الجزء الثالث والأخير
نرمين كانت قاعدة جنب سليم في عربيته، لكن عقلها كان مشغول بالرسالة اللي وصلتلها.
“قاتل أبوكي عايش وسطهم… وأقرب شخص لسليم هو اللي بيخبي الحقيقة!”
بصت لسليم بطرف عينها، وحاولت تتخيل مين الشخص اللي ممكن يكون بيخبي السر ده.
سليم لاحظ سكوتها، فقال باستغراب:
ـ إيه يا نرمين؟ إنتِ هادية ليه؟ مش دي فرصة العمر علشان تتريقي عليا؟
نرمين بصت له وقالت:
ـ متقلقش، أنا بس بوفر طاقتي علشان لما أقابل عيلتك أعمل فضيحة محترمة!
سليم ضحك رغم عنه.
ـ ربنا يستر من اللي جاي.
نرمين ابتسمت بخبث.
ـ ادعي لنفسك يا سليم، أنا ماليش دعوة!
وبعد شوية، وصلت العربية قدام قصر عيلة الألفي.
نرمين نزلت وبصت للقصر بانبهار، لكنها حاولت تداري ده وقالت:
ـ هو إنتوا بتسكنوا هنا ولا بتصوروا مسلسل تاريخي؟
سليم بص لها بصدمة.
ـ نرمين!
ـ خلاص يا سيدي، هسكت… بس لو لقيت شبح في الطرقة مش مسؤولة!
سليم مسك إيدها ودخل بيها القصر، وأول ما دخلوا، ظهرت سيدة أنيقة في أواخر الخمسينات، بصت لنرمين من فوق لتحت.
ـ مين دي يا سليم؟
سليم رد بهدوء:
ـ دي نرمين، خطيبتي.
الست فتحت عينيها بصدمة.
ـ خطيبتك؟! وإمتى الكلام ده حصل؟!
نرمين ابتسمت ومدت إيدها تسلم عليها.
ـ حصل بسرعة يا طنط، الحب ساعات بييجي من غير استئذان!
الست سحبت إيدها ببرود.
ـ وأنا اسمي مش طنط، أنا مدام ليلى الألفي، والدة سليم.
نرمين ابتسامتها اختفت لحظة، وبعدها قالت:
ـ تشرفنا يا مدام ليلى، أنا نرمين الشربيني.
أول ما ليلى سمعت اسم الشربيني، ملامحها اتغيرت.
بصت لسليم وقالت بعصبية:
ـ إنت جايب بنت الراجل ده لحد بيتنا؟! إنت اتجننت؟!
سليم وقف قدام نرمين.
ـ نرمين خطيبتي، ومش هسمح لحد يهينها.
ليلى رفعت صوتها:
ـ أبوها كان سبب المصايب اللي حصلت لأخوك!
نرمين اتصدمت من الكلام، لكنها رفعت راسها وقالت:
ـ أبويا مات وهو مظلوم، واللي عنده دليل على إنه غلطان يطلعه بدل ما يفضل يكرر كلام الناس!
ليلى سكتت للحظة، وبعدها سابتهم ومشيت وهي غاضبة.
نرمين بصت لسليم وقالت:
ـ واضح إن العيلة دي بتحبني جدًا!
سليم مسك إيدها وقال:
ـ متشغليش بالك، أنا معاكي.
نرمين بصت له، ولأول مرة ما لقتش رد ساخر تقوله.
لكن اللحظة دي انتهت لما كريم ظهر قدامهم.
ـ سليم، ممكن أتكلم معاك شوية لوحدنا؟
سليم سابه مع نرمين وراح معاه للمكتب.
نرمين افتكرت الرسالة، وقررت إنها مش هتفضل واقفة مستنية حد يقول لها الحقيقة.
مشت بهدوء ناحية المكتب، وسمعت صوت كريم من جوه.
ـ لازم تبعد البنت دي عنك قبل ما تعرف كل حاجة.
سليم رد بغضب:
ـ ليه؟ إنت خايف من إيه يا كريم؟
كريم سكت لحظة، وبعدها قال:
ـ علشان أبوها كان عارف كل حاجة، ولو هي وصلت للمستندات، كلنا هنضيع!
نرمين حطت إيدها على بقها من الصدمة.
يعني كريم هو اللي بيخبي الحقيقة!
لكن قبل ما تتحرك، سمعت صوت تاني من جوه.
صوت فؤاد الألفي، عم سليم.
ـ متقلقش يا كريم، البنت دي مش هتعرف حاجة طول ما أنا موجود.
نرمين رجعت خطوة لورا، ودموع الغضب لمعت في عينيها.
فؤاد هو اللي ظلم أبوها، وكريم كان عارف وساكت!
طلعت تليفونها وبدأت تسجل الكلام، لكن فجأة الباب اتفتح.
كريم وقف قدامها، وبص للتليفون في إيدها.
ـ إنتِ بتعملي إيه هنا؟!
نرمين رفعت راسها وقالت:
ـ بجمع الأدلة اللي هتدخلكم السجن!
فؤاد خرج من المكتب، وأول ما شافها، وشه اتغير.
ـ هاتي التليفون ده يا بنت الشربيني!
نرمين رجعت لورا وقالت بصوت عالي:
ـ مش هتاخده! المرة دي مش هتقدروا تسكتوني زي ما سكتوا أبويا!
فؤاد حاول ياخد التليفون منها، لكن سليم ظهر في اللحظة دي ووقف بينهم.
ـ إنتوا بتعملوا إيه؟!
نرمين جريت ناحيته ووقفت جنبه.
ـ اسأل عمك وصاحبك! دول اللي كانوا مخبيين الحقيقة من سنين!
سليم بص لكريم، وبعدها لف ناحية عمه.
ـ إيه اللي بيحصل هنا؟
فؤاد حاول يتكلم بهدوء.
ـ البنت دي بتكدب عليك يا سليم، هي عايزة تنتقم من عيلتنا.
نرمين رفعت التليفون.
ـ طب اسمع التسجيل بنفسك!
شغلت التسجيل، وصوت كريم وفؤاد ملأ المكان.
سليم فضل واقف مش بيتكلم، وكل كلمة كان بيسمعها كانت بتكسر جزء من ثقته في الناس اللي عاش معاهم عمره كله.
لف ناحية عمه وقال بصوت مخيف من شدة هدوئه:
ـ إنت اللي ظلمت أبو نرمين؟
فؤاد حاول يبرر.
ـ أنا كنت بحمي الشركة!
سليم صرخ فيه لأول مرة:
ـ على حساب حياة الناس وسمعتهم؟! أبويا مات وهو فاكر إن صاحبه خانه، ونرمين عاشت عمرها وهي شايلة عار جري\مة ما عملهاش أبوها!
كريم حاول يتدخل.
ـ سليم، اسمعني، أنا كنت مضطر…
سليم بص له بصدمة.
ـ مضطر تخون ثقتي فيك؟! إنت كنت أقرب واحد ليا!
نرمين كانت واقفة ودموعها بتنزل، مش مصدقة إن الحقيقة اللي استنتها سنين ظهرت أخيرًا.
لكن فؤاد فجأة اندفع ناحية التليفون علشان ياخده، فسليم منعه وطلب من أمن القصر يتصلوا بالشرطة.
وبعد وقت قصير، وصلت الشرطة، وسلمهم سليم التسجيل والمستندات اللي كانت نرمين محتفظة بيها.
واتقبض على فؤاد وكريم بعد ما ظهرت أدلة إضافية تثبت تورطهم في الق\ضية.
وقبل ما فؤاد يخرج، بص لسليم بغضب وقال:
ـ هتندم إنك وقفت ضد عيلتك علشان واحدة عرفتها من يومين!
سليم رد بثبات:
ـ العيلة مش بالدم يا عمي، العيلة بالحق والضمير… وإنت اخترت تبقى بعيد عن الاتنين.
—
بعد مرور شهر، ظهرت الحقيقة كاملة.
والد نرمين كان بريئًا من تهمة السرقة، واتكشف إن فؤاد هو اللي لفّق له التهمة علشان يخفي اختلاس أموال الشركة.
سليم بنفسه وقف في مؤتمر صحفي، وأعلن براءة والد نرمين قدام الجميع، واعتذر لعائلتها عن الظلم اللي اتعرضت له.
نرمين كانت بتتفرج على المؤتمر من بيتها، ودموعها بتنزل وهي بتسمع اسم أبوها بيتقال باحترام بعد سنين طويلة من الظلم.
بعد المؤتمر، سليم راح لها.
فتح له الباب، فلقاها واقفة وعيونها حمرا من العياط.
بصلها بحزن وقال:
ـ حقك عليا يا نرمين، أنا صدقت كلام الناس قبل ما أعرف الحقيقة، وكان المفروض أسمعك من الأول.
نرمين بصت له وسكتت شوية.
ـ إنت عارف أنا كنت مستنية إيه من اليوم ده؟
ـ إيه؟
ـ كنت مستنية حد يقول إن أبويا بريء، وإنه مات وهو راجل محترم مش حرامي زي ما الناس كانت فاكرة.
سليم قرب منها وقال:
ـ وأنا هفضل طول عمري أحاول أعوضك عن كل لحظة وجع عشتيها.
نرمين مسحت دموعها وقالت:
ـ أنا مش عايزة تعويض يا سليم، أنا عايزة أبدأ من جديد.
سليم ابتسم بحنان.
ـ طب نبدأ من جديد سوا؟
نرمين بصت له باستغراب.
ـ يعني إيه؟
سليم طلع علبة صغيرة من جيبه وفتحها، وكان جواها خاتم جميل.
ـ يعني أنا مش عايز خطوبة الشهر اللي اتفقنا عليها، ولا عايزك تفضلي معايا علشان الفلوس. أنا عايزك تبقي مراتي بجد، وتفضلي معايا بإرادتك، من غير اتفاقات ولا تمثيل.
نرمين فضلت باصة له، وبعدها قالت بمكر:
ـ طب والمرتب؟
سليم اتصدم.
ـ مرتب إيه يا نرمين؟!
ـ أمال أنا هسيب شغلي وأتجوزك ببلاش؟!
سليم حط إيده على راسه وقال:
ـ يا بنتي إنتِ مش طبيعية!
نرمين في الضحك.
ـ أهو ده الكلام اللي بحبه! أخيرًا رجعت تتكلم طبيعي!
سليم ضحك ومد إيده ليها.
ـ موافقة يا نرمين الشربيني؟
نرمين بصت للخاتم، وبعدها بصت في عينيه وقالت بهدوء:
ـ موافقة يا سليم الألفي، بس عندي شرط.
ـ يا ساتر، شرط إيه تاني؟
ـ ممنوع الغرور في البيت، وممنوع تزعقلي، ولو اتخانقنا إنت اللي هتصالحني!
سليم هز راسه وهو بيضحك.
ـ حاضر يا ستي، أي أوامر تانية؟
نرمين ابتسمت.
ـ أيوه، هاتلي بيتزا وأنا هفكر!
ضحك سليم وقال:
ـ بيتزا إيه بس؟ ده أنا هجيبلك مطعم كامل!
نرمين رفعت صباعها بتحذير.
ـ إياك تفكر إن الفلوس هتخليك تسيطر عليا!
سليم مسك إيدها وقال:
ـ أنا مش عايز أسيطر عليكي، أنا عايز أفضل جنبك.
ولأول مرة، نرمين حسّت إنها مش مضطرة تحارب الدنيا لوحدها.
—
بعد شهور، اتجوز سليم ونرمين في حفل جميل، لكن نرمين أصرت إن الفرح يكون بسيط ومن غير مظاهر مبالغ فيها.
وفي نص الحفلة، سليم كان واقف بيتكلم مع الضيوف، وفجأة حس بحاجة باردة على بدلته.
لف بسرعة.
كانت نرمين واقفة قدامه بكوباية عصير!
سليم رجع خطوتين لورا وقال بفزع:
ـ نرمين! إياكي تقربي بالعصير ده مني!
نرمين انفجرت في الضحك.
ـ اهدى يا حبيبي، أنا اتعلمت من غلطتي!
سليم بص للبدلة وبعدين لها.
ـ آخر مرة وثقت فيكي، صحيت لقيت القهوة على قميصي!
نرمين قربت منه وقالت بمكر:
ـ طب ما أنا لو مكنتش وقعت العصير عليك، كنت هتعرفني إزاي؟
سليم ابتسم ومسَك إيدها.
ـ عندك حق، دي كانت أحلى غلطة حصلت في حياتي.
نرمين ابتسمت وقالت:
ـ وأنا كمان يا سليم، رغم إنك كنت مغرور ومستفز ودمك تقيل في الأول!
سليم ضحك.
ـ في الأول بس؟
نرمين عملت نفسها بتفكر.
ـ لأ، لسه مستفز، بس بقيت مستفز بتاعي أنا!
ضحك سليم، وضم إيدها بين إيديه، وسط فرحة العيلة والأصحاب.
وهكذا انتهت حكاية نرمين الشربيني وسليم الألفي، حكاية بدأت بكوباية عصير وخناقة، وكبرت وسط الأسرار والوجع، وانتهت بحب اختار الحقيقة قبل أي حاجة تانية.
تمت بحمد الله
رواية اتجوزت العاصي بالغلط
بقلم نيمو محمد
