في الصباح، في شقة محمود بالإسكندرية:
كانت سجود تجلس على السرير متكورة ترتدي الأسود ودموعها تتساقط على والدها الحبيب.
إنتفضت من مكانها حينما دفش ناصر الباب داخلا كالإعصار قائلا بغضب:
– مش كفاية نواح بقاله إسبوع ميت يا بت فقر صحيح؟! أنا صبرت عليكي كتير، النهاردة المعلم خميس هيكتب كتابه عليكي وتغوري معاه وما تورينيش وشك تاني…
صرخت ببكاء قائلة:
– حرام عليك! إتقي ربنا، أنا أختك مش حد غريب علشان تعمل فيا كدة؟! طيب يا أخي إحترم الراجل اللي لسه ميت دة!
– بقولك إيه، مش ناقصة خوتة دماغ هي كلمة ومش هتنيها، إبق إقلعي الزفت الأسود دة وإلبسيلك أي هدمة عدلة.. هسيبك تجهزي بالليل…
غادر ناصر وترك سجود تعاني وحدها فقالت ببكاء:
– حرام عليك يا ناصر، حرام عليك.. بس لا.. لا مش هسيبك تنفذ اللي في دماغك.. أنا لازم أتصرف.. لازم…
في فيلا حامد الداغر، كان الجميع على طاولة الإفطار عدا سليم وميس.
– مصطفى خلص بسرعة ورايا شغل كتير النهاردة.
– حاضر يا بابا، وراك علطول…
تحدثت هايدي بغنج قائلة:
– إستناني يا مصطفى خدني معاك الشركة.
– حاضر يا هايدي بس بسرعة، هروح أسخن العربية…
نظرت لها ندى بغيظ قائلة بخفوت:
– جاتك البلا في شكلك اللي يقرف دة…
همست ورد بجوار أذنها قائلة:
– هدي نفسك يا روحي لتحصلك حاجة…
– ورد، عاوزة أحكيلك حاجة وعاوزة أخد رأيك فيها.. بس بعد الفطار…
– ماشي يا حبيبتي مفيش مشاكل…
توقفوا حينما نزلت ميس تتمايل بخطواتها من على السلم وتبعها سليم، ألقوا التحية عليهم ثم انضموا إليهم.
هتفت ندى بإبتسامة:
– صباحية مباركة يا عرايس…
ردت بدلال:
– الله يبارك فيكي يا ندى.. أومال فين طنط صفاء؟
– فوق في أوضتها أصلها صايمة النهاردة…
– اه…
ثم نظرت لورد التي ما إن رأتهم وضعت عيناها بالطبق بعد أن إمتلأت بالدموع.
نظرت ميس لورد بإستغراب قائلة:
– مين دي يا سليم؟
أجابها ببرود:
– بنت عمي…
هتفت بصدمة:
– بنت عمك؟! من إمتى دة؟
– دي حكاية طويلة هبقى أقولك عليها بعدين…
– إممممم ماشي يا بيبي.. إيه هي هتفضل ساكتة كدة كتير مسمعناش صوتها يعني.. هو إنتي إسمك إيه؟
ردت بتماسك:
– ورد.. إسمي ورد…
– إممممم ورد مش بطال.. هو إنتي بتدرسي ولا خلصتي؟
– لا ما بدرسش…
– يبقى مخلصة، واخدة كلية إيه؟
– واخدة الإعدادية…
ميس بصدمة وسرعان ما انقلبت إلى الضحك:
– هههههه مش معقول! إنتي بتتهزري ولا بتكلمي جد؟!
تذمرت قائلة:
– مكيش دعوة وما تضحكيش عليا تاني…
صرخ فيها بغضب قائلا:
– بت إنتي! إحترمى نفسك وتكلمي عدل…
هتفت بدموع:
– هي اللي غلطت الأول…
عند مراتي وخط أحمر سامعة؟!
لم ترد عليه ورد وذهبت مسرعة إلى غرفتها.
هتف بغيظ:
– تربية حواري صحيح…
نظرت ميس في إثرها بشماتة قائلة:
– خلاص يا بيبي ما تزعلش نفسك عيلة وغلطت…
كانت ندى قد طفح الكيل منهم فقامت قائلة بغيظ:
– عن إذنكم، هروح أطمن على سليم…
في فيلا فريد المنشاوي، وفي غرفة مراد، إستيقظ ووجد لمار تغفو هذه المرة على المصلية. ضحك بإستهزاء عليها ثم نهض وتقدم منها ثم هزها بقدمه بقوة قائلا:
– إنتي.. إنتي يا زفتة قومي فزي…
إنتفضت لمار حينما رأته، ثم وقفت تقول وهي تنظر أرضاً:
– أيوة.. أنا آسفة نمت ومخدتش بالي والله، إنت جيت متأخر بالله عليك ما تضربني…
صاح بغضب:
– غوري جهزيلي الحمام وبعدين إنزلي إعملي الفطار…
ركضت بسرعة قائلة:
– حاضر.. حاضر، أنا رايحة أهو…
ذهبت لمار لتنفذ ما قاله ثم نزلت لتحضر له وجبة الإفطار. بالأسفل كانت ترتعد وهي تحضر له الطعام. صرخت بألم حينما إنغرزت السكين في إصبعها، ولكنها لم تعط لتلك الدماء التي تنزف منها أهمية، فخوفها منه أهم من أي شيء.
بعد دقائق، إنتهت من إعداد الطعام ثم توجهت للجناح الخاص به. كانت ممسكة بالصينية التي عليها الطعام بيد واحدة والأخرى تضمها إلى ملابسها تحاول كتم الدماء.
وجدتْه خرج من الحمام وأرتدى ملابسه ويجلس على الأريكة. تقدمت منه ووضعت الطعام أمامه قائلة بضعف:
– الفطار أهو.. أنا.. أنا همشي…
أوقفها صوته قائلا:
– إستنى…
هتفت في محاولة أن تخفى ألمها:
– نعم؟ في حاجة تاني؟
– وريني إيدك…
نظرت له ببلاهة قائلة:
– ها…
هتف بصرامة:
– ها إيه؟! بقولك هاتي إيدك…
تلجلجت قائلة:
– آاا.. مفيش داعي، أنا كويسة…
سحب يدها ونظر إليها بصدمة قائلا:
– إنتي متخلفة؟! إزاي متحملاه دة؟!
أجابته بدموع:
– خفت منك لتزعقلي…
– غبية.. غبية! إستنى هنا متتحركيش…
ذهب إلى الحمام ثم أحضر علبة الإسعافات، ثم عاد وسحبها مرة أخرى فجلست على الأريكة وجلس إلى جوارها يعقم لها الجرح. شهقت بألم حينما وضع المطهر على إصبعها، فقال:
– إستحملي شوية…
أومأت بخفوت حتى انتهى، فقالت:
– شكراً لحضرتك…
هتف بصرامة محذراً إياها:
– إبقى خلي بالك يا هانم المرة الجاية.. إنزلي تحت دلوقتى مش عاوز أشوف وشك.
– حاضر…
كانت هناك أعين تراقبها قائلة بغل:
– لا، الحكاية دي ما يتسكتش عليها أكتر من كدة!
حل الليل سريعاً في الإسكندرية، كان المعلم خميس برفقة المأذون كما اتفقا. أبلغ المأذون ناصر بإحضار موافقة العروس، وافق ناصر على مضض وذهب ليحضرها.
دلف ناصر لغرفة سجود ولكنه لم يجدها، إلتف هنا وهناك فوجد ورقة مطوية ففتحها وقرأها:
“أنا آسفة يا ناصر بس إنت مسبتليش حل تاني، متدورش عليا لأنك مش هتلاقيني…”
طوى الورقة بعنف شديد وبرزت عروقه من شدة الغضب قائلا:
– ورحمة أمي ما أنا سايبك يا بت الـ..! هاقول للمعلم إيه دلوقتى بقى بتصغريني قدامه؟! ماشي.. ماشي يا سجود…
خرج ناصر وعلامات الغضب مرتسمة على وجهه، فسارع خميس متسائلا:
– إيه يا ناصر؟ مجبتهاش ليه معاك؟
– سجود مش هنا يا معلم، هربت وما أعرفش راحت فين!
صاح بغضب:
– نعم؟! إنت هتهزر ولا إيه؟! يعني إيه هربت؟! تقلب توطغس تجيبهالي مليش فيه!
– متقلقش يا معلم، هلاقيها وهجبهالك راكعة تحت رجلك، وهشربلك من دمها وهقطع جلدها نساير نساير بس ألاقيها الأول…
– لما نشوف يا ناصر، بالإذن…
قبل ذلك بساعات، في القطار المتوجه من الإسكندرية إلى القاهرة، كانت سجود تجلس في أحد العربات مرتدية النقاب حتى لا يتعرف عليها أحد، ودموعها تتسلل شيئاً فشيئاً. أرجعت رأسها للخلف وراحت تتذكر أبيها وحنانه الشديد معها فهو دائما يحميها، ولكنه رحل فمن سيحميها الآن؟! شعرت بالتوجس من ردة فعل عمتها التي لم تعلم بوجودها منذ أيام قليلة.
فاقت من شرودها حينما توقف القطار معلناً وصوله القاهرة. نزلت منه وصعدت في إحدى سيارات الأجرة منطلقة إلى منزل عمتها.
في شقة عمر بالزمالك، كانا يتناولان وجبة العشاء وسط مزاح عمر المعتاد، قاطعهم رنين الجرس. وضعت يدها موضع قلبها قائلة بقلق:
– يا ساتر يارب! مين اللي مش راضى يشيل إيده من على الجرس دة؟
نهض سائراً نحو الباب يقول:
– خليكي يا ماما، أنا هروح أشوف مين…
توجه عمر وفتح الباب فوجد فتاة جميلة متوسطة القامة بيضاء ذات عينين رمادية كوالدته، ذات رداء أسود…
هتف بإستغراب فهو أول مرة يراها في عمارته السكنية:
– أيوا يا آنسة، عاوزة مين؟
وقبل أن تجيب، أظلمت الدنيا عند سجود فوقعت أرضاً.
نظر لها بصدمة قائلا وهو يميل إلى مستواها:
– يا آنسة! إنتي.. يوووه، إيه المصائب دي يا ربي؟! ربنا يستر…
قال ذلك ثم قام بحملها ودلف إلى الداخل مغلقاً الباب بقدمه.
شهقت خديجة عندما رأت عمر يحمل فتاة ما:
– يا مصيبتي! مين دي يا عمر؟ ها؟! دي مراتك مش كدة؟ علشان كدة كل ما أقولك إتجوز تصرف نظر.. رد عليا أنا هكلم نفسي كتير؟!
زفر بضيق قائلا وهو ما زال يحمل سجود:
– مستنيكي تخلصي الفيلم الهندى ده يا أمي.. مرات مين وزفت مين؟! أنا أول مرة أشوفها دلوقتى، قوام خليتيها مراتى ومش عارف إيه!
– طيب تعالي دخلها أوضتي على ما أفوقها…
دلف بها إلى غرفة والدته ثم مددها على السرير قائلا:
– أنا طالع دلوقتى يا أمي، فكيلها الحجاب علشان تتنفس كويس، وحاولى تفوقيها بالبرفان ولو ما فقتش أنا برة…
خرج عمر، وفكت لها حجابها ونظرت لها مطولاً بشك، ثم أحضرت قنينة العطر ثم وضعتها على أنفها وبعد عدة محاولات رمشت بعينيها ثم فتحتها لتجد خديجة أمامها فتراجعت للخلف بخوف قائلة:
– أنا فين وإنتي مين؟
– إهدى يا حبيبتي إهدى متخافيش، هو المفروض أنا اللي أسألك إنتي كنتي تخبطي على بابنا فإنتي اللي مين وجاية ليه؟
لم تعرف بما تجيبها فلم تجد غير البكاء، إحتضنتها خديجة وربتت على ظهرها بحنو قائلة:
– خلاص يا بنتي إهدى.. بطلى عياط…
سجود بهدوء وبدون وعي:
– شكراً يا عمتو…
خديجة بصدمة مبتعدة عنها:
– عمتو؟! يبقى إحساسي ما خيبش! إنتي بنته؟! بنت محمود مش كدة؟!
– أيوة يا عمتو.. بس والله بابا ندمان و…
قاطعتها بصرامة قائلة:
– بس.. بس مش عاوزة أسمع حاجة، متتكلميش.. أنا هسيبك ترتاحى دلوقتى وهطلع لإبني…
هتفت ببكاء تترجاها:
– إستنى لو سمحتي…
نظرت لها خديجة بإستفهام، فأخرجت سجود ورقة وأعطتها لها قائلة:
– بابا الله يرحمه باعتلك الورقة دي، يا ريت تقريها…
خديجة بشهقة مصدومة مصحوبة بدموع:
– مات محمود؟! مات؟! إنا لله وإنا إليه راجعون…
مدت يدها وأخذت الورقة وجلست إلى جوارها تقرأ الكلمات الموجودة في الورقة وسط دموعها المنسابة بشدة على وجنتيها، وبعد أن انتهت إنفجرت في موجة بكاء عالية.
نهضت سجود ووضعت حجابها على رأسها وتوجهت لها قائلة:
– خلاص يا عمتو أنا آسفة مش قصدي أزعلك والله، طيب بصي أنا همشي ومش هخليكي تشوفى وشى تاني بس بلاش تبكي علشان خاطري…
سحبتها خديجة وعانقتها بقوة، فبادلتها الأخرى العناق وأيضاً البكاء.
بالخارج، قلق عمر فاقترب من غرفة والدته فسمع صوت بكاء والدته، فقلق بشدة وفتح الباب دون استئذان فصدم مما رآه.
عمر بخفوت:
– هو دة إيه أصله دة كمان؟!
تقدم منهم محدثاً صوت كي ينتبهوا له.
إبتعدت سجود من عمتها ونظرت أرضاً بخجل شديد، أما هو حدث أمه قائلا:
– ماما، مالكيش فيكي إيه؟ بتعيطي ليه؟
أجابته وهي تمسح عبراتها قائلة:
– مفيش.. مفيش حاجة يا عمر…
– أومال المناحة اللي إنتوا عاملينها دي إيه ها؟
نهضت خديجة ساحبة عمر في طريقها للخروج من الغرفة قائلة:
– تعالى معايا يا عمر أنا هفهمك، وإنتي يا سجود خدي راحتك البيت بيتك يا بنتي…
خرج عمر معها في حالة صدمة وذهول مما يسمع.
في فيلا فريد الألفي، إنتهزت زينة وجود الجميع لتجلس بجوار أمينة قائلة بخبث:
– أنا عاوزة أقولك حاجة يا مرات عمى، وكويس إنكم متجمعين هنا…
نظرت لها أمينة بإهتمام قائلة:
– خير يا زينة؟
هتفت بخبث:
– الهانم اللي إنتي بتحامى عليها بتستغفلك ولايفة على إبنك من وراكي، والله أعلم بتعمل إيه تاني! أنا شوفتها بتتسحب في نصاص الليالي وبتروح أوضته، ولو مش مصدقانى أسأليها وإسألي إبنك كمان…
نظرت لها بصدمة قائلة:
– كلام إيه دة يا زينة؟!
ربتت تسنيم على ظهرها بهدوء قائلة:
– إهدي يا ماما لحد ما نفهم الموضوع…
– ما تتكلمي يا مرات عمي…
هتفت فاطمة بشماتة:
– أنا هناديها وهنسألها دلوقتي ونعرف.. إنتي يا زفتة يا اللي إسمك لمار.. لمار! إنتي يا بت!
أتت لمار تركض إليهم فوجدتهم جميعاً فخجلت ونظرت أرضاً قائلة:
– نعم حضرتك؟
– إسأليها يا أمينة مستنية إيه ها؟ ولا أسألها أنا؟
– إنتي يا بت بتروحى أوضة مراد في نصاص الليالي بتعملي إيه ها؟
نظرت لها بصدمة وكأن دلواً من الماء إنسكب عليها، فبماذا ستجيب؟!
هزتها فاطمة بعنف قائلة:
– ما تردي يا هانم يا قليلة التربية! ما طبعاً تربية المجرمين هتطلع إيه؟!
إنسابت دموعها بغزارة، فماذا ستخبرهم وهل سيصدقونها؟!
تقدمت زينة منها بغل وقامت بصفعها قائلة:
– يا مجرمة عاوزة تضيعيه مننا زي ما ضيعتوا أبوه؟!
كادت أن تصفعها مرة أخرى إلا إنها وجدت يد قوية ممسكة بها، فهدر بغضب قائلا:
– إنتي إزاي تعملي كدة؟!
إبتلعت ريقها قائلة بخوف من منظره:
– آاا.. البت دي قللت أدبها وإحنا بنربيها…
هتفت فاطمة بسخرية:
– ما هي مش لوحدها الغلطانة، الحق على اللي فتحلها السكة وسابها تسوق فيها…
– إنتوا بتتكلموا عن إيه؟ ممكن توضحي تقصدي إيه بكلامك؟
هتفت فاطمة بغيظ:
– بنقصد على الهانم اللي غوتك وضحكت عليك وبتجيلك الأوضة في نصاص الليالي…
مراد ببرود متابعاً إنهيار لمار، قائلا بصدمة مصطنعة:
– إنتي بتقولى إيه؟ مين دة اللي بيجي؟
أردف زينة بسرعة:
– أنا شوفتها إمبارح! إيه بتدافع عنها؟! ضحكت عليك إنت كمان!
نظر لها بغضب قائلا:
– أقسم بالله لولا عمي لكنت عرفتك على الكلام اللي بتقوليه دة كويس!
صاحت زوجة عمه قائلة:
– يعني إيه؟! نسيبك إنت والهانم تعملوا ما بدالكم وتشوهوا سمعة العيلة؟!
هتف بهدوء:
– أنا لا في حد بيجينى ولا حاجة، ولو شافتها طبيعي لإنها مراتي بتعمل أى حاجة أنا محتاجها، ومش محتاج أبرر أكتر من كدة لحد…
نهرته والدته قائلة:
– وأنا مش قولتلك ملكش دعوة بيها؟!
– أمي من فضلك، دي واحدة مجرمة وأنا عارف كويس بعمل إيه، ومتقلقيش قريب أوي هتسمعى أخبار كويسة…
ثم وجه نظره لمار قائلا:
– وإنتي يا بتاعة، خمس دقايق وألاقي العشا جاهز…
ما إن سمعت كلماته إنصرفت فوراً لإعداد ما يريد.
في غرفة عمر، صاح قائلا:
– إنتي بتقولي إيه يا ماما؟! إنتي واعية للى إنتي بتقوليه دة؟! البت دي تطلع برة مشوفش خلقتها هنا…
عاتبته قائلة:
– ولد! عيب إحترم نفسك، إيه هتككسر كلامى ولا إيه؟
– أنا آسف يا ماما، بس إزاي عاوزانى أقبل ببنت الراجل دة هنا إزاي؟! إنتي ناسية اللي عمله؟! روحي أطرديها علشان تدوقيه من نفس الكاس…
– عمر! دي مهما كان خالك، ودة واحد ميت يعني متجوزش إلا الرحمة عليه…
أردف بعدم تصديق:
– هي عملتلك غسيل مخ جوة ولا إيه؟! ولا خأل عليكى محن البنات دة؟!
أجابته بحزم:
– عمر، دي بقت أمانة في رقبتي دلوقتى والموضوع مفروغ منه خلاص…
إعترض قائلا:
– يعني إيه؟! دي هتفضل هنا إن شاء الله؟!
– أيوا يا عمر، هتفضل هنا…
هتف بغضب دفين:
– ماشي يا أمي.. ماشي! بس يكون في علمك أنا مش هسكت على الوضع دة كتير…
قال ذلك ثم خرج من الغرفة ومن الشقة بأكملها.
تنهدت خديجة قائلة:
– ربنا يستر في اللي جاي…
