نظرت له لمار قائلة بشهقة:
– هو إنت نسيت عملت إيه إمبارح؟!
طالعها بإستغراب قائلا:
– عملت إيه؟!
قصت له ما حدث منه من صراخه دون سبب عليها، فهتف بتبرير:
– أنا كنت متعصب ومكنش شايف قدامي، فجات فيها تروح تعيط ومش عارف إيه!
– وهى فين دلوقتى؟!
أشارت بيدها ناحية المطبخ:
– في المطبخ، قالت هتفطر هناك مش عايزة تشوف وشك!
قالت جملتها الأخيرة بضحك، فجز على أسنانه بغيظ قائلا:
– تصدقي وتآمنى بالله؟! هتصدقي إن شاء الله أنا كنت رايح أعتذر، بس بعد الكلمتين دول تتفلق!
قال ذلك ثم وقف واتجه إلى الباب ففتحه وأغلقه خلفه بعنف…
ضحكت خديجة قائلة:
– ربنا يصبرنا على الاتنين دول…
شاركتها الضحك قائلة:
– هههههه عندك حق يا ماما، هو عنيد وهي أعند منه!
خرجت وهي تلوك الطعام بحنق بعدما سمعت حديثه، حيث كانت تسترق السمع، وبعدما سمعت الباب يغلق بعنف فعلمت إنه رحل، فقالت بتذمر:
– وكمان هو اللي غلطان ومش عاجبه؟! يا سلام! مين دي اللي تتفلق إن شاء الله؟!
ضحكت خديجة عالياً قائلة بمرح:
– هو إنتي كنتي بتتصنتى ولا إيه؟!
هتفت بتوتر:
– ها.. لا.. لا طبعاً.. بس هو كان صوته عالي فسمعته، وهوريه ابنك دة…
قالت ذلك ثم دلفت مرة أخرى تفش غيظها في الطعام، وجلستا خديجة لمار بعد أن ضربت كفاً بآخر على تصرفاتهما وأكملا طعامهما.
في الصباح في القسم، كان مصطفى وسليم يقفان إلى جوار المحامي، فهتف مصطفى بقلق:
– متأكد يا متر من اللي بتقوله؟!
هتف المحامى بتأكيد:
– صدقني القضية لصالحنا، لأن والدك عضو في مجلس الشعب ومعاه حصانة، وبكرة لما يتعرض على النيابة هتتأكد من دة، أنا هدخل للظابط دلوقتى وهشوف الوضع إيه.
تنهد قائلا:
– ماشي يا متر…
جلس مصطفى وسليم يهزان قدميهما بعصبية في إنتظار خروج والده والمحامي…
بعد مرور ساعتين، خرج المحامي ووالده برفقة اثنين من العساكر، فهرعوا ناحيته بسرعة. هتف مصطفى:
– بابا، عامل إيه؟! إنت كويس؟!
إبتسم نصف إبتسامة قائلا:
– متقلقيش يا ابني، أنا كويس.
نظر له سليم بتمنى قائلا:
– إن شاء الله هتطلع من هنا يا بابا.
تنهد قائلا:
– إن شاء الله يا ابني، يلا دلوقتى روحوا على أشغالكم وطمنوني على الجماعة في البيت كويسين.
إبتسم له مصطفى قائلا:
– كويسين يا بابا، ناقص بس وجودك.
– إن شاء الله شدة وتزول…
هتف إحدى العساكر بأخذه إلى المكان المحتجز فيه فأذعنوا لطلبه، وبعد رحيل والده وقفوا مع المحامي يتابعون ما حدث بالداخل فطمأنهم إنه سيخرج وأن لا يقلقوا…
وبعد مدة رحلوا من القسم.
وصلت أمينة لمنزل عمر وطرقت الباب وإنتظرت حتى يأتي أحد ويفتح لها الباب.
بالداخل، كانت خديجة تسير ناحية المطبخ ولكنها تراجعت حينما سمعت الباب يطرق فذهبت لترى من على الباب. فتحت الباب ونظرت لها بصدمة ممزوجة ببعض العتاب والغضب…
هتفت أمينة بمرح:
– إيه يا خديجة؟! هتوقفيني على الباب كتير؟!
إنتبهت لها وأفسحت لها الطريق قائلة بإقتضاب:
– إتفضلي يا أمينة.
دلفت معها للداخل ثم جلستا في الصالون، وإلتزمن الصمت لوقت؛ فأمينة تشعر بالخجل من أفعال ابنها ولكنها لن تتراجع عما جاءت من أجله، وخديجة التي تشعر بالحزن الشديد على ما عانته إبنتها على يد مراد.
قطعت أمينة الصمت حينما هتفت لتلطيف الأجواء:
– إزيكم، عاملين إيه يا حبيبتي؟!
هتفت بضيق واضح:
– الحمد لله كويسين.
جزت على أسنانها بغيظ فهي تعلمها جيدا كما تعلم أيضاً أن الطريق طويل وعليها بالصبر، فهتفت:
– بصي يا خديجة، أنا مش جاية أدافع عن ابني قصادك، بس حطي نفسك مكانه؛ واحد أبوه أقتل وبيدور زي المجنون على أي خيط يوصله للقضية، ولما لقاه كانت بنته! متخيلة يبقى قدامك أي حد ولو حتى قريب اللي قتل زوجك، هتعملي إيه؟! غصب عنه عمل كدة، وأنا والله كنت بحميها على قد ما أقدر من غضبه من غير ما أعرف إنها بنتك وإنها بنت الراجل اللي قتل زوجي الله يرحمه! قوليلي هتعملي إيه لو كنتي مكانه؟!
نظرت لها بعتاب قائلة:
– وهو دة بردو يصح يضربها ويهينها؟! من أمتا وإحنا مربينهم على كدة؟!
– يشهد ربنا إن مراد معزته من معزة عمر ابني، إحنا ربناهم سوى…
ثم أكملت بدموع متساقطة:
– بس مقهورة على بنتي اللي إتعذبت وعمرها ما شافت يوم عدل، مقهورة على عياطها وأنا مش جنبها، كل ما كانت تعانى ومتقلقش حد معاها، مقهورة على سنين عمرها اللي قضتها بعيد عني، مقهورة على إنها ما عشتش زي أي بنت في سنها، بنتي عاشت سن أكبر من سنها! وكل ما أشوفها قلبي بيتقطع عليها، دة أنا قبل ما أنام بروح أوضتها أتأكد إنها فعلا موجودة ولا لا، أنا لحد دلوقتى مش مصدقة إنها رجعتلي تاني يا أمينة! نفسي أعمل كل حاجة تبسطها وتسعدها ومشوفهاش مطفية كدة…
قالت كلماتها الأخيرة ثم وضعت كلتا يديها على وجهها وأخذت تبكي.
إقتربت منها أمينة وأخذت تهدئها قائلة بدموع:
– وعهد ربنا يا خديجة ما هتشوف غير الهنا والفرح بإذن الله، إحنا كلنا هنبقى جنبها ومعاها ومش هنسيبها أبداً، بس إهدي وبطلي عياط علشان متشوفكيش بالشكل دة.
كفكفت دموعها قائلة:
– عندك حق، مش لازم تشوفني كدة.
هتفت أمينة بمرح:
– قومي بقى ناديلى مرات ابني أسلم عليها.
نظرت لها بتحذير قائلة:
– أمينة..!
ضحكت قائلة:
– إيه؟! مش مرات ابني؟ تقدري تنكري دة؟!
جزت على أسنانها بغيظ قائلة:
– أنا عارفة مش هاخد منك لا حق ولا باطل، إنتي وابنك اللي عاوز الضرب بس أشوفه…!
قهقهت عالياً قائلة:
– ماشي يا ستى، هجيبهولك لحد عندك وأعملي فيه ما بدالك.. روحي بقى نادي لمار أشوفها…
وقفت بإستسلام قائلة:
– حاضر يا أمينة، حاضر.
قالت ذلك ثم دلفت لغرفة ابنتها التي كانت برفقة سجود تتسامران وتضحكان سوياً.
إنتبهن لها فقالت لمار بمرح وهي تضحك:
– تعالى يا ماما حوشي بنت أخوكى دي عني، ههههه بطني وجعتني من كتر الضحك!
نظرت لها حب قائلة:
– يارب ديماً يا حبيبتي أشوفك مبسوطة وسعيدة كدة…
ثم حمحمت قبل أن تقول لمار:
– حماتك برة عاوزة تشوفك.
نظرت لها بصدمة قائلة:
– حماتى؟! إنت قصدك خالتي أمينة؟!
اومأت مؤكدة:
– أيوة، هي ومسنيَاكي برة عاوزة تشوفك…
نهضت من مكانها قائلة:
– ماشي يا ماما، روحي إنتي وأنا هسبق حضرتك…
نهضت سجود هي الأخرى قائلة:
– وأنا هروح أعملكم حاجة تشربوها…
خرجت لمار وذهبت لها التي بمجرد أن رأتها وقفت على الفور وأضحتها بسعادة قائلة:
– إزيك يا حبيبتي، عاملة إيه؟! وحشتيني…
ثم نظرت لها قائلة بعتاب:
– كدة متسأليش عليا الوقت دة كله؟!
نظرت لها بخجل قائلة:
– الحمد لله كويسة، وأخبارك إنتي إيه وتسنيم وحبيبة؟!
هتفت بسعادة:
– كله تمام يا حبيبتي، قوليلي أخبار النونو إيه؟!
وضعت يدها على بطنها تتحسسها بحنان قائلة:
– الحمد لله كويس…
أخذت بيدها وأجلستها إلى جوارها قائلة:
– طيب تعالى اقعدي جنبي، أصلك وحشتيني أوي.
هتفت بإبتسامة صغيرة:
– وإنتي كمان وحشتيني…
سألتها بخبث:
– أنا بس متأكدة؟!
زاغت أنظارها وتلون وجهها خجلاً قائلة:
– أااا.. تقصدي إيه؟!
– أيوة، إنتي وحبيبة وتسنيم.
هتفت دون وعي منها:
– أه.. وحشتني بردو…
وما إن أدركت ما تفوهت به، شهقت بصدمة ووضعت يداها على فمها قائلة بتذمر:
– يووووه! إنتي بتلعبي بيا…!
ضحكت عالياً وهي تقول:
– لا يا حبيبتي، ما عاش ولا كان اللي يلعب بيكي!
ثم نظرت لخديجة قائلة:
– إيه يا خديجة، مش هتشربينا حاجة ولا إيه؟!
