— بس السرايا والأراضي يا دياب.. دول شقاك وعمرك.. إنت تعبت فيهم ياما، سهرت وشقيت عشان تكبر اسم الهواري، مستحيل تسبهمله عشاني. أنا بت غفير، حتة لحمة رخيصة، حقي أضيع وتدوسني الأيام، لكن إنت كبير النجع، لا مينفعش تضيع تعبك.
دياب حط إيده على شفايفها يمنعها تكمل كلامها. لمسته كانت دافية، خلت رعشة تسري في جسمها كله. بصلها بعيون مليانة عشق متخزن من سنين، واتكلم بصوت دافي دوب كل خوفها:
— أوششش.. مسمعش كلمة بت غفير دي تاني أبداً.. إنتي ست البنات، وتاج راسي، وست السرايا دي غصب عن عين أي حد. وبعدين إنتي خايفة على شوية طين وحجارة؟ يغوروا في ستين داهية! أنا اللي عملتهم، وأقدر أعمل قدهم ميت مرة. بس غزل وحدة بس اللي في الدنيا، لو ضاعت مني.. مبقاش دياب الهواري لو مخلتش الصعيد كله يبكي بدل الدموع دم.
غزل سكتت، أنفاسها هديت، عينيها اتعلقت بعينيه. قلبها كان بيدق بسرعة لدرجة إنها حست إنه هيخرج من ضلوعها. كل كلام دادة زينب كان بيتردد في ودانها. بلعت ريقها وسألت بصوت مهزوز، كأنها خايفة من الإجابة:
— إنت صُح كنت… كنت رايدني من زمان يا دياب؟ زي ما دادة زينب قالت؟
دياب سحب إيده ببطء، وابتسم ابتسامة حزينة، مليانة وجع ذكريات:
— كنت رايدك؟ أنا مكنتش بشوف في الدنيا مرة غيرك يا غزل. القلب ده مدقش لغيرك. يوم ما جيتي، وانتي بتضحكي وفرحانة، وقولتلي إنك عاشقة فارس ورايداه.. القلب ده انكسر نصين، حسيت إن روحي بتنسحب مني. هربت لمصر والبندر مش عشان الشغل، هربت عشان متلعوش من صدره.. مكنتش هقدر أشوفك، مكنتش هقدر أشوف زفتك عليه.. بس نصيبك ترجعيلي، ومكتوبلي أحارب الدنيا كلها عشانك.. وأنا مش هسيبك المرة دي لو السما انطبقت على الأرض.
غزل نزلت عينيها في الأرض بخجل، لأول مرة تحس بمشاعر الأنوثة الحقيقية، لأول مرة تحس إنها غالية، غالية قوي عند راجل بجد. بس الخوف كان لسه معشش في قلبها من فارس وغدره.
في مكان مقطوع على أطراف النجع، في خرابة قديمة متدارية عن العيون. كان فارس رايح جاي زي المجنون، بيشرب سجاير ورا بعض ويرميها، ورضوان قاعد على حجر، بيشرب شيشة وبيكح.
— دياب مش هيسيبها يا فارس بيه. وأنا مش هقدر أوقف قصاده.. ده راجل واصل، وكلمته بتمشي على الرقاب كلها في النجع، وسلاحه مبيفارقش جنبه.
قالها رضوان وهو بينفخ الدخان. فارس وقف، ووشه مليان حقد أسود:
— لازم نكسره يا رضوان.. دياب لو انكسر، غزل هتبقى في حجرنا مرمية، والسرايا والأراضي كلهم هيبقوا ملكي! غزل هي نقطة ضعفه الوحيدة دلوقتي، الجدار اللي لو هديناه، دياب هينهار فوقينا.
رضوان ضيق عينيه بخبث:
— وناوي على إيه يا بيه؟ نقتلها ونخلص منها؟
فارس ضحك بشيطانية ورمى السيجارة داس عليها برجله:
— نقتلها إيه يا غبي! الميت مبيوجعش غير يومين والناس بتنساه.. إحنا نكسر شرفه قدام البلد كلها! دياب اللي ماشي رافع مناخيره في السما وعامل فيها كبير البلد، لو شرفه اتلطخ في الطين، مش هيقدر يرفع عينه في وش عيل صغير.
— هتعمل إيه يا مركب الشياطين إنت؟
— غزل لو طلعت من السرايا بليل في السر وركبت عربية غريب.. البلد هتاكل وش دياب، وهيضطر يغسل عاره بإيده، ويقتلها هو بنفسه قدام الناس.. وساعتها يبقى العمدة قتل عِرضه واتسجن، والسرايا والأراضي تفضالي أنا الوريث الوحيد.. وأنا أطلع منها زي الشعرة من العجين!
رضوان كشر بعدم فهم:
— وإكده هنجنعها تطلع بليل كيف بس؟ دي مابتخطيش عتبة الباب، ودياب حاطط عليها غفر أيوزنوا بلد.
فارس قرب من رضوان ووطى صوته:
— إنت عمها من لحمها ودمها.. هتبعتلها عيل صغير بليل متأخر برسالة.. تقولها إنك بتموت وعاوز تشوفها عشان تطلب السماح منها قبل ما السر الإلهي يطلع.. غزل قلبها خفيف وطبيعتها طيبة.
