التفت ليضع الهاتف فوجد تلك المحدقة فيه بصدمة.
تساءل ببرود: مالك فيكي إيه؟ مبلمة كدة ليه؟
ندي بدموع: مين دي اللي بتكلمها؟
مصطفى بمبالاة: دي واحدة معرفة، ها إرتحت؟
ندي بألم: إرتحت يا مصطفى؟ إرتحت جداً…
قالت ذلك ثم دلفت إلى الحمام بسرعة.
أما هو نظر لها ببرود قائلا: على آخر الزمن تجي واحدة ست وتستجوب مصطفى الداغر؟! أنا أعمل اللي أنا عاوزه وإن كان عاجبك!
ألقى نظرة على طفله ثم نزل للأسفل.
في فيلا مراد، رحل سليم وعمر بعد قضاء الأمسية معهم وذهب الجميع بعد ذلك للنوم.
صعد مراد إلى جناحه وتذكر تلك الفتاة الموجودة بالداخل. زفر بضيق ثم فتح الباب ودلف إلى الداخل.
كانت مغمضة عينيها أثناء جلوسها فقد غلبها النعاس، ولكنها انتفضت من مكانها حينما دلف ذاك الشاب الذي سبق لها رؤيتها في شقتها إلى الداخل بغضب.
اقترب مراد منها وأخذ يدور حولها كالصياد الذي يتربص بفريسته.
أما لمار، إرتعدت أوصالها وأخذت ترتجف بقوة وأخذت تتساءل داخلها من ذاك الشاب، ومن أتى بها إلى هنا، ولما هي هنا؟
استجمعت لمار شجاعتها المزيفة وسألته بصوت مرتجف خائف:
– آااا.. لو.. لو سمحت هو.. هو أنا هنا بعمل إيه؟.. آااااه!
صرخة عالية أطلقتها لمار حينما باغتها بصفعة قوية قائلا بغضب:
– عاوزة تعرفي إنتي هنا ليه؟
هزت رأسها بخوف ودموعها تتساقط، فأكمل هو صافعا إياها بين كل جملة:
– إنتي هنا علشان تدفعي اللي عليكوا.. حق أبويا اللي قتلتوه.. وحق كل شاب ضحية تعاطي مخدرات.. وحق كل واحد بيموت من ورا الأسلحة اللي بتدخلوها!
أما هي كانت تسمع بفزع لما يقول، فهذه الأشياء ليست بجديدة على والدها وشقيقها، ولكن هل يظنها أنها معهم بل هي تمقتهم وبشدة كما تمقت أفعالهم.
هتفت بضعف: أنا مليش دعوة والله، أبوس ايدك خليني أمشي.
هتف بوعيد: متقلقيش إنتي فعلا هتبوسي أيدي كتير بس علشان أرحمك من اللي هيحصل فيكي وبردوا مش هيكفي.. إنتي هتفضلي هنا لحد ما تدلينا على مكان الوالد وأخوك الزبالة، غير كدة هوريك الجحيم على الأرض.. مش هتطلعى من هنا نهائي إلا في حالة القبض على أبوك وأخوك.
لمار ببكاء: طيب لو سمحت وديني حتة تانية، حرام ماينفعش أقعد معاك في حتة واحدة.
تعالت ضحكات مراد الذي قال بسخرية:
– حرام؟! وتعرفي إيه إنتي عن الحلال إذا كانت عشتك كلها حرام؟! إطمنى أنا لا يمكن أوسخ نفسي بواحدة زيك.
قال ذلك ثم خرج صافعاً الباب خلفه، أما هي جلست بإهمال تبكي على حظها العثر الذي أوقعها بين أنياب قاسٍ لا يرحم.
أما هو نزل للأسفل عند حمام السباحة وخلع قميصه وغطس في المسبح يطفئ لهيب انتقامه، فهو لو ظل لحظة واحدة لقتلتها في الحال.
عند لمار التي تكورت في نفسها ومازالت الدموع تجري على وجنتيها قائلة بضعف:
– يا رب أنا مش معترضة إن ناس زي دي أبويا وأخويا.. يا رب إني مسني الضر وأنت أرحم الراحمين.. يا رب أكيد دة بلاء وأنا هصبر عليه.. أعني يا رب وأديني الصبر…
أخذت تهذي بتلك الكلمات إلى أن غفت مكانها.
بعد مدة، عاد مراد إلى غرفته فوجدها نائمة على الأريكة، فنظر لها نظرة حقد وكره، ثم دلف إلى الحمام واغتسل ثم خرج وأبدل ملابسه إلى بنطلون قطني أسود وبقى بجذعه العلوي كالعادة، ثم تسطح على فراشه وذهب إلى النوم هو الآخر.
في مكان بعيد تماماً نزوره أول مرة، يدلف رجل إلى سرداب خلف فيلته ويفتح الباب ويظهر رجل مكبل بأصفاد حديدية مثبتة بالحائط.
تقدم الزعيم منه وهتف بنبرة استفزازية: أتمنى تكون إقامتك هنا معانا عجبتك.
نظر له الرجل بضعف قائلا: ربنا ينتقم منك! إنت عاوز مني إيه تاني؟ قتلت مراتي وبنتي عاوز إيه تاني؟ سيبني أخرج من هنا.
صدح صوت ضحكاته عاليا في المكان: هههههه تخرج من هنا؟! إنسى.. مفيش خروج، واه قتلت مرتك وبنتك علشان تتجرأ تاني وتتحداني.. ولسه الدور على باقي عيلتك!
هتف بنبرة تحذيرية: لو قربت منهم هقتلك.. فاهم؟ هقتلك!
الزعيم بضحك: مش لما تعرف تفك نفسك الأول؟! هههههه تشاو…
غادر الزعيم وعلى وجهه ابتسامة شريرة.
صرخ الرجل عاليا يسبه قائلا: يا كلب يا حيوان يا قذر.. فكني وأنا أوريك…
ثم صمت للحظات وقال بدموع: ربنا يرحمكم.. وحشتوني أوي.. سامحوني أنا السبب.. أنا السبب… استغفرك ربي وأتوب إليك.. حسبي الله ونعم الوكيل…
بعد منتصف الليل، استيقظ مراد متأففاً على شهقات عالية ملأت الغرفة.
نهض من مكانه وأشعل الضوء، وجدها تغطي وجهها بكلتا يديها ومتكورة كالجنين وكانت تبكي وتشهق بنحيب.
قال بتأفف وغضب: في إيه على المسا؟ عاوز أنام، ما أسمعش صوتك فاهمة؟!
هزت رأسها بضعف قائلة بين دموعها: لو سمحت متطفيش النور، خليه منور…
نظر لها باستنكار قائلا: مطفيش مين يا روح ماما؟! إنت بتستعبطى شكلك! أنا مش فاضيلك.
هتفت بخوف: بس.. بس…
صاح فيها غاضباً: مابسش! ما أسمعش نفسك.
هزت رأسها بخوف وعادت إلى حالتها، وما إن أغلق الأضواء مرة أخرى أصيبت لمار بحالة من الذعر فأخذت ترتجف بقوة وتضع يدها على فمها تكتم شهقاتها خوفاً منه.
أخذ يتقلب يميناً ويساراً يحاول النوم ولكنه لم يستطع فصوت بكائها يصل إليه.
هب من مكانه هادراً فيها بعنف: وبعدين في الليلة المهببة دي اللي مش راضية تعدي دي؟!
هتفت ببكاء وعيون حمراء: لو سمحت خلي النور شغال أنا بخاف من الضلمة.
نظر إليها بصدمة، وسرعان ما تذكر عندما كان يفتش في شقتها لاحظ جميع الأنوار كانت مضاءة.
هتف بإستسلام: هتزفت وأخليه شغال، بس مش علشان سواد عيونك، لا علشان أعرف أتخمد ورايا شغل مهم بكرة، وكمان علشان أفضالك كويس!
إرتعبت من داخلها فور استماعها لكلماته الأخيرة تلك، وسرعان ما أغلقت عيناها وأحمر وجهها خجلاً عندما انتبهت لهيئته تلك حيث كان يرتدي بنطلوناً قطنياً رمادي اللون وجذعه الأعلى بدون ثياب.
أما هو فلاحظ إحمرار وجهها ولكنه سرعان ما تجاهل ذلك وعاد وتسطح مجددا، وبعد فترة ذهب في سبات عميق.
في الصباح، في شقة ممدوح، تستيقظ ورد بتعب فتستند بظهرها على الحائط وتنظر للباب بخوف، وما لبثت أن أدمعت عيناها.
إنتفض جسدها بشدة عندما طرق أحدهم الباب فأتاها الصوت قائلا:
سميحة بهدوء: ورد حبيبتي، افتحي الباب.
هزت رأسها بخوف وازدادت دموعها.
سميحة وهي تطرق الباب بقلق: ورد.. ورد ردي عليا.. ورد إنتي كويسة؟
إلا إنها استمرت على حالها ولم ترد.
بالخارج، ذهبت سميحة لوالدتها تقول بقلق:
– إلحقى يا أما ورد مش راضية ترد بخبط عليها من الصبح.. أنا خايفة ليكون جرالها حاجة يا أما.
ضربت بيدها على صدرها تقول بصدمة: دي تبقى مصيبة لو ماتت لنا هنا!
نظرت لوالدتها باستنكار قائلة: يا أما حرام عليكى تعالي نشوفها.
دفعت يد سميحة الممسكة بها قائلة: طيب يا أختي ما تزوقيش، تلاقيها لسه نايمة إنتي عارفة إن نومها ثقيل.
ذهبت منيرة عند الباب وطرقت عليه بخشونة قائلة:
– افتحي يا زفتة يا اللي ما تتسمى، بدل ما والله أجيبلك الكرباج من جوة وأكسر الباب على دماغك وأجيبك من شعرك وأديكي العلقة التمام! ها هتفتحي ولاّ…
خافت ورد بالداخل من تهديدها، وفاجأتهم حينما فتحت الباب واستقرت تحت قدمي منيرة ممسكة بهما تترجاها ببكاء:
– أبوس إيدك يا مرات خالي مشيني من هنا.. وديني عند عمي.. أنا عاوزة عمي مش عاوزة أقعد هنا.. والنبي يا مرات خالي…
جلست سميحة قبالتها وسحبتها إليها وضمتها قائلة بدموع:
– بس يا حبيبتي حاضر.. هنوديكي بس إهدى حاضر.. هششش…
ورد بضعف: لا، لا أنا عاوزة أمشي.. مشيني يا سميحة.. مشيني…
أجابتها بمهاودة: حاضر.. لما ييجي خالك من تحت.
صرخت ورد بفزع حينما أتت سيرته قائلة برعب وهي تندس أكثر في أحضان سميحة:
– خالي لا، لا، لا.. مش عاوزة خالي.. مش عاوزة، وديني إنتي أو مرات خالي بس هو لا.. هو لا.. لا، لا…
أكفهر وجه منيرة من تصرفات ورد الغريبة قائلة:
– جرى إيه يا بت؟! إيه شغل الحنجل والمنجل اللي دخلاني بيه على الصبح دة؟! دة على أساس عمك هياخدك بالحضن يا أختي؟! جاتك مصيبة بعيد عننا.. ماشي يا أختي هنوديكى عند عمك اللي فرحنالي بيه دة ونبقى نشوف هيعمل إيه، قومي يا بت إنجري على المطبخ حضري الفطار…
نهضت ورد لتنفيذ ما أمرتها به زوجة خالها قائلة: حاضر يا مرات خالي، بس هصلي الأول فاتني الفجر النهاردة.
نظرت لها نظرة ساخرة من أسفلها لأعلاها: ماشي يا ست رابعة العدوية، أما نشوف! أنا هروح أقعد لي نصاية قدام التليفزيون ومش عاوزة أقولك لو معملتيش الفطار هيحصل إيه!
هتفت بسرعة: لا، لا حاضر علطول والله أهو…
ركضت ورد إلى الحمام وبداخلها بعض الطمأنينة بأن يرجعوها إلى عمها.
في فيلا المنشاوي، وبالتحديد في غرفة مراد، يستيقظ مراد من النوم وينظر إلى الأريكة فلم يجد لمار، فهب واقفا بفزع وأخذ يبحث عنها، فدلف إلى الحمام ولم يجدها وذهب لغرفة الملابس وكانت النتيجة واحدة.
توقف في منتصف الغرفة قائلا: هتكون راحت فين دي بدري كدة؟ يا نهار مش فايت دا أنا نسيت الباب مفتوح! داهية لتكون نزلت تحت، دي وقعة أبوها سودة!
نظر إلى الشرفة وجدها مفتوحة فاتجه بسرعة، وما إن دلف وجدها تجلس بحزن ودموع شاردة في اللاشيء.
هبت واقفة عندما لمحته واقفاً أمامها، وما إن رأت هيئته التي سبق وأن رأتها البارحة أعطته ظهرها خجلاً منه.
مراد بغضب أخافها: إنتي بتنيلى إيه عندك؟ هو إنتي فاكرة نفسك قاعدة في بيت أبوك؟
أدمعت عيناها لإهانته لها قائلة: أنا آسفة يا حضرة الظابط، أنا عارفة إنه مش بيت أبويا بس حضرتك زي ما قلت لك إنه ماينفعش أقعد معاك في حتة واحدة.
رد بسخرية: لا يا شيخة؟! ومدياني ضهرك ليه؟
أجابته بخجل: علشان.. علشان حضرتك مش لابس هدوم.
مراد بصدمة: مش لابس إيه؟! وسرعان ما تدارك نفسه فهتف قائلا: اه طيب هروح ألبس، ويا ويلك ويا سواد ليلك لو نزلتي من غيري!
أومأت برأسها قائلة: حاضر يا حضرة الظابط.
بعد غياب مراد لبعض الدقائق، عاد مرتدياملا بس عمله، ثم دلف إلى الشرفة وسحبها من يدها بقوة على حين غرة.
صدمت هي من فعلته وسرعان ما سألته: إنتي.. إنتي هتوديني فين؟ حرام عليك أنا معملتش حاجة!
صرخ في وجهها بغضب قائلا: إخرسِ ما أسمعش نفسك!
نزل بها مراد فوجد الجميع بالأسفل الذين صدموا ما إن رأوه ينزل من غرفته برفقة فتاة.
تقدمت والدته منه قائلة بصدمة: مراد.. مممين دي؟ وجاي من أوضتك بيها ليه؟!
صاح فريد ببعض العصبية: إنت إتجننت؟! إيه المهزلة اللي بتحصل دي هنا؟! حضرتك بتستغفلنا يا حضرة الظابط؟!
أردفت تسنيم: مراد، إنت ساكت ليه؟ ما تتكلم!
نظر لهم ببرود قاتل ثم هتف قائلا: مستنيكو تخلصوا كلام الأول.
إنفعلت والدته فقالت بعصبية: ولد! إنطق مين دي؟
مراد وهو يدفش لمار تحت قدمي والدته قائلا باستحقار: دي الزبالة اللي أبوها وأخوها قتلوا أبويا يا ماما، عاوزك توريها الويل، شغل البيت كله تعمله هي، مريحهاش أبدا لحد ما تنطق وتعترف إن الله حق.
مال عليها فجأة وضربها بعنف، فصرخت وتمسكت بقدمي أمينة قائلة برعب:
– إلحقيني الله يخليكي أنا معملتش حاجة وما أعرفش مكانهم والله! حوشيه عني!
مراد وهو يضغط على رقبتها بغضب: أومال أمي اللي تعرف، هتنطقي غصب عنك!
أما لمار كانت تلفظ أنفاسها الأخيرة جراء ضغطه على رقبتها.
حاولت والدته أن تنزع يديه من حول تلك المسكينة قائلة: ولد سيبها، هتموت في إيدك!
مال معتز وفريد وأمسكا به، فنهض قائلا: سيبوني هموتها! هموتها!
صاح عمه في وجهه قائلا: إنت مجنون؟! إهدى، ولما تقتلdispatcher كدة هتجيب حق أبوك؟!
هتف بغضب: أيوة مجنون، ومش ههدى إلا ما بنت الـ… تقول على مكانهم!
نزع نفسه من بين عمه ومعتز وأمسك بها مجددا ونزل بوابل من الصفعات قائلا: هما فين؟ فين؟ إنطقي هما فين؟!
لم ترد عليه، وإنما استسلمت لتلك الغيمة السوداء التي أحاطت بها فسقطت أرضاً على الفور.
هتف فريد بذعر: البنت! إطلب الدكتور بسرعة يا معتز.
أومأ بموافقة: حاضر يا بابا.
وقفت أمينة أمام ابنها وصفعته أمام الجميع، فصدرت شهقات عالية بعد تلك الصفعة.
نظر لها مراد بصدمة وعدم تصديق.
أمينة بدموع وصرامة: الظاهر أني معرفتش أربي كويس يا حضرة الظابط، لما تروح تتهجم على واحدة بنت وتجيبها هنا وتبات معاك في أوضة واحدة يبقى ما عرفتش أربي!
نظر إلى أمه ثم هتف بمرارة وهو يتذكر وفاة والده قائلا بنبرة يشوبها الحزن:
– إنتي بتضربيني يا أمي علشان دي؟! أعمل إيه يعني؟ أشوف بنت الراجل اللي حرمنى من أبويا وعاوزاني أقعد ساكت؟! ها قوليني ساكتة ليه؟!
هتفت والدته بصرامة: بعد الدكتور ما ييجي ويشوفها، توديها مطرح ما جبتها.
مراد بغضب عارم: مش هسيبها إنتوا فاهمين! ويا ويله وسواد ليله اللي يعمل حاجة من ورايا.. أنا ماشي، وزفتوها في أنهي داهية لحد ما أرجع، دي لسه مشفتش حاجة، أنا ماشي!
رحل مراد وأبلغ الحراس في الخارج بأن يأخذوا حذرهم وأن يبلغوه بما يحدث أول بأول.
بالداخل، وقف الجميع في حالة ذهول مما يحدث.
فريد: دة مجنون رسمي مش طبيعي.
معتز وهو ينظر أرضا للمار: ودي يا بابا هنعمل معاها إيه؟
أجابه بضيق: هنوديها في أي أوضة لحد الدكتور ما ييجي يشوفها وبعدين ربنا يسهل.
أمينة بجمود: شيلها يا معتز يا إبني ووديها أوضة الضيوف.
امتثل لأمرها قائلا: حاضر يا مرات عمي.
أعترضت فاطمة على ذلك فهتفت باستعلاء: إيه دة يا أمينة؟ إنتي عاوزة إبني يوسخ إيده ببنت قتال القتلة؟!
أجابتها بضيق: فاطمة، مش وقت كلامك دة دلوقت، ويلا يا إبني إنت كمان.
نزل معتز إلى مستوى لمار وحملها ثم ذهب بها ناحية غرفة الضيوف ووضعها برفق على السرير.
بعد دقائق، وصل الطبيب وقام بفحصها.
الدكتور بعملية: هي معندهاش حاجة بس واضح إنها إتعرضت لضغط نفسي عالي.
ثم لاحظ آثار الصفعات التي أعطاها إياها مراد.
الدكتور: وكمان متعرضة لعنف جسدي، مين الحيوان اللي عمل كدة؟! دة لازم يتعمل فيه محضر!
توترت الأجواء ورسمت الصدمة على وجوههم، فهتف فريد بكذب:
– ها أصل.. أصل دي بنتي وجوزها ضربها وإحنا جبناها علشان نطلقها منه وهناخد كل الإجراءات اللازمة متقلقش حضرتك.
تحدث الطبيب بعملية: طيب أنا أديتها حقنة مهدئة دلوقت، وخدوا الورقة دي فيها الدوا اللي هتجبوهولها ولازم الراحة التامة.
أومأ فريد قائلا: ماشي يا دكتور، معتز وصل الدكتور.
– حاضر إتفضل يا دكتور.
خرج معتز مع الدكتور يوصله.
نظرت فاطمة لتلك الغافية بكره قائلة: وبعدين في المصيبة اللي وقعت فوق راسنا؟
هتفت زينة بغل شديد: كنتوا سبتوه يموتها كنا أرتحنا منها!
أمينة: زينة، ملوش داعي الكلام دة، يلا دلوقت سيبوها ترتاح شوية.
نظر الجميع لها بصدمة، أهذا هو رد فعلها تجاه ابنة قاتل زوجها، أن تتمنى لها الراحة بدلاً من العذاب؟!
خرج الجميع من الغرفة تاركين إياها تعاني بمفردها.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
