في فيلا حامد الداغر، كانت ورد بالصالة الواسعة تبحث عن زوجة عمها إلى أن وجدتها فذهبت إليها قائلة بتردد:
– مرات عمى، كنت عاوزة.. عاوزة.. يعني…
إنتبهت لها قائلة بحنان:
– أيوا يا حبيبتي، عاوزة إيه؟
– كنت عاوزة أكلم سميحة بنت خالي أصلها وحشتني أوي، وأنا.. مش.. مش معايا تليفون، لو أمكن حضرتك تديني تليفونك وهكلمها وهجبولك علطول والله…
– ماشي يا حبيبتي مفيش مشكلة، ومن بكرة هخلي سليم يجيبلك أحلى تليفون…
هتفت بتسرع:
– سليم لا!.. أقصد يعني هخلي ندى تجيبلي أو مصطفى…
– ماشي يا ستي، خدى التليفون أهو…
– شكراً يا مرات عمى…
أخذت منها الهاتف وخرجت للحديقة بالخارج وجلست في مكان منعزل نوعاً ما واتصلت عليها في انتظار ردها.
أتاها صوت سميحة قائلة:
ألو، مين معايا؟
زمت شفتيها قائلة بعبوس:
– إخص عليكي يا سوسو، لحقتى تنسيني؟!
هتفت بفرح:
– ورد حبيبتي! عاملة إيه؟ وحشتيني أوي.
أردفَت بدموع:
– وإنتي كمان وحشتيني أوي، محتجالك أوي يا سميحة…
تساءلت بقلق:
– ليه مالك يا روحي؟ فيكي إيه؟
هتفت ببكاء:
– سليم.. سليم بيزعقلي ومش طايقلي كلمة.. بيكرهني يا سميحة، بيكرهني!
– إهدى بس، إهدى وفهميني كدة بالراحة…
أخذت تقص عليها كل مواقفه معها، وبعد أن انتهت، هتفت سميحة بود:
– حبيبتي، بصي هقولك نصيحة، الطريقة اللي عرفوا بيها إنك بنت عمهم وشروط بابا عشان تيجي عندهم دة كله خلاه ياخد فكرة مش كويسة عنك، علشان كدة إديه فرصة يفهمك، وإنتي كمان قربي منه شوية بشوية، الحجر يلين…
هتفت بغيظ:
– بقولك متجوز ومش بيعتبرني مراته ومش بيطيقني، تقوليلى قربي منه؟! عاوزة تجننيني إنتي؟! والله لولا الحوجة لكنت جيت عندكم وسيبتهم يولع بالقصر بتاعه دة! تعرفي يا سميحة إن لو ساكنة في قصر بس مش حاسة فيه بالدفى يبقى ملهوش لازمة من الأساس.. وحشتني قاعدتنا سوى…
– إيه رأيك تيجي عندينا تقعديلك كام يوم؟
قالت بتردد:
– هبقى أشوف يا سميحة، هبقى أشوف.. عاملة إيه في مذاكرتك؟
– تمام التمام، إدعيلى الإمتحانات قربت…
– ربنا معاكي يا حبيبتي، عاوزة تقدير حلو زى كل سنة!
– هههههه علم وينفذ يا فندم…
– طيب هقفل معاكي علشان أودى التليفون لمرات عمي، يلا سلام…
– سلام يا حبيبتي…
أغلقت الهاتف ووضعته في جيبها، وأخذت تتجول قليلاً في الحديقة وبعدها قررت الذهاب إلى الداخل، غافلة عن تلك الأعين التي تتابعها بخبث.
طرقت لمار الباب قبل أن تدلف، وعندما سمعت ندائه بالدخول دلفت وهي ترتجف خوفاً، ظناً منها إنه يظن أنها إفتعلت كل ذلك. وضعت الطعام على الطاولة وهمت بالذهاب إلا أن صوته أوقفها حينما قال:
– إستنى عندك…
وقفت بهلع منتظرة توبيخه لها كالعادة.
سألها بجمود:
– عاوزة أفهم إيه اللي حصل تحت؟
وقفت لمار بضعف قائلة:
– أنا مليش دعوة، عاوز تصدق صدق، مش عاوز دي حاجة ترجعلك…
أمسكه من رسغها بقوة قائلا:
– والله وطلعلك ضوافر يا بت عابدين! بس بسيطة أقصهالك، لما كلميني تكلمي عدل فاهمة؟!
إنفجرت فيه بغضب وأخذت تضربه بقبضتيها الصغيرة على صدره قائلة:
– حرام عليك.. حرام! كفاية، أنا تعبت منك ومن أبويا وأخويا ومن أهلك ومن الدنيا دي كلها! رجعنى لحياتي قبل ما أشوفك، منك لله شوهت سمعتي وإنت ولا على بالك ولا همك، ما طبعاً أنا بنت عابدين المجرم اللي لازم تنتقم منها وتطلع عينها، بس أحب أقولك مبروك يا حضرة الظابط، إنتقامك ماشي زى ما إنت عاوز، يا ريت تكون مبسوط.. يا ريت.. تك…
سقطت على صدره مغشياً عليها قبل أن تكتمل كلماتها!
أحكم قبضته حولها يمنعها من السقوط أرضاً، ثم حملها ووضعها على السرير وأحضر قنينة العطر ووضعها أمام أنفها ولكنها لم تفق، فذهب مسرعاً يستدعي والدته.
وصل إلى غرفة والدته وطرق الباب ثم دلف قائلا:
– ماما، تعالى شوفي البت اللي فوق دي مالها، مش راضية تفوق…
أردفت بقلق:
– ليه؟ عملت فيها إيه؟
هتف بغيظ:
– يعني هيكون عملت إيه يا أمي؟! دي جابتلى العشا من هنا وقامت واقعة من هنا علطول…
– طيب تعالى ورايا أما نشوف…
وصلت أمينة إلى جناح ولدها ثم دلفت إلى الداخل ووجدت لمار مسطحة على الفراش.
– جربت البرفان؟
– أيوة جربته بس ما صحيتش.
– طيب ناولهوني أجرب تاني كدة…
بعد محاولة أخرى من أمينة، استيقظت لمار التي ما إن وجدت نفسها على فراشه أخذت تتأكد من وضعية ملابسها ثم جلست نصف جلسة.
– إنتي كويسة يا حبيبتي؟
هتفت لمار بخفوت:
– أيوة.. أنا.. أنا مش عارفة ليه وقعت، آسفة تعبت حضرتك…
– قومي معايا طيب ترتاحى في أوضتك…
أسندتها أمينة لتذهب إلى غرفتها تحت نظرات مراد الحانقة.
دلف عمر إلى الشقة بوقت متأخر فصدم حينما رأى والدته تغفو على أحد المقاعد في انتظاره، فهرول ناحيتها ظناً منه أنها أصيبت بنوبة سكر وهو غير موجود بالمنزل، فندم بكثرة على تأخره. جلس قبالتها وأخذ يهزها برفق قائلا بصوت منخفض:
– ماما.. ماما…
نهضت خديجة قائلة:
– إنت جيت يا حبيبي؟
زفر براحة ورد بحنان:
– أيوة يا أمي، إيه اللي منيمك هنا بس؟ قومي يلا روحى أوضتك وكملي نومك، خضتيني عليكى يا أمي كنت فاكر جاتلك النوبة وأنا مش موجود.
– بعد الشر عنك، ماشي يا حبيبي تصبح على خير.
– وإنت من أهل الخير يا أمي…
دلف عمر واستلقى على الفراش يفكر في تلك المشكلة التي حلت عليه.
صباحاً، استيقظت لمار وهي تشعر بالدوار، وفجأة شعرت بالغثيان فركضت إلى الحمام، وبعد فترة خرجت وهي تشعر بالصدمة والضياع، فكل تلك الأعراض أعراض حمل! أخذت تضرب بقبضتها على الحائط قائلة بدموع:
– يا مصيبتي.. يا مصيبتي! أعمل إيه وأتصرف إزاى؟ هقولهم إيه دول؟! ما هيصدقوا وخصوصاً البت الباردة دي! منك لله، حرام عليك اللي بتعمله فيا دة منك لله…
ثم هتفت بذعر:
– لا لا لا، محدش هيعرف وأنا هحاول أهرب من هنا، لازم أهرب دة هيَموتني لو عرف.. يا رب خليك معايا والنبي أنا مليش غيرك…
ثم جلست على السرير تواصل بكائها، قاطعها دلوف أمينة التي ما إن رأتْها ارتبكت للغاية. تقدمت أمينة منها وجلست جوارها قائلة:
– أخبارك إيه دلوقتى؟ بقيتي أحسن؟
ردت بتوتر:
– أه.. أه أنا كويسة جداً، شكراً…
نظرت لها بشك قائلة:
– مش باين إنك كويسة، وشك أصفر ودبلان كدة، أجيبلك دكتور؟
سقط قلبها من بين يديها قائلة بسرعة:
– لا لا، قصدي مفيش داعي يعني…
سألتها بشك:
– متأكدة؟
هتفت بنبرة حاولت أن تظهر طبيعية:
– أيوة، هما بس شوية تعب هيروحوا لوحدهم…
– طيب خليكي اليوم في سريرك ما تتحركيش…
وافقت بضعف:
– حاضر…
جحظت عينا لمار ونزل عليها السؤال كالصاعقة:
– هو إنتي وقعتي من طولك ليه إمبارح بالليل؟
هتفت بتأتأة:
– مش.. مش عارفة، يمكن علشان اللي حصل لما…
أصدرت شهقة دليل على انخراطها في نوبة بكاء. ربتت أمينة على ظهرها قائلة:
– متزعليش، هما كدة دايما متسرعين بيحكموا قبل ما يفهموا…
هتفت بمرارة:
– عادية يعني، هي جت عليهم؟!
هتفت بصدق:
– أنا واثقة إنك لا يمكن تعملي حاجة غلط…
خفق قلبها بعنف شديد جراء كلماتها، فماذا سيكون رد فعلها إن علمت أنها تحمل في أحشائها قطعة من ابنها حتى وإن كان ذلك بالرغم عنها؟
ردت بإمتنان:
– شكراً.. بس إنتي غريبة الصراحة يعني أقصد في معاملتك ليا…
هتفت بمرح جديد عليها:
– مش مرات ابني؟
صدمت لمار للغاية فقالت:
– نعم؟! تقصدي إيه؟! مراته إزاى يعني؟! إنتي واعية اللي بتقوليه؟! يووووه أنا آسفة بس.. بس…
ضحكت أمينة بقوة قائلة:
– ههههه فاهماكي عاوزة تقولي إيه، أنا عاوزاكي متزعليش من مراد مهما يعمل معاكي، هو طيب وحنين بس حكاية موت أبوه دي حولته لشخص قاسي مابيرحمش، بس الخوف اللي شفته في عينه إمبارح لما جه يقولى إنك أغمى عليكي خلاني أعيد حساباتي، شكله كدة وقع ولا حد سمى عليه!
سألتها بغباء وعدم تصديق:
– يعني إيه حضرتك؟
أجابت بوضوح:
– يعني هو بدأ يتعلق بيكي دة إذا ما كانش إتعلق…
إحمرت للغاية جراء كلماتها تلك فقالت:
– حضرتك إيه الكلام دة؟! دة ما بيكرهش حد قدي…
شردت قليلاً قبل أن تهتف:
– دي بقى سيبيها للأيام.. هسيبك ترتاحى وهبعت حد يجيبلك الفطار…
تركتها أمينة وهي ما زالت على صدمتها.
في شقة عمر، كانت خديجة تعد وجبة الإفطار لعمر ليذهب بسرعة للعمل. خرج عمر مرتدياً ملابسه استعداداً للذهاب إلى العمل فألقى تحية الصباح على والدته:
– صباح الفل يا ست الكل.
ردت إليه التحية بوجه بشوش قائلة بحنان:
– صباح الفل يا حبيبي، إقعد إفطر على ما أنادي بنت خالك تفطر معانا.
هتف بغيظ:
– وليه السيرة دي على الصبح؟
نظرت له بعتاب قائلة:
– إحنا قولنا إيه؟
جز على أسنانه قائلا:
– حاضر يا ماما، حاضر…
– يحضرلك الخير يا حبيبي…
دلفت خديجة إلى الغرفة الإضافية التي تمكث فيها سجود قائلة:
– يلا يا سجود علشان تفطري معانا.
سجود بخجل:
– أااس.. بس.. أنا مش جعانة…
أخذت بيدها تحثها على الخروج قائلة:
– يا سلام! قومي بس يلا وبطلي كسوف، إنتي في بيت عمتك مش حد غريب.
ذهبت معها بخجل شديد منهم، فهي غير معتادة عليهم وخصوصاً عمر. في الصالة أتت وألقت التحية بخفوت عليه فردها بإقتضاب. جلست سجود إلى جوار خديجة، نظر لها عمر بكره واحتقار شديدين. وضعت أمامها الطعام تقربه إليها قائلة:
– يلا كلي يا سجود، مش كل شوية هقولك اعملي إيه وما تعمليش إيه…
سجود بخفوت:
– حاضر…
نظر عمر لها بغيظ وكره ثم وقف قائلاً محدثاً والدته:
– الحمد لله أنا شبعت يا ماما، سلام دلوقتى علشان ما أتأخرش.
– ماشي يا حبيبي، في رعاية الله.
نظرت سجود لأثره قائلة:
– هو أنا وجودي مضايقه؟! لو متضايق همشي…
خديجة بتوتر:
– أبدا يا حبيبتي، أبدا، دة بس هو متعود يمشي بدري.. كلي.. كلي…
تابعت إفطارها وهي تفكر في نظراته لها والتي تدل على الكره الدفين.
كانت ورد تسير بشرود، وفجأة اصطدمت بحائط صلب! تأوهت بخفوت وتراجعت ونظرت له وجدته سليم فقالت بإرتباك:
– إمم.. أنا.. أنا آسفة…
رد ببرود:
– عديني.. عديني بس مش فاضيلك…
تخطاها سليم، أما هي إغتاظت بشدة منه وأكملت سيرها حتى وصلت لندى. هتفت ندى بنبرة مازحة حينما رأت ورد وعلامات الغضب مرسومة على وجهها:
– يا ساتر يا رب! مال وشك أحمر كدة ليه؟
غمزتها بمرح قائلة:
– إيه هو سليم قالك حاجة تكسف ولا إيه؟
إغتاظت ورد منها فقالت بحنق:
– بقولك إيه يا ندى، مش ناقصة هي، خليكي ساكتة.. البارد.. البارد! آااه عاوزة أضربه أو.. أو أعضه!
صرخت بفزع حينما أتاها صوت من خلفها قائلا:
– أديني أهو قدامك، يلا وريني إزاي هاضربيني أو هتعضيني زي ما بتقولي!
تراجعت ورد بصدمة وذعر قائلة:
– أاااااا.. مممم مش.. مش إنت، قصدي سليم الصغير، مش إنت كدة يا ندى؟
ندى بضحك مكتوم:
– أه.. أه طبعا…
نظرت له ببلاهة ثم هتفت:
– شوفت؟!
رد بهدوء:
– إممم ماشي، هعديها بمزاجي، بس حاسبي على كلامك لإن المرة الجاية مش هعديها…
غادر سليم، أما ورد…
جلست بإهمال على المقعد، فضحكت ندى بشدة قائلة:
– هههههه منظرك يفطس يا ورد، مش قادرة…
صرخت في وجهها قائلة:
– ندى اسكتي لحسن أضربك إنتي!
وقفت ندى وحملت الصغير قائلة:
– لا وعلى إيه، أنا أخد ابني المسكين دة ونطلع فوق أحسن…
تركتها ندى، أما هي فأخذت تغلى من الغضب، فنظرت حولها لتجد شيئاً تنفس به غضبها، فوجدت كوباً به ماء فمسكته وألقته بكل قوتها فتناثر الزجاج على الأرض. ثم وضعت رأسها بين يديها وأخذت تبكي.
رأت رأسها حينما سمعت صوتاً ساخراً يقول:
– تؤ تؤ تؤ.. كدة بردو تعملي كدة؟!
تقدمت ميس منها وجلست إلى جوارها قائلة بخبث:
– مضايقة علشان سليم مش معبرك يا حرام؟ راحت عليكي!
سألتها ورد بصدمة:
– إنتي.. إنتي بتقولي إيه؟!
هتفت بخبث:
– أقصد إنك هتموتي عليه وبتحبيه بس هو مش معبرك، مش عيب عليكي تحبي راجل متجوز؟! ويا ترى بتخططي إزاى تاخديه مني؟
هتفت بدموع وصدمة:
– لا لا لا أبداً أنا.. أنا مش عاوزة أخده منك ولا عاوزة حاجة…
صاحت في وجهها قائلة:
– كدابة! أنا سمعتك إمبارح في التليفون وإنتي بتقولي كدة، تخيلي بقا لو الكل عرف إنك بتلوفي على جوزي، شوفي منظرك هيبقى إيه يا تربية الحواري، يعني مش جديدة عليكي!
أصابها الذعر فهتفت بسرعة:
– لا لا، ما تقوليش لحد!
ميس بخبث:
– يبقى خلاص.. تبعدي عننا أنا وسليم.
هتفت بصوت خافت:
– حاضر…
نظرت ميس للكوب المحطم ثم هتفت بأسف:
– أوبس! شوفي وسختي المكان إزاى بالإزاز اللي كسرتیه، يا ريت تنضفي دة…
جلست ورد أرضاً تلملم الزجاج بعيون ممتلئة بالدموع. شهقت بألم حينما إنغرزت إحدى الزجاجات في يدها، ولكنها لم تبال مقارنة بالشرخ الموجود في قلبها!
وقفت ميس تتابع ذلك ببرود وتشفي وتبتسم ابتسامة نصر، فيبدو إنها ستتسلى كثيراً.
