— إنت بتقول إيه يا واكل ناسك؟ رديت مين يا خسيس؟
صوت دياب مكنش عالي، بس كان فيه فحيح يخوف أتخن شنب في الصعيد. فارس بلع ريقه وحاول يستقوى، رفع راسه وقال بصوت مهزوز:
— رديت مرتي! طلقتها في ساعة غضب، والشرع بيقول في الطلقة الأولى يحق للراجل يرد مرته في شهور العدة من غير رضاها حتى.. والمأذون اللي كتب ورقة الطلاق هو اللي سجل الردة الصبح بدري.. غزل لساتها حرم فارس الهواري.. ومفيش راجل على وش الأرض يقدر ياخدها مني، لا إنت ولا غيرك!
رضوان ضحك بصوت عالي وفرك إيديه:
— إكده الحديت اتغير يا دياب بيه.. المرة طلعت على ذمة راجلها، وإنت راجل خابر الأصول وعارف إن لحم أخوك ميحلش ليك طول ما هو على عصمته.. يلا يا رجالة نتدلى إحنا.. مبروك يا فارس بيه، عرفت تحافظ على حرمتك.
رضوان لسه بيلف ضهره عشان يمشي، لقى دياب رمى عصايته على الأرض، وبحركة خاطفة، أسرع من لمح البصر، هجم على فارس، مسكه من رقبته وخنقه لدرجة إن فارس اترفع عن الأرض شبر.
— هتطلقها بالتلاتة يا فارس.. دلوقتي، قدام الرجالة دي كلها.. وإلا ورب الكعبة ما هخلي فيك عضم سليم وهخلي البلد كلها تمشي في جنازتك قبل ما الشمس تغيب!
فارس وشه جاب ألوان، بيحاول يتنفس مش قادر، بيخبط على دراع دياب المفتول زي الحديد، بس عينيه كانت بتلمع بشماتة وخبث. بصعوبة بالغة، قدر يخرج كلمات متقطعة وهو بيبتسم بشيطانية:
— أطلقها؟.. أومال.. مالي.. بس.. الطلاق ده.. ليه تمن.. وتمنه غالي قوي يا خوي!
دياب خفف قبضته سنة صغيرة عشان يسمعه، وقال بوعيد:
— تمن إيه يا كلب الفلوس والنسوان؟
فارس أخد نفس عميق وهو بيكح، وبصله بتحدي:
— تتنازلي عن نص أراضي الهواري اللي إنت واكل حقي فيها، والسرايا دي تنكتب باسمي بيع وشرا.. ساعتها بس، هرميلك عليها التلاتة، وتاخدها مبروك عليك.. إنما قبل إكده، فهي مرتي وحقي.. ولو منعتها عني، هجيبلك البوليس وأعملها محضر وأفضحكم في بنادر قنا كلها وأقول العمدة خاطف مرات أخوه!
الكلمة كانت لسه بتتردد في الجو، وصرخة غزل شقت سكون السرايا. خرجت من ورا الباب، بتجري زي المجنونة، دموعها مغرقة وشها، ووقفت بين دياب وفارس، بتبص لفارس باشمئزاز وكره ملوش حدود:
— لا يا دياب! اوعى توافق على كلامه المر ده! أنا مستحيل أكون للكلب ده تاني، ومستحيل أخليه ياخد شقاك وتعبك ومالك بسببي.. أنا هقتل روحي قبل ما أرجعله أو أخليه يكسرك!
دياب شد غزل من دراعها، ورجعها ورا ضهره بسرعة، وكأنه بيخبيها من نظراتهم الملوثة. صرخ فيها بغضب مخلوط بخوف عليها:
— ادخلي جوه يا غزل! قولتلك ميت مرة متطلعيش ورجلك واقف! كلامك معايا أنا مش مع الأشكال دي!
فارس ضحك بصوت مستفز، وعدل ياقة جلابيته اللي اتكرمشت:
— شايف يا دياب؟ مرتي وبتعصاني قدامي. بس معلش، بكرة لما ترجع هربيها من أول وجديد وأعلمها إزاي توطي صوتها.
الكلمة دي كانت الشعرة اللي قطمت ضهر البعير. دياب ملامحه اتجمدت تماماً، الهدوء اللي نزل عليه فجأة كان أرعب من الغضب. مد إيده بهدوء شديد لورا ضهره، وسحب سلاحه الشخصي، سحب الأجزاء بصوت رن في ودن كل الموجودين، وحط الفوهة الباردة بين عيون فارس مباشرة. الغفرا صرخوا ورجعوا لورا، ورضوان اترعش مكانه. فارس نفسه الضحكة اختفت من على وشه، وحس ببرودة الموت بتسري في عروقه.
دياب اتكلم بصوت هامس، تقيل، وكأنه بيقرأ قرار إعدام:
— أنا مش هكتبلك فدان واحد.. ومش هطلقها منك.. إنت عارف أنا هعمل إيه؟ أنا هرمّلها يا فارس! هخليها أرملة فارس الهواري، وساعتها العدة هتبقى أربع شهور وعشر أيام، تخلص وأتجوزها برضك وأنا رافع راسي.. بس إنت هتكون بتاكل دود في قبرك!
فارس جسمه كله انتفض. عيون دياب مكنش فيها أي ذرة تردد، عيون قاتل قرر ينهي المأساة دي للأبد.
— إنت هتقتل أخوك يا دياب؟ عشان مرة هتقتل دمك ولحمك؟ هتدخل حبل المشنقة برجليك عشانها؟
قالها فارس بصوت بيرتجف من الرعب. دياب ابتسم ببرود:
— إنت اللي استرخصت الدم وجللت من الأصل يوم ما خنت وعايرت.. قرايتك للفاتحة معايا خلصت يا فارس. قدامك لتلات أيام.. يا تجيبلي ورقة طلاقها بالتلاتة هنا في السرايا.. يا ورب الكعبة، لألبسها الأسود عليك وأشرب قهوتك في المندرة دي! غور من وشي دلوقتي قبل ما الشيطان يغلبني وأفرغ الرصاص ديه في نافوخك!
زقه دياب بفوهة السلاح، فارس اتكعبل ووقع على ضهره، قام يجرجري وهو بيبص لدياب برعب وحقد، وطلع يجري بره البوابة، ووراه رضوان والرجالة اللي معاه هربوا زي الفيران المذعورة.
جوه المندرة، الصمت كان تقيل، بيقطعه بس صوت شهقات غزل اللي كانت قاعدة على الكرسي، دفنة وشها في إيديها وبتعيط بانهيار. دياب دخل، رمى سلاحه على المكتب، وقفل الباب وراه بالمفتاح. قعد على الكرسي اللي قصادها، وفضل باصصلها شوية، قلبه بيتقطع على كل دمعة بتنزل منها.
غزل رفعت وشها الغرقان بالدموع، وبصتله بعتاب وقهر:
— ليه يا دياب؟ ليه بتدخل روحك في الدم والخراب ده؟ سيبني أمشي.. سيبني أغور من وشكم كلكم.. أنا طاقة شؤم عليك وعلى السرايا.. ده أخوك من لحمك ودمك، هتعاديه وتقتله وتشيل ذنبه عشاني؟ أنا مسواش كل ده! سيبه ياخدني، هو راجلي شرعاً، وأنا هعرف إزاي أخلص منه بمعرفتي حتى لو شربت السم!
دياب قام من مكانه بسرعة، قرب منها ومسك كتافها الاتنين بحزم شديد، هزها بخفة عشان تفوق:
— إياكي أسمعك بتجيبي سيرة الموت على لسانك ديه تاني! تسوي يا غزل.. تسوي عمري كله. إنتي متعرفيش قيمتك عندي شكلها إيه. إنتي مش طاقة شؤم، إنتي النور اللي كان غايب عن السرايا وعن القلب ده سنين طوال. فارس مش أخوي.. فارس شيطان لابس توب بني آدم، ولو متجصجصتش ريشه دلوقتي، هيتمادى ويدوس على الكل.
غزل مسكت في جلابيته بقوة، وهي بتبكي أكتر:
