— تروحي فين إيه بقى؟ إنتي بتخرفي تقولي إيه؟ سرايا الهواري دي سرايتك زي ما تكون سرايتهم، وإنتي خابرة إكده زين.
— سرايتي بصفة إيه يا دادة؟ أنا كنت مرت ابنهم، ودلوقتي بقيت طليقته.. مليش قعدة هنا، الناس تاكل وشنا.. دياب نفسه مش هيسمحلي أقعد.
زينب ضحكت ضحكة خفيفة فيها سخرية:
— دياب؟ هو إنتي لساتكي عميا يا بتي؟ دياب بيه اللي شال أخوه من الأرض شيل ورمالكي يمين الطلاق غصب عنه عشان يحفظ كرامتك، يطلعك بره السرايا؟ دياب اللي كان قافل على روحه تلت سنين في البندر، وأول ما شم خبر إن فارس مزعلك، نزل زي القضاء المستعجل يربيه.. يطلعك؟
غزل بعدت عن حضن زينب وبصتلها باستغراب وحيرة:
— قصدك إيه يا دادة؟ دياب بيكرهني.. دياب مجاليش مبروك حتى يوم فرحي، تلت سنين متصلش بيا ولا مرة.. ولما رجع كان بيعاملني زي حشرة ماشية في السرايا.. دياب اتدخل امبارح عشان شرف العيلة واسم الهواري مش عشاني أنا.
زينب ضربت كف على كف بحسرة:
— يا مُرك يا زينب في بهايمتك يا بتي! شرف عيلة إيه؟ دياب بيه عمره ما كرهك.. دياب هرب من البلد يوم ما وافقتي على فارس لأن قلبه انكسر! إنتي مفكرة دياب كان بيعاملك جاف ليه الأيام اللي فاتت؟ عشان خايف يبصلك يضعف، خايف يشوفك مرت أخوه وحبيبته في نفس الوقت. دياب بيه عاشقك من وانتي بضفاير يا غزل، بس إنتي اللي عيونك كانت معميا بفارس وطيشه.
غزل قلبها دق بسرعة رهيبة، الكلام نزل عليها زي الصاعقة، كأن شريط حياتها كله بيتعاد قدام عينيها. خوف دياب عليها زمان، حمايته ليها، نظرته اللي كانت بتلاحقها في كل مكان، كلمته امبارح: الشارع ده للي ملوش دياب. بلعت ريقها بصعوبة وهمست:
— لا يا دادة.. مستحيل.. دياب طول عمره أخوي الكبير، حتى لو كلامك صُح.. أنا دلوقتي بقيت طليقة أخوه! مستحيل دياب يبصلي.. ومستحيل أنا أقعد في السرايا دقيقة وحدة.. أنا لازم أمشي من هنا.
زينب قامت ووقفت بحزم:
— تمشي تروحي فين؟ لعمك رضوان اللي كل همّه الفلوس واللي كان عيرميكي لأي راجل عجوز عشان قرشين؟ اسمعي يا بتي.. دياب بيه لو عرف إنك بتفكري إكده، هيخرب الدنيا فوق دماغنا كلنا. افطري وصلي ركعتين واهدي إكده.
سابتها زينب وخرجت، وغزل فضلت مكانها، دماغها بتلف زي الدوامة، كلام دادة زينب فتح بيبان في قلبها كانت مقفولة ومتربسة بالضبة والمفتاح.
تحت في الجنينة، الصوت كان عالي. فارس كان واقف بره البوابة الحديد، بيزعق وبيشتم، والغفرا واقفين مش عارفين يعملوا معاه إيه.
