…
– ربنا يخليكي، بس أوعى تقولي قدام حد إني مرات سليم.. هيزعقلي.. ماشي؟
– ماشي يا حبيبتي متقلقيش…
– طيب أنا هطلع أوضتي ومتنادنيش على العشا مليش نفس…
صعدت إلى الأعلى بسرعة ودلفت إلى غرفتها فخلعت حجابها وألقت بنفسها على السرير وأخذت تبكي بصوت مسموع على حالها. كيف ستتحمل رؤيته ملك لغيرها يعطيها كل شيء وهي لا شيء؟! كيف ستعش معها في بيت واحد؟! دعت الله أن تمر الأيام على خير، فمهما كانت الظروف فهي بالتأكيد أفضل من العيش عند خالها! وعلى ذكر خالها إرتعش جسدها خوفاً فضمت نفسها وتكورت كالجنين مستمرة في وصلة بكائها.
عاد مراد من عمله فألقى عليهم السلام. ما إن رأته والدته ركضت نحوه قائلة بقلق:
– مالك يا ابني؟ إيه اللي في راسك دة؟!
هتف بكذب مطمئنا إياها:
– متقلقيش يا أمي، دة أنا خبطت راسي من غير ما أقصد.. الحمد لله إنها جات على قد كدة.
تلقائيا، وجد عينيه تبحث عنها، فنظرت له أمينة بخبث قائلة:
– اللي بتدور عليه مش هنا…
توتر قائلا:
– آاا.. إنتي.. إنتي تقصدي إيه؟
ضحكت قائلة بخبث:
– أبدا يا حبيبي، أنا أقصد عمك في مكتبه بيتابع الشغل…
جز على أسنانه بضيق قائلا:
– أه ماشي، أنا هطلع فوق أغير هدومي علشان أتعشى…
ثم أكمل بقسوة:
– الزفتة اللي هنا عملت الأكل؟
