في مقر الشرطة، وفي مكتب مراد الذي يجلس متصفحاً الأوراق التي أمامه قائلا:
– جاتلنا أخبار النهاردة عن تسليم شحنة مخدرات وأسلحة في ميناء بورسعيد، لازم نمشى دلوقتى علشان نوصل ونظبط مع القيادات اللي هناك.. مش عارف ليه حاسس إن الكلب دة معاهم هو وابنه.
هتف عمر بأمل:
– يارب، علشان نخلص منه ومن اللي زيه.
لاحظ مراد ضيقه فسأله قائلا:
– مالك النهاردة مبوز ومش في المود؟
هتف بمرحه المعتاد ولكنه مغلف بالضيق:
– المود بقا دود، أووووف…
هتف مراد بإستنكار:
– لا، الحكاية شكلها كبيرة.
رد بضيق:
– إمبارح بالليل جاتلنا بنت خالي الواطي…
ثم قص عليه كل شيء، فقال مراد:
– بس كدة؟! دة اللي مضايقك؟
هتف بصدمة:
– ودى حاجة متضايقش بردو؟! دة أنا الود ودي أخنقها وأرقدها جنب أبوها! لا واللى يغيظك أمي بتعاملها معاملة ملوكي ولا كأنها بنتها…
– خلاص، إرضى بالأمر الواقع طالما هي مسامحة، خلاص.
هتف بتوعد:
– بس أنا لا مش مسامح، وحق أمي هعرف أجيبه كويس.. إن ما طلعته على عينيها مبقاش أنا!
– طيب يلا علشان متأخرش على المهمة.
– ماشي يا سيدي يلا…
في شقة ممدوح، يجلس إلى جوار زوجته. هتفت منيرة بغضب وحسرة:
– قعدت تقول مشروع ومش عارفة إيه، والواد ضحك عليك وأخد الفلوس!
ضغط على رأسه يدلكها قائلا:
– بقولك إيه، سيبيني في حالي دلوقتى مش ناقصة هي!
إعترضت قائلة:
– لا يا حبيبي، الفلوس دي بتاعتنة إحنا الاثنين، ومرة تانية لما تجي تتصرف يبقى تاخد رأيي.
هتف بإبتسامة لا توحي بالخير قائلة:
– يا ستى متقلقيش، الحنفية اللي بنجيب منها الفلوس موجودة.
سألته بترقب:
– تقصد بنت أختك؟
ثم قالت بحقد شديد:
– أه، بنت الـ…! زمانها متنعمة ومتنغنغة في الفلوس وسايبانا هنا بنغسل ونكنس ونمسح.. إيه رأيك نروحلها زيارة كلنا؟ أهو بردو علشان ما يقولوش ما صدقنا رميناها، وبردو نقرص على ودنها ونشوف عاوزين إيه ونخليها تعمله.
وافقها الرأى قائلا:
– عندك حق، خلاص إحنا نروحلها على النهاردة بالليل.
هتفت بفرح:
– كويس أوي، وأنا هروح أقول لسميحة دي هتفرح أوي وما هتمصدق…
نهض من مجلسه قائلا:
– تمام، روحى بلغيها وأنا هنزل على القهوة شوية.
دلفت منيرة إلى غرفة سميحة قائلة:
– بت يا سميحة، إجهزي النهاردة معانا مشوار بالليل…
سميحة بمبالاة:
– على فين العزم إن شاء الله؟
هتفت ببساطة:
– عند ورد.
هتفت سميحة بصدمة وفرح:
– صحيح يا أما هنروح لورد؟! الله حلو أوي، دي وحشتني أوي…
منيرة بغيظ:
– إبسطي يا أختي أدينا رايحين لها، هسيبك تذاكرى لليل.
في حي الإسكندرية، وفي مكتب المعلم خميس يجلس أمامه ناصر منكس الرأس. هتف خميس بعدم رضا قائلا:
– شوف بقا يا ناصر، اللي أوله شرط آخره نور، ومن قدم سبت لقى الأحد.. أنا دفعت كل الديون اللي عليك في مقابل إني تجوزك أختك، بس لا مؤاخذة هربت وطفشت ومحدش عارف هي فين ولا هربت مع مين!
جز على أسنانه بغضب قائلا:
– كلام إيه دة يا معلم؟! متنساش إنها أختى بردو، مش هسمحلك تغلط فيها.
نظر له بسخرية قائلا بتهديد:
– طيب شوف بقا يا عم الحمش، هما كلمتين ورد غطاهم، لو متجوزتش أختك في ظرف إسبوعين هودي الوصولات بتاعتك للنيابة، وعليا وعلى أعدائي!
هتف بصدمة:
– هي بقت كدة يا معلم؟! مكنش العشم!
أجابه ساخرا:
– أومال إنت فاكر إني بعمل كدة علشان سواد عيونك؟!
نهض ناصر بغضب قائلا:
– ماشي يا معلم، يبقالنا كلام تاني!
خرج من مكتب المعلم خميس وهو لا يرى أمامه من الغضب، فشغله الشاغل الآن كيف سيجدها وأين؟ فكر قليلاً ثم واتته فكرة فذهب لينفذها لعلها تأتي بها…
وصل إلى منزل أسماء جارتهم التي تكون صديقة شقيقته وتكن له الحب، أما هو فلا يعترف بتلك الأشياء ولكنه سرعان ما ابتسم بمكر فسوف يستفيد من حبها له. طرق الباب وانتظر لثوان قليلة حتى فتح الباب…
ارتبكت هي فور رؤيته وصدمت من وجوده فقالت بنبرة مهتزة:
– أااا.. ناصر؟! خير، في حاجة؟
إصطنع الهدوء ونظر في عينيها مباشرة مما جعلها ترتبك، فابتسم بخبث لنجاح مخططه فهو يؤثر عليها وبشدة. تنحنح مردفا:
– خير يا أسماء، أنا كنت جاي أسالك على سجود، متعرفيش راحت فين؟
توترت فأخذت توزع نظراتها بين الأرض والباب متجنبة النظر في عينيه قائلة:
– أنا.. أنا ما أعرفش عنها حاجة.
هتف بحزن مصطنع:
– كدة بردو يا أسماء وأنا متعشم فيكي؟! متخافيش أنا مش هأذيها…
ثم أكمل بخبث:
– أصل أنا فوقت، كلامها فوقني ولازم أكون أخ وسند ليها، أنا خلاص صرفت نظر عن جوازها من المعلم خميس.. بس يا عالم هي فين دلوقتى؟! يا ترى هي فين؟
نفسي أحضنها وأقولها آسف بس هي فين؟ فين؟ قلبي وجعني عليها.
إبتسم بخفاء حينما رسُمت على وجهها ملامح العبوس والحزن لحزنه، فسألها بترج:
– قوليلى هي فين أرجوكي يا أسماء.
– هي.. هي قالتلي ما أقولش لحد.
مال بجذعه عليها فتراجعت بصدمة، فقال:
– هو أنا بردو حد؟! أنا أخوها صدقيني أنا إتغيرت.
إرتجفت أوصالها من قربه المهلك هذا فقالت:
– طيب.. طيب إستنى هجيبلك العنوان، هي كلمتنى النهاردة من شوية.
غمز بعينه قائلا بمرح وخبث:
– ماشي يا قمر، روحى هاتيه وأنا هستنى.
أما هي فأحمرت وجنتيها وركضت بسرعة إلى الداخل تهرب من نظراته غير المعتادة عليها تلك.
أما هو هتف بسخرية:
– هه، غبية وهبلة.. سهلت المهمة عليا.
غابت لدقائق ثم عادت له بورقة مدتها له قائلة:
– إتفضل، العنوان أهو.
إلتقط الورقة وإبتسم قائلا:
– من إيد ما نعدمها يا قمر.
وردت وجنتيها ونظرت ولم تجب. إبتسم الآخر قائلا بتحذير خفى:
– بس بقولك إيه، متقوليلهاش حاجة، عاوز أعملها مفاجأة.
هزت رأسها بإيجاب قائلة:
– حاضر.
تركها ورحل وعلى وجهه إبتسامة ماكرة، أما هي فدلت إلى الداخل بإبتسامة هائمة به عشقاً.
ليلا في فيلا حامد الداغر، دلف ممدوح وزوجته وابنته. رحبت بهم صفاء بود:
– أهلا وسهلا بيكم نورتو، ثواني هادي ورد خبر بإنكم هنا دي هتفرح أوي.
تركتهم وصعدت للأعلى، أما منيرة فهتفت بحقد وهي تضغط على شفتيها بغيظ:
– بقى الزفتة دي عايشة في الهلومة دي كلها؟! آه يا ناري آه…
زفرت سميحة بضيق قائلة:
– يا أما قولي ما شاء الله…
قوست شفتيها بعدم رضا ولم ترد عليها، أما ممدوح كان ينتظر قدومها على أحر من الجمر وبداخله يغلى كالبركان؛ كيف تتركها هكذا دون أن يحصل عليها؟! فعزم في قرارة نفسه أن يجد خطة أخرى تجعله يتمكن منها.
بالأعلى، كانت ورد في غرفتها مع ندى والصغير يتسامرن سوياً. كانت ورد تحمل سليم الذي على حين غرة شدها بقوة من شعرها فصرخت صرخة مكتومة قائلة بعبوس:
– آه.. تعالي يا ندى خدى ابنك.
تناولته منها ضاحكة قائلة:
– هاتيه، هههه شكله عاجبه شعرك الحلو دة.
ذمت شفتيها قائلة:
– لا، دة غيران من شعري علشان كدة شدني منه.
ضحكت ندى عالياً على كلامها الطفولي ذلك. صمتوا حينما طرقت صفاء الباب ودلفت قائلة بإبتسامة:
– ورد حبيبتي، قرايبك جوة تحت عاوزين يشوفوكى.
توقفت عن الضحك قائلة بغرابة:
– قرايبي؟! قرايبي مين؟!
– خالك ومراته وبنته.
مسكت بيد ندى تمتد منها العون، فعندما سمعت خبر وجود خالها بالأسفل دب الخوف بقلبها، فوقفت قائلة:
– طيب ماشي، هنزل أهو.
أحست ندى بخوفها وأن هناك شيئاً تخفيه. أحجبت حجابها على رأسها ثم نزلت بخطوات مرتعشة، ولكنها إبتسمت حينما علمت أن سميحة بالأسفل، وبمجرد أن إنتهت درجات السلم ورأتها، ركضت الفتيات نحو بعضهن وعانقن بعضهن بشدة…
هتفت سميحة وهي تتشبث بها أكثر:
– وحشتينى أوي يا ورد.
ضحكت من قلبها فقد إفتقدت الابتسامة منذ أن أتت إلى ذلك القصر الذي يتسم بالكآبة، حمدت الله كثيراً أنه يوجد ندى وزوجة عمها.
– وإنتي وحشتينى أكتر، إزيك وإزى المذاكرة؟
– كله تمام وتحت السيطرة.
– يارب ديماً…
ثم تقدمت بخطوات حذرة تجاه خالها وزوجته قائلة:
– إزيك يا مرات خالى، إزيك يا خالى.
مصمصت منيرة بعدم رضا قائلة:
– أهلاً يا أختي.
مد يده ليصافحها فتفاجأت من حركاته تلك، ولكنها مدت يدها كي لا يشكوا بالأمر. وعندما وضعت يدها في يده التي إبتلعتها، قام بالضغط عليها بطريقة أثارت الاشمئزاز بداخلها منه وأخذ يتفحصها بدنائة كعادته، فسحبتها بصعوبة منه ثم جلست بجانب سميحة تتوارى من نظراته الوقحة تلك.
نظر لها خالها بغيظ وعدم رضا قائلا:
– جرى إيه يا روح أمك؟! قاعدة في العز هنا لوحدك من غير ما تفتكرينا بحاجة! هو دة اللي إتفقنا عليه يا أختي؟!
نظرت يميناً ويساراً لعلها تجد أحداً فقالت بقلق:
– خالي براحة، لحد يسمعك.
– مايهمنيش! إحنا لقيناكى إتأخرتي في تنفيذك قلنا نجي نحذرك ونديكى إنذار…
ترقرق الدمع في عينيها قائلة:
– بس يا خالي ماينفعش.
هتف بغيظ مكتوم قائلا:
– لا لا.. شكل القعدة هنا نسيتك اللي هيحصل فيكي يا حلوة!
ثم تابع بتهديد:
– شوفي يا حلوة كدة، لو منفذتيش اللي قلنا عليه…
ثم صمت ونظر إليها بنظرات موحية عرفتها على الفور فأكمل قائلا:
– إنتي عارفة هيحصل إيه، وهعرف أجيبك لو قاعدة في بطن الحوت!
هتفت بخوف منه:
– آا.. حاضر يا خالي، بس إفرض هما مرضوش أعمل إيه؟!
– ساعتها تقوليلهم هشتكيكم في المحاكم ومش هسيب حقّي.
أغمضت عينيها بألم قائلة:
– حاضر يا خالي.. حاضر.
– كدة تبقي بنت أختي بصحيح.
دلف حامد وأبنائه الذين ما إن رأوه إستشاطوا غضباً…
هتف سليم بغيظ:
– إنت إيه اللي جابك هنا يا راجل إنت؟!
نهره حامد قائلا:
– سليم، اسكت.. ثم وجه حديثه بضيق لممدوح قائلا:
– أهلاً وسهلاً بيكوا.
– إزيك يا حامد بيه؟ يارب تكون بخير، ما تأخذناش جينا نشوف ورد أصل سميحة وأمها وحشينها أوي.
زفر بضيق قائلا:
– خلاص إنت هتحكى تاريخ حياتك؟! هسيبكم براحتكم، يلا يا ولاد.
نظر سليم لورد بغيظ ثم جز على أسنانه، ود لو يصفعها هي وخالها ولكنه تمالك نفسه بصعوبة ثم رحل خلف والده وأخيه.
همست سميحة في أذن ورد قائلة:
– يا لهوي! دة.. دة عامل زي هولاكو لما زعق!
هتفت بنفس الهمس:
– اسكتي أنا مش عارفة أتلايم على نفسي، ركبي سابت.
قهقهت سميحة عالياً مما استرعى انتباه والديها، فعندما شعرت أنها موضع مراقبة صمتت وحمحمت بخجل.
هتفت والدتها بضيق قائلة:
– ما ضحكينا معاكي يا ست سميحة بدل قعدتنا دي! ناس معندهاش ذوق سابوكينا لوحدنا، دة حتى ماضيفوناش بحاجة، شكلهم بخلة!
وما إن انتهت من كلامها حتى دلفت الخادمة وهي تحمل صينية محملة بالعصائر والكيك ووضعتها أمامهم ثم رحلت…
قوست شفتيها بسخرية قائلة وهي تتناول كوب العصير ترتشف منه:
– فيهم الخير والله، وجايين على نفسهم ومكلفين!
– يا أما اشربي العصير وكفاية كلام ملوش لازمة.
ردت بإمتعاض:
– حاضر يا أختي.. حاضر.
في تلك الأثناء نزلت صفاء ورحبت بهم مرة أخرى ثم جلست معهم…
هتفت منيرة بود مصطنع قائلة:
– مكنش له لزوم التعب دة، عصير ومش عارفة إيه.
– لا تعب ولا حاجة إحنا أهل بردو.
هتفت ورد بهدوء:
– ممكن أخد سميحة معايا في الاوضة فوق؟
هتفت صفاء بحنان:
– أه طبعاً يا حبيبتي، روحى ومتقلقيش هقعد هنا معاهم.
صعدت ورد برفقة سميحة إلى الأعلى يتسامران، وظلت صفاء مع خالها وزوجته، وبعد مرور الوقت غادروا إلى المنزل…
في الموانئ ليلا، توجد سفينة كبيرة محملة بالأسلحة والمخدرات ومجموعة من الرجال تحملها من السفينة إلى السيارات بسرعة.
تقدم هادى من عابدين وسأله:
– أخبار الشغل إيه يا عابدين؟
أردف بثقة:
– إطمن يا باشا، كله تمام خلاص الرجالة قربوا ينقلوها كلها.
ربت على كتفه قائلا:
– هايل.. هايل يا رجالة، هروح أدي نظرة للرجالة.
– تمام يا باشا…
على الجانب الآخر، كانت الشرطة تراقب الوضع بدقة. هتف عمر قائلا:
– إيه هنهجم دلوقتى ولا…
رد مراد وهو يمسك بالمنظار يراقب هؤلاء العناصر عن قرب:
– بلغ الأفراد يستعدوا.
وضع عمر جهاز اللاسلكى قبالة فمه وأبلغ باقي الضباط والعساكر بالاستعداد والتحرك عند سماع إشارة أخرى منهم…
بعد لحظات، تقدم الضباط والعساكر من العناصر الإجرامية، ومن ثم انطلق وابل من الرصاص من قبل الطرفين، وتم الإيقاع ببعض المجرمين مع سقوط القتلى هنا وهناك مع هروب من استطاع الهروب.
عندما وجد محسن الوضع متأزماً ولا سبيل للهروب سوى البحر، ققفز فيه مسرعاً في محاولة منه للهروب…
إستمرت المعركة قرابة الساعتين بالنصر لصالح الشرطة، وقبضوا على المجرمين وصادروا الأسلحة والمخدرات للمعاينة.
بعد لحظات، وصلت عربة الشرطة أمام مديرية الأمن ونزل مراد والبقية.
بعد لحظات بالداخل، كان مراد يتصبب عرقاً من جراء ضربه لعابدين الضرب الشديد حيث لم تظهر معالم وجهه. مسكه من تلابيب قميصه قائلا بغضب:
– والله ووقعت يا عابدين أخيراً! دة أنا هشرب من دمك، فين ابنك الخسيس؟ فينه؟!
ثم إنهال عليه بالضرب بعنف مرة أخرى ثم وضع يديه حول عنقه لينهي حياته فقد أعماه الغضب، أما الأخير فكان يلفظ أنفاسه الأخيرة.
دلف عمر وصدم عندما وجد مراد على وشك أن يقتله فركض نحوه وأبعده بقوة صائحاً:
– إنت إتجننت؟! عاوز تضيع نفسك ومستقبلك؟! إهدى كدة وإعقل…
هتف بمرارة:
– سيبني يا عمر.. سيبني أقتله وأخد حق أبويا منه.
وقف قبالته يمنعه من الوصول إليه قائلا بإشفاق:
– حقك هتاخده بالقانون، إهدى بس إنت كدة واستغفر ربنا.
زفر مراد ومسح بيده على وجهه قاىلاً:
– خده من قدامي يا عمر، علشان لو فضل أكتر من كدة هقتله.
ساعد عمر عابدين في النهوض ثم أخذه وسلمه للعسكري الذي ذهب إلى الحجز…
ثم عاد مرة أخرى ليري مراد وهو يهتف بمرح بعد أن قفز على الأريكة وتمدد عليها:
– آه يا أنا يا أما، عظمي إتكسر كله.. آه بالحق! إلحق اتصل على الجماعة في البيت طمنهم، على ما أتصل بأمى أطمنها أنا كمان.
في شقة عمر بالزمالك، تجلس خديجة بقلق شديد وإلى جوارها سجود. هتفت في محاولة لطمئنتها:
– خلاص يا عمتو إن شاء الله خير وهيجي دلوقتى.
– يارب جبولي بالسلامة.
وما إن انتهت من جملتها اهتز الهاتف على الطاولة فسريعا إلتقطته ونظرت للمتصل فإبتسمت وفتحت المكالمة ووضعتها على أذنها قائلة بلهفة:
– أيوا يا حبيبي إنت كويس؟!
– متقلقيش يا حبيبتي، أنا في مهمة وخلصتها وراجع بكرة إن شاء الله.
– إن شاء الله يا حبيبي، خلي بالك من نفسك.
هتف بمرحه المعتاد:
– حاضر، هخلي بالى من نفسي وهغسل سناني وهنام بدري.
– هههههه يا واد بطل…
– ماشي يا أمي، يلا سلام دلوقتى.
– سلام.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
