فارس ضحك بصوت عالي، ضحكة مستفزة خلت الدم يغلي في عروقها، وقرب منها ومسك دراعها بعنف:
— أطلقك؟ انتي اتخبطي في نافوخك يا بت؟ أطلقك عشان تروحي فين؟ للشارع؟ انتي ناسية أصلك ولا إيه؟ انتي حتة بت غفير، يتيمة، لا أب ولا أم ولا ضهر تتسندي عليه. المفروض تبوسي إيدك وش وضهر إني مأويكي في سرايا العمدة.. تاكلي وتشربي وتلبسي، وتكتمي خشمك ده خالص.. عجباكي العيشة إكده أهلاً وسهلاً، مش عجباكي، اخبطي راسك في أتخن حيطة في قنا كلها!
الكلمات نزلت على غزل زي الكرابيج. حسّت بضعفها، بقلة حيلتها. كلامه صح، هتروح فين؟ مين هيحميها؟ دياب اللي كان بيحميها زمان دلوقتي بيكرهها ومبيكلمهاش، ولو عرف ممكن يطردها هو كمان. دموعها نزلت بكسرة، هدت حيلها، رفعت عينيها في الأرض، ولسه هتسحب دراعها باستسلام وذل..
وهي ملهاش عازة صُح.. بس ليها ضهر يكسر وسط اللي يفكر يمسها بكلمة!
الصوت رن في بهو السرايا زي الرعد. صوت رج الأرض تحت رجلين فارس. غزل رفعت عينيها بذهول، وفارس لف وشه برعب. كان دياب. واقف على أول السلم، عينيه بتغلي زي بركان انفجر بعد سنين من الخمود. خطواته نازلة السلم ببطء بس كل خطوة كانت بتدب في قلب فارس الرعب. دياب كان زي الأسد اللي شاف فريسته بتتهان.
قرب منهم، وبحركة وحدة سريعة وقوية، مسك إيد فارس اللي ماسكة دراع غزل، ولواها ورا ضهره، خلى فارس يصرخ من الألم. دياب سحب غزل وراه، خلاها في ضهره، في حمايته، زي ما كان بيعمل وهي طفلة.
— دياب! انت اتجننت؟ بتكسر إيدي عشان دي؟
فارس صرخ بوجع. دياب ضربه بالرجل موقعه على الأرض قدامه، ووقف فوق راسه وهو بينهج من الغضب:
— دي تسواك وتسوى عيلتك كلها يابن أبوي! قولتلك ميت مرة حافظ على النعمة اللي في إيدك، بس انت طلعت لا بتصون نعمة ولا بتعمر بيت. بتعايرها إنها يتيمة؟ بتعايرها بكسرة ضهرها؟ قسماً بالله لو ما كنت أخوي لكانت رصاصة من طبنجتي استقرت في نفوخك الفاضي ده!
غزل كانت واقفة ورا دياب، بتبكي بصمت، مذهولة من اللي بيحصل. دياب؟ دياب اللي بيكرهها بيدافع عنها؟ دياب اللي بقاله أيام مبيبصلهاش، دلوقتي واقف قدام أخوه زي الجبل عشانها؟
فارس وهو بيحاول يقوم من على الأرض، وشه أحمر من الغيظ والإحراج:
— انت بتتدخل ليه يا دياب؟ مرتي وأنا حر أأدبها! بعدين انت محموج عليها إكده ليه؟ تكونش لساتك فاكر أيام المرجحة واللعب في الجنينة؟ دي مرتي، وحتفضل مرتي ورجلها فوق رقبتها!
عينين دياب اسودت، البركان انفجر تماماً. سحب من حزامه سلاحه الشخصي ووجهه في وش فارس. غزل صرخت:
— دياااااب! لااا!
لكن دياب متهزش، صوته خرج جهوري، مرعب، حاسم:
— هتطلقها يا فارس.
فارس بلع ريقه بخوف وهو باصص لفوهة السلاح:
— انت بتقول إيه يا دياب؟ أطلق مرتي؟ السلاح ده بتشهره في وش أخوك عشان دي؟
— قولتلك هتطلقها.. دلوقتي، وحالاً.. ورجلك فوق رقبتك! انطق يابن أبوي، انطق الكلمة بدل ما أخلي جنازتك تسبق طلاقها!
فارس بص لغزل اللي واقفة ورا دياب، وبعدين بص لدياب اللي مفيش في عينيه أي ذرة تراجع. عرف إن دياب مبيتهددش، وإنه فعلاً ممكن يقتله. وبصوت مهزوز، مليان حقد وضعف، قال:
— انتي طالق يا غزل.. طالق.
الكلمة نزلت على غزل، حسّت وكأن جبل انزاح من على صدرها، وفي نفس الوقت الأرض بتنهار بيها. دياب نزل سلاحه بالراحة، ورجعه مكانه، وبص لفارس باشمئزاز:
— تلم حاجاتك، وتغور من السرايا دي. مشفش وشك هنا لا النهاردة ولا بكرة لحد ما أشوفلك صرفة. غور!
فارس قام ينفض هدومه، رمق دياب بنظرة غل، ورمق غزل بنظرة احتقار، وخرج بره السرايا كلها.
الصمت نزل على المكان. مفيش غير صوت أنفاس دياب العالية، وصوت عياط غزل المكتوم. دياب لف ببطء. بص لغزل. عينيها كانت مليانة دموع، حيرة، وصدمة. لأول مرة من تلت سنين، تلتقي العيون بجد. لأول مرة من تلت سنين، غزل تشوف في عين دياب نظرة مألوفة.. نظرة دياب الحارس، دياب الأمان، بس كان فيها حاجة تانية المرة دي، حاجة أعمق من الأخوة، حاجة حسستها برجفة في قلبها.
— ليه يا دياب؟
همست بيها غزل وصوتها بيرتجف، والدموع بتنزل على خدودها:
— ليه عملت إكده؟ ليه طلقتني منه؟ انت مش كنت بتكرهني ومبطيقش تبص في وشي؟ ليه وقفتله وخليته يرمي عليا اليمين؟ أنا دلوقتي بقيت في الشارع بجد.
دياب قرب منها خطوة. قلبه كان بينزف على دموعها، بس في نفس الوقت كان بيرقص إنها أخيراً اتحررت من الكابوس اللي كانت عايشة فيه. مد إيده الخشنة، وبأطراف أصابعه مسح دمعة نزلت على خدها، في حركة خلت غزل تتجمد مكانها من المفاجأة. وبصوت هادي، عميق، مليان حنان دافيها زي شمس الشتا، قالها:
— الشارع ده للي ملوش دياب يا غزل.. وطول ما فيا عِرق بينبض، إنتي صاحبة السرايا دي، واللي يفكر يقلل من مقامك، أهد المعبد على راسه. كرهتك؟ أنا عمري ما كرهتك.. أنا كرهت ضعفي، وكرهت غبائك اللي خلاكي تختاري الغلط.
سكت لحظة، وعينيه بتغوص في عينيها بطريقة خلت أنفاس غزل تضطرب:
— بس خلاص.. الغلط اتصلح.. ومن النهاردة، مفيش غير الصح اللي كان لازم يحصل من تلت سنين.
غزل بصتله بصدمة، قلبها دق بعنف مش فاهماه:
— قصدك إيه يا دياب؟
ابتسم دياب ابتسامة خفيفة، غامضة، وقال:
— خشي ارتاحي يا غزل.. كلامنا لسه مبدأش.
إنتي لساتكي بتبكي يا حبة عيني؟ عتبكي على إيه ولا على مين؟ على اللي رخصك وخانك؟ ولا على حظك المايل؟ امسحي دموعك دي يا غزل، دموعك غالية وماتنزلش على خسيس.
دادة زينب، العجوز اللي ربت غزل ودياب وفارس، دخلت الأوضة بصينية الفطار، لقت غزل قاعدة على السرير، ضامة ركبها لصدرها وعينيها وارمة من العياط طول الليل. غزل رفعت عينيها الحمرا وردت بصوت مبحوح ومرتجف:
— مببكيش عليه يا دادة… فارس خلاص طلع من قلبي من ساعة ما شفت خيانته بعيني وسمعت إهانته بودني. أنا ببكي على حالي.. على يُتمي اللي كسرني وخلاني حمل تقيل عليهم، ببكي على طردة فارس، وببكي على كسرتي وأنا مش عارفة هروح فين بعد ما عدتي تخلص.
دادة زينب حطت الصينية على الترابيزة وقربت منها، خدتها في حضنها وطبطبت على ضهرها:
