نور محمد

— افتح يا منك ليه! إنتوا عتمنعوني أدخل سراية أبوي؟ جرا إيه يا شوية كلاب، أنا فارس الهواري!

صوت فارس كان جايب آخر الشارع. فجأة، الباب الخشب الكبير بتاع المندرة اتفتح، وخرج منه دياب بخطواته الثابتة، هيبته تخرس أي صوت. كان لابس جلابية صعيدي سودا، وماسك عصايته الأبنوس. شاور للغفرا بإيده، ففتحوا البوابة الحديد شوية عشان فارس يدخل. فارس دخل وهو بينفخ ووشه أحمر من الغيظ:

— عتطردني من بيت أبوي يا دياب؟ وتخلي الغفرا يمنعوني أدخل؟

دياب وقف قدامه، عينيه بتطق شرار، وبصوت هادي بس مرعب قال:

— بيت أبوك ده أنا اللي بانيه طوبة طوبة بتعبي وشقاي، أبوك سابلك أرض بور وديون طالت الرقبة، وأنا اللي سددتها. بيت أبوك ده يلم الرجالة، ميلمش العيال الخاينة اللي متصونش العِرض.

فارس جز على سنانه وصرخ:

— أنا ليا ورث في السرايا دي وفي الأراضي.. وهاخد حقي تالت ومتلت، وهبيع نصيبي للغريب عشان أكسر عينك يا دياب!

دياب ضحك بسخرية لاذعة، ضرب بعصايته على الأرض وقال:

— ورث؟ ورث إيه يابو ورث؟ إنت ناسي إن أبوك قبل ما يموت باعلي كل حاجة بيع وشرا عشان خابر زين إنك صايع وهتضيع شقاه؟ أنا اللي كنت بديك مصروفك يا فارس.. الأراضي والسرايا باسم دياب الهواري.. وكنت سايبك تبرطع فيهم بمزاجي.. بس دلوقتي، مفيش ليك عندي غير مليمين تاخدهم كل شهر عشان متمدش إيدك للناس وتفضحنا.

فارس عينيه وسعت بصدمة، مكنش مصدق إن دياب لسه ماسك كل الخيوط في إيده:

— إنت بتقول إيه؟ يعني أنا مليش حاجة هنا؟ بتطردني عشان خاطر حتة بت يتيمة؟

دياب مسك فارس من ياقة جلابيته فجأة، وقربه منه لدرجة إن فارس شم ريحة الموت في أنفاس دياب:

— جبت سيرتها على لسانك الوسخ ده تاني، هقطعهولك! غزل دي ستك وتاج راسك.. إنت رميت يمينك عليها، يعني مبقيتلكش حاجة، لا هي تخصك ولا السرايا دي تخصك. غور من وشي دلوقتي، روح للغوازي بتوعك، ولم الدور عشان لو لمحت خيالك قريب من السرايا دي، هطخك عيارين أخلص الدنيا منيك.

زقه دياب بعنف، فارس رجع لورا وكاد يقع. بص لدياب بكره وغل ملوش حدود:

— ماشي يا دياب.. ماشي.. أنا هعرف إزاي أحرج قلبك، وورحمة أبوي ما هسيبك تتهنى بيها!

لف فارس وخرج من البوابة، ودياب واقف مكانه، عينه بتتابعه لحد ما اختفى، وهو عارف إن فارس جبان، بس الجبان لما بيتزنق ممكن يغدر.

بليل، السرايا كانت هادية، النور خافت. دياب كان قاعد في مكتبه في المندرة، بيراجع شوية أوراق وحسابات الأراضي اللي باظت في غيابه. الباب خبط بالراحة.

— ادخل.

قالها دياب وهو لسه باصص في الورق. الباب اتفتح، ودخلت غزل. كانت لابسة إسدال أسود بيزيد ملامحها هدوء وحزن، وفي إيدها فنجان قهوة مظبوط زي ما دياب بيحبه دايماً. ريحة القهوة ملت المكان، وخلت دياب يرفع عينه بسرعة. أول ما شافها، ملامحه القاسية لانت لا إرادياً، ساب القلم من إيده وبصلها بصمت.

غزل حطت القهوة على المكتب بخجل، وبصت في الأرض:

— قولت أعملك قهوتك.. خابرة إنك بتحبها من إيدي.

دياب فضل باصصلها ثواني، وبعدين اتكلم بصوت دافي جداً:

— تسلم إيدك يا غزل.. اتفضلي اقعدي، واقفة ليه؟

غزل قعدت على الكرسي اللي قدام المكتب، فركت إيديها بتوتر، وبعدين رفعت عينيها في عينيه بشجاعة:

— أنا جيت أشكرك يا دياب.. على كل اللي عملته عشاني امبارح. لولاك كنت زماني مذلولة ومكسورة الجناح.. إنت رجعتلي كرامتي اللي فارس داس عليها.

دياب شرب شفطة من القهوة، وابتسم ابتسامة خفيفة:

— كرامتك من كرامتي يا غزل.. إنتي متربية في السرايا دي، واسم الهواري شايلك زي ما شايلني. مفيش شكر بيناتنا.

غزل سكتت شوية، بلعت ريقها وبدأت تتكلم في الموضوع اللي واكل عقلها طول اليوم:

— أنا جيت أستأذنك يا دياب.. أنا هقعد هنا لحد ما شهور العدة بتاعتي تخلص.. وبعدها هلم حاجاتي وأروح أشوفلي أي مكان أعيش فيه.. أو أروح عند عمي رضوان.

دياب أول ما سمع كلمة عمي رضوان وأمشي، الفنجان كان هيتكسر في إيده من شدة قبضته. ملامحه اتغيرت ١٨٠ درجة، قام من على كرسيه ببطء، ولف المكتب لحد ما وقف قدامها. غزل رجعت بضهرها لورا بخوف من نظرته.

— تعيدي اللي قولتيه ده تاني إكده؟

صوته كان واطي بس فيه فحيح أفعى مستعدة تلدغ. غزل ارتبكت:

— بقول.. هخلص عدتي.. وأمشي من هنا..

دياب نزل لمستواها، حط إيديه الاتنين على مسند الكرسي اللي هي قاعدة عليه، وحاصرها تماماً. عينيه كانت بتبص جوه عينيها مباشرة:

— تمشي تروحي فين؟ لعمك رضوان اللي رماكي وانتي عيلة صغيرة جوه السرايا ومرضيش يصرف عليكي؟ ولا تروحي تشتغلي خدامة في بيوت البنادر؟

غزل دموعها لمعت في عينيها وردت بقهر:

— أومال أعمل إيه؟ أقعد هنا بصفة إيه يا دياب؟ أنا كنت مرت أخوك.. ودلوقتي طليقته.. السرايا دي مبقتش مكاني.. والناس في البلد عتاكل وشي ووشك لو فضلت هنا.

دياب قرب وشه منها أكتر، لدرجة إنها حست بأنفاسه السخنة على وشها، وقال بكلمات طالعة من أعماق قلبه الملهوف:

— الناس تقفل خشمها، والبلد كلها لو فتحت خشمها أحرجها لهم! إنتي مش طالعة من السرايا دي يا غزل.. مقعدك هنا لحد ما تطلعي على القبر.. السرايا دي بتاعتك، وإنتي ستها ومولاتها.

— بصفة إيه؟!