صرخت غزل بدموع وتوهة، كأنها بتترجاه يديها إجابة تريح قلبها من الشكوك اللي دادة زينب زرعتها. دياب بص لشفايفها المرتجفة، ولعينيها الغرقانة في الدموع، مقدرش يمسك نفسه أكتر من كده. رفع إيده الخشنة وحطها على خدها بحنان، ومسح دمعة كانت هتنزل:
— بصفة إنك بتخصيني يا غزل.. بتخصي دياب.
الكلمة نزلت على غزل زي السحر. جسمها كله انتفض من لمسته ومن كلمته. بتخصه؟ يعني دادة زينب كان كلامها صح؟ دياب بجد بيحبها؟ دياب كمل بصوت هامس ومبحوح من فرط المشاعر اللي كان كابتها سنين:
— السنين اللي فاتت دي، أنا مكنتش بعيد.. كنت بشوفك كل يوم، كنت بتنفس هواكي من بعيد. غبائك وطفولتك خلوكي تشوفي فارس وتنسي دياب اللي كان بيحميكي. بس أنا سكتت عشان مجرحكيش. دلوقتي.. إنتي مبقيتيش على ذمة حد.. إنتي حرة، وحريتك دي متسواش عندي حاجة غير إنك تفضلي جنبي.
غزل كانت بتتنفس بسرعة، مش قادرة ترد، مش قادرة تستوعب كمية المشاعر والأمان اللي حاسة بيهم في اللحظة دي. لسه هتتكلم، الباب خبط بقوة وصوت دادة زينب كان بيزعق بره. دياب اتعدل بسرعة، ورجع خطوة لورا.
— ادخل!
زينب دخلت بتنهج، ووشها مخطوف:
— دياب بيه.. الحق بسرعة! المصيبة جات لحد خشم الباب!
دياب كشر:
— في إيه يا دادة؟ مين اللي بره عيزعج إكده؟
— عمها.. رضوان.. رضوان جايب معاه رجالة من النجع، وواقفين على الباب بره، وبيقول إنه عرف إن غزل اتطلقت، وجاي ياخدها غصب عن عين أي حد عشان يزفها لراجل كبير في السن من معارفه ويدفعله مهر كبير!
غزل شهقت وحطت إيدها على بوقها برعب. جسمها كله بدأ يترعش. عمها رضوان ده راجل قاسي، مبيعرفش ربنا، وممكن يقتلها لو عارضته. دياب بص لغزل شاف الرعب في عينيها. الفك بتاعه اتصلب، وعروق رقبته برزت من الغضب. مد إيده مسك عصايته الأبنوس، ولبس عمته، وبصلها بنظرة كلها طمأنينة وتحدي في نفس الوقت:
— متخافيش.. قولتلك اللي ملوش ضهر، دياب ضهره.. خليكي هنا وماتطلعيش خطوة وحدة بره.
خرج دياب من المندرة بخطوات سريعة، ووراه غزل اللي مقدرتش تقعد ومشت وراه من بعيد تستخبى ورا العمدان عشان تشوف إيه اللي هيحصل.
وصل دياب لباب السرايا الخارجي. الغفرا كانوا ماسكين سلاحهم وواقفين قصاد رضوان والرجالة اللي معاه. رضوان كان لابس جلابية قديمة، وماسك عصاية، وبيزعق:
— وسع يا منك ليه! أنا جاي آخد بنت أخوي! بت الغفير اللي رميتوها بعد ما شبعتوا منها.. أنا أولى بدمي ولحمي.
دياب وقف على درجات السلم بتاعة السرايا، ورفع عصايته، صوته رن في المكان كله وخلى الكل يخرس:
— صوتك ميعلاش في حرم السرايا يا رضوان! بدل ما أخرسلك لسانك ده للأبد.
رضوان بلع ريقه بخوف لما شاف دياب، بس حاول يستقوى بالرجالة اللي معاه:
— دياب بيه! حقاني وإنت عارف الأصول! بنت أخوي طليقة أخوك، وملهاش قعدة في سرايتكم بعد ما طلقها. أنا عمها وولي أمرها، وعريسها مستنيها.. هتديلي معايا دلوقتي.
غزل كانت واقفة ورا الباب بتسمع وبتعيط رعب من فكرة إن عمها ياخدها وتتجوز راجل متعرفوش وتتباع زي الجارية. دياب نزل درجة من السلم، وضحك ضحكة باردة زلزلت قلب رضوان، وقال بصوت جهوري سمعه كل اللي واقفين:
— ولي أمرها؟ بنت أخوك إيه يا رضوان اللي جاي تاخدها؟ ومين جالك إن غزل طليقة أخوي وهتطلع بره السرايا؟
رضوان استغرب:
— أومال إيه يا بيه؟ فارس بيه رمى عليها اليمين والبلد كلها خابرة! هتقعد بصفة إيه؟
دياب رفع راسه بشموخ، وبصوت هز قلوب الكل، وأولهم قلب غزل اللي كان بيسمع من ورا الباب، أطلق الرصاصة الأخيرة:
— غزل هتقعد بصفة إنها في حمايتي… وبصفة إنها مرتي المستقبلية وحرم دياب الهواري! كتب كتابي عليها بمجرد ما شهور عدتها تخلص… واللي هيفكر يجرب من حرم دياب الهواري، أو يجيب سيرتها على لسانه، هفضي سلاحي ده في نفوخه قبل ما يرمش عينه!
الصدمة نزلت على الكل زي صاعقة من السما. الغفرا بصوا لبعض بذهول، ورضوان فتح بوقه مش مصدق اللي بيسمعه. أما غزل ورا الباب… فقلبها توقف عن النبض للحظة، وحست إن الدنيا كلها بتلف بيها من قوة الكلمة… حرم دياب الهواري!
لكن قبل ما أي حد ينطق بحرف، ظهر فارس من ورا رجالة رضوان، وهو بيسقف ببطء، وابتسامة شيطانية على وشه، وبيقول بصوت عالي:
— يا حلاوة يا ولاد! العمدة الكبير بيلم فضلات أخوه الصغير! بس اللي متعرفوش يا دياب يا خوي… إن غزل…
وهنا يسكت فارس والابتسامة الماكرة على وشه.
ودي كانت نهاية أول حلقة من الرواية أنا لها عاشق بقلم نور محمد.
الفصل الثاني
— إن غزل لساتها مرتي وفي عصمتي! أنا رديتها لعصمتي قبل ما شمس النهار تطلع.. والشرع عطاني الحق ده يا عمدة.. ولا إنت ناوي تخالف شرع ربنا عشان تعشق في مرات أخوك وتلم فضلاته؟!
الكلمات خرجت من بوق فارس زي سم الأفاعي، لفت حوالين رقبة كل اللي واقفين وكتمت أنفاسهم. الغفرا نزلوا سلاحهم بذهول، وعمها رضوان ابتسم بخبث وهو بيمسح على شنبه. أما غزل اللي كانت واقفة ورا الباب، حست إن في خنجر مسموم انغرس في قلبها، رجليها مبقتش شايلاها، وسندت على الحيطة وهي بتكتم صرخة قهرها بين إيديها. شرع إيه اللي يرجعها لراجل داس على كرامتها وخانها؟ إزاي العدة تكون سجنها بالشكل ده؟
في اللحظة دي، دياب ملامحه متغيرتش، لكن عينيه اتحولت للون أسود مخيف، العروق برزت في رقبته، وقبضته على عصايته شدت لدرجة إن مفاصل إيده ابيضت. نزل درجات السلم ببطء مرعب، كل خطوة كانت بتدب في الأرض كأنها بتعلن بداية حرب دموية. وقف قدام فارس مباشرة، لدرجة إن فارس رجع خطوة لورا غصب عنه من هيبة أخوه اللي بتخنق.
