غلطة عمري زهرة الربيع

غلطة عمري — بقلم زهرة الربيع

بس تقى اتسعت عينيها بدهشة لما شافته عند السلم، وصړخت جامد وقالت:

— الولد!

وجريت عليه بسرعة، وشالته، لكن رجلها اتزلقت على السلم وكانت هتقع، وفي آخر لحظة رياض لحقها وشدها من إيدها بقوة، وبقت بين إيديه هي والطفل.

تقى قلبها كان هيقع من الخوف، وضامة الولد بقوة، ورياض كمان اتفاجئ وسحب منها الولد بسرعة، وضمه وبقى يطمن عليه بخوف وقال:

— يا حبيبي، الحمد لله… الحمد لله يا رب.

رياض رفع عيونه لتقى وبصلها بإحراج وقال:

— شكرًا… شكرًا إنك لحقتيه.

تقى بصت له بضيق وقالت:

— المهم تاخد درس من اللي حصل، وتخلي بالك على ابنك أكتر من كده.

ولسه هتمشي، مسكها من إيدها بانفعال وقال:

— أنا مش فاهم إنتِ إزاي بتكلميني كده أصلًا؟ على فكرة، إنتِ اللي المفروض تخلي بالك على الولد، وياريت تلتزمي بحدود شغلك.

تقى أبعدت إيده وقالت:

— وإنت بتكلمني بالطريقة دي ليه؟ أنا كنت واخدة بالي من الولد كويس وقافلة عليه الباب، لحد ما حضرتك جيت من غير ما تستأذن وفتحت الباب، ووقفت تتناقش معايا وكأنك ناسي إن معاك ابن.

وبعدين كملت:

— احمد ربك إن ابنك بخير دلوقتي. وأنا أصلًا مش هقعد في المكان ده ثانية تانية، لأن واضح إن حضرتك مش محتاج مربية، واللي إنت عايزه مش من اختصاصي يا باشا.

قالت كده ومشيت بسرعة عشان تجيب شنطتها.

رياض اتنهد وبص للولد اللي كان بيضحك ويلعب، وبيحاول يلمس وشه ببراءة، وقال:

— مبسوط كده يا تميم باشا؟ طبعًا مبسوط… ولا على بالك أصلًا إيه اللي حصل.

الولد ضحك ببراءة، وكان لسه بيتعلم الكلام، فقال:

— بابا…

رياض اتنهد وقال:

— يا رب… إيه اللي حصل في حياتي من يوم ما قررت أتجوز؟

وراح ورا تقى للأوضة، وفتح الباب من غير استئذان ودخل وقال:

— ممكن نتكلم؟

تقى بصت له بدهشة من طريقته وقالت:

— هو إنت حاطط الأبواب هنا للزينة؟ ما بتخبطش ليه؟ أنا عايزة أفهم.

رياض ضحك وقرب خطوة وقال:

— وأخبط ليه؟ ما أنا داخل عشان نتكلم في موضوع تميم.

تقى اتنهدت بضيق وقالت:

— طيب عايز إيه؟ خلصني.

رياض حط الولد على السرير وبص لها وقال:

— خليكي وما تمشيش. أنا أخيرًا لقيت مربية مناسبة… قصدي، مناسبة لتميم.

تقى بصت له بغيظ وقالت:

— أنا ممكن أكون مناسبة في شغلي، لكن مش هكمل في مكان مش مرتاحة فيه. انسَ الموضوع.

رياض ضحك وقال:

— بيعجبني إنك بتفهمي بسرعة.

تقى قالت بضيق:

— وأنا فهمتك كويس من أول ما دخلت هنا، وعشان كده قررت أمشي.

وبدأت تطلع هدومها من الدولاب، لكنها اتفاجئت لما قرب منها وقال بصوت هادي:

— طب خلينا نتفاهم الأول.

تقى التفتت له بانفعال وقالت:

— واضح إن لزوجتك السابقة أسباب كتير خلتها تسيبك.

رياض اتسعت عينيه بدهشة وقال:

— إنتِ عرفتي منين إنها سايباني؟

تقى ابتسمت بسخرية وقالت:

— واضحة جدًا، وحتى صاحبك قال لك إن مراته هتسيبه زي ما مراتك سابتك.

وبعدين كملت:

— هديك نصيحة: في ناس لازم تحترم حدودها وما تحاولش تضغط عليها. وأنا من الناس دي.

جهزت الشنطة ولسه هتمشي، مسك إيدها بسرعة وقال:

— طب خلاص، خلاص… مش هضايقك تاني، أرجوكي.

تقى أبعدت إيده وقالت:

— ما تلمسنيش. أنا ماشية يعني ماشية.

رياض وقف قدامها واتنهد وقال:

— طيب بلاش عشاني. بصي للطفل المسكين ده. أمه بعيدة عنه من فترة، وأنا مش عارف أتعامل مع كل احتياجاته. اقعدي علشانه، إنتِ شايفة حالته بقت إزاي.

تقى بصت للولد، وكان فعلًا شعره محتاج ترتيب وهدومه محتاجة تغيير، فاتنهدت وقالت:

— بص، أنا هقعد علشان الطفل، هو ملوش ذنب. بس إنت تخليك بعيد عني وما تتدخلش في شغلي.

رياض ابتسم وقال:

— تمام، موافق. بس محتاجين مسافة كبيرة علشان ما تفضليش متوترة مني.

تقى اتنهدت من نظراته وقالت بسرعة:

— تمام، خليك بعيد بقى. يلا اتفضل اطلع خليني أهتم بالولد.

رياض ابتسم وقال:

— طب أجي معاكي؟

تقى قالت بغيظ:

— بره يا رياض بيه.

رياض ضحك وطلع، وهو بيبصلها بطريقة خلتها تتوتر.

تقى بصت له وقالت:

— والله عندها حق… مراتك أكيد تعبت من طريقتك.

وبعد شوية كانت جهزت الولد ولبسته واهتمت بيه، ونزلت معاه.

كان رياض بيتكلم في التليفون وبيقول بضيق:

— يا جودي، عيب عليكي اللي بتعمليه ده. ارجعي البيت، مش كده. أنا قلت لك مش هكرر الموضوع ده تاني.

وسمعها شوية، وبعدها قال:

— طيب يا جودي، حتى علشان ابنك. أنا مش فاهم إزاي قادرة تبعدي عنه كل الفترة دي.

وسمعها شوية، ولسه هيرد، ملقاش أي صوت.

قال:

— جودي؟ جودي؟

وبص للتليفون، ولقاها أنهت المكالمة.

بص لتقى بإحراج وقال:

— الشبكة عندهم ضعيفة قوي. تكوني بتتكلمي والخط يفصل.

تقى ضحكت لأنها فهمت إنها أنهت المكالمة عمدًا، وقالت:

— أممم… فعلًا، الشبكة ملهاش ذنب.

وبعدين أشارت للولد وقالت:

— اتفضل شيل ابنك، بيسأل عنك.

رياض ضم تميم بابتسامة وقال:

— برافو عليكي والله، مروقاه.

وقعد يلاعبه، بينما تقى قعدت قدامه وقالت:

— لو مش هتدخل…