نظر الجميع لمراد بصدمة شديدة، وهم لم يستوعبوا حتى الآن ما قاله. هتف حامد بثبات: – أعمال مشبوهة إيه دي يا ابني؟! هتف مراد بسخرية: – والله المفروض السؤال دة يتوجه لسعادتك، بس ملحوقة. تدخل سليم بعنف قائلا: – إنت بتقول إيه يا مراد؟! حاسب لكلامك، بابا مستحيل يعمل كدة! طالعه بسخرية قائلا: – والله دليل الإدانة معانا، فكلامك دلوقتى ملوش تلاتين لازمة، وأنا جاي أطبق القانون بعيد عن أي إعتبار شخصي.
توجه مصطفى قائلا بصدمة: – بابا، قوله إنك معملتش حاجة! هتف حامد بهدوء: – هقول إيه يا ابني؟! أنا هروح معاهم لحد ما ربنا يظهر الحق. صرخ مصطفى قائلا: – يعني إيه؟! إنت مش هتمشي ولا تروح حتة! تدخل مراد: – يا عمي، يلا.. واللى هيعترض هيجي معاه. هتف سليم بغيظ: – أقسم بالله أضربك وأفش خلقي فيك دلوقتى! وقف في وجهه قائلا: – مفيش مشكلة، أنا أهو قدامك، يلا إضرب!
إغتاظ بشدة منه فلكمه بعنف، فصرخن النساء على إثرها. تدخل مصطفى والعساكر لفض ذلك الشجار، قائلا: – سليم، فوق! الأمور متتحلش كدة، إهدى… هتف مراد بسماجة: – شاطر يا مصطفى. ثم وجه حديثه لسليم قائلا: – يا ريت تتعلم من أخوك وتعقل بدل ما إنت عامل زي التور الهايج كدة! كان سيتقدم مرة أخرى لضربه لولا يد أخيه التي أوقفته. بعدها أخذ مراد حامد وغادروا في سيارة الشرطة.
كان الجميع في حالة ذهول وصمت قاطعه صوت صفاء الذي خرج قائلا: – الكلام دة حقيقي يا مصطفى؟! ربت على كتفها بهدوء قائلا: – إهدي يا أمي، متقلقيش، أنا هقومله أحسن المحامين في البلد، وإن شاء الله هيخرج منها، بابا مظلوم يا أمي. هتفت بتأكيد: – وأنا واثقة من دة.
هتف وهو في طريقه للخروج قائلا: – خليك هنا يا سليم، وأنا هروح معاك. هتف بإعتراض: – لا، أنا جاي معاك. قاطعه بإصرار قائلا: – بقولك خليك هنا معاهم علشان تأمنهم، واضح كدة إن دة ملعوب معمول من حد عاوز يضر بمصلحة بابا… إستسلم سليم لكلام أخيه ومكث معهم، وتوجه مصطفى إلى القسم خلف والده.
كانت لمار بالصالون هي وسجود تثرثران، حينما دلفت خديجة قائلة بمرح خفي: – عوال يا بت يا سجود، مش قدك هي؟! لكتك من الصبح، أفصلي… تذمرت قائلة: – الله يا عمتو! أومال أتكلم مع مين؟! الحيطة؟! ضحكت لمار قائلة: – يا خبر! لا طبعاً، إزاى تتكلمي مع الحيطة؟! ميرضنيش الصراحة. عانقتها بقوة قائلة: – ربنا يكرم أصلك…
ضحكت خديجة قائلة: – يا بنتي حاسبي، خلي بالك من اللي في بطنك دة، بلاش جنان. غيمة سوداء لاحت في أعينها، أسقطت دموعاً لمعت في عينيها وهي تتحسس بطنها برفق، فقد إشتاقت له كثيراً ولكنها في نفس الوقت لن تسامحه على ما فعله معها، فهى لم تراه منذ أن تركت الفيلا خاصتهم. تنهدت بحزن وشردت كعادتها، فلاحظت والدتها وسجود ذلك، فأسرعت سجود قائلة حتى لا تتركها تنغمس في حزنها مرة أخرى: – لمار، يلا نكمل، عملت إيه في ابن الجيران لما خد لعبتي؟! إنتبهت لها قائلة ببسمة خفيفة: – أه ماشي، قولي يا مصيبة! هتفت بحماس وهي تستعيد تلك الذكرى: – جبت كيك من عندينا وحطيت فيه دبابيس وإديتهولو، من أول ما حطه في بقه أتعور وأتشوك من الدبابيس… تعالت ضحكاتهن عليها، فقالت لمار: – لا مش معقولة! إنتي مصيبة ويتخاف منك! ثم نظرت للكيك الذي أمامها قائلة: – ويا ترى دة كيك بدبابيس ولا من غير؟! هتفت بمرح: – والله إنتي ونصيبك بقى! ثم نظرت لعمتها قائلة: – وإنتي يا عمتو؟! لا، علشان السكر. ضحكت قائلة: – ماشي يا ستى، علم وينفذ، هو إحنا عندنا كام سجود؟!
هندمت ملابسها بغرور مصطنع قائلة: – شكراً.. شكراً… ثم هتفت بتذكر وكأنها تحدث نفسها: – آه صحيح، هشيل طبق لعمر. حمحمت بخجل حينما طالعتها خديجة وكذلك لمار بإبتسامة خبيثة، فقالت بتوتر وهي تتحاشى نظراتهم: – ولا أقولكم، خلاص هاكلهم أنا، خسارة فيه! هتفت لمار بخبث خفي: – لا يا حبيبتي، إحنا هنخليله طبق، وأول ما يدخل تدهوله علطول، زمانه جاي من الشغل جعان زي عادته. هتفت بسعادة: – ماشي…
أخذتا تضحكان في جو من الألفة والسعادة حتى إنقضى الوقت، ودلف عمر إلى الشقة وأغلق الباب فور دلوفه بحزن وتعب… غمزت لمار لسجود، فأسرعت تمسك طبق الكيك وذهبت ناحيته ووقفت قبالته قائلة بحماس أمامه تمد له طبق الكيك قائلة: – خد يا عمر، لأحسن نصيبك يخلص ومش هتلاقي تاني، ولو… صرخ فيها فجأة مما جعلها تفزع وتنكمش في نفسها قائلا: – بس.. بس كفاية! إيه إفصلى شوية، مش فاضيلك ولا فاضي لتفاهتك دي! قال ذلك ثم تخطاها ودلف إلى غرفته مباشرة، غير عابئ بدموعها التي تساقطت على الفور تحت دهشة الجميع…
وقفت لمار وتوجهت ناحيتها قائلة: – حبيبتي متزعليش، أكيد في حاجة في الشغل اللي ضايقته كدة. مسحت دموعها بسرعة قائلة: – لا أبداً مفيش مشكلة… قالت ذلك ثم تركتهم ودلفت إلى غرفتها وسرعان ما انفجرت في البكاء، فوضعت وجهها في الوسادة حتى لا يصل صوتها إليهم.
بالخارج، تطلعتا إلى بعضهن بإستغراب، فهتفت خديجة: – ماله عمر؟! أول مرة يجي كدة، وجات في الغلبانة دي! هتفت بهدوء: – تعالى نشوفه في إيه. قاطعتها خديجة بسرعة قائلة: – لا، سيبيه لحد ما يهدى لوحده، هيطلع وهيزر زي عادته، روحي للهبلة اللي جوة دي الأولى زمانها مقطعة روحها من العياط. هتفت بإبتسامة: – حاضر يا ماما… ذهبت إليها فتنهدت خديجة براحة قائلة: – الحمد لله يارب، أحفظهملي وباركلي فيهم. قالت ذلك ثم دلفت خلفها تلحقها…
في القسم المتواجد به حامد، خرج من غرفة المحقق بعد وقت قضاه في الاستجواب… هرع مصطفى الذي كان بالخارج ناحية والده الذي كان بصحبة اثنين من العساكر فقال بقلق: – ها يا بابا، عملت إيه؟! قبل أن يجيب، تحدث مراد بسخرية من خلفه قائلا: – هيشرف في الحبس يا باشمهندس، سوري إبقى قومله محامى علشان شكل القعدة هتطول. نظر له بغيظ قائلا: – مراد، يا ريت تحترم العشرة اللي بينا وتنقطنا بسكاتك. هتف بسخرية: – عشرة؟! عشرة إيه يا أبو عشرة؟! والله شوف بقا مين اللي مفروض يحترمها وميروحش يطغن في الظهر. ثم نظر للعساكر قائلا: – خدوه على الحبس. نفذوا أمره ورحلوا به، فقال مراد قبل أن يرحل: – سلام يا.. يا أبو العشرة…
تجاهل سخريته وطرق باب المحقق ودلف يستعلم عن أبعاد القضية وما وضع والده، وبعد وقت وصل إلى الفيلا ودلف إلى الداخل فوجد الجميع في انتظاره… سارعت والدته قائلة: – ها يا مصطفى، عملتوا إيه وفين حامد؟! هتف بحزن: – هيحبسوه تلات أيام على ذمة القضية يا أمي… شهقت بصدمة قائلة: – ليه؟! عمل إيه؟! نظر للأرض قائلا: – متهم في تهريب شحنة مخدرات جوة البلد يا أمي، وللأسف إمضته موجودة على الورق. صرخ سليم قائلا: – يعني إيه؟!ها! أبويا هيبات في الحبس؟! كله من تحت إيد مراد الواطي! هتف بهدوء: – سليم، إهدى، هو عمل واجبه لا أكتر ولا أقل، أنا كلمت المحامى والصبح إن شاء الله هنكون هناك بدري، يلا بقى كل واحد يروح على أوضته ينام… هتفت صفاء بحزن ودموع: – ننام إزاى بس وأبوك محبوس؟! ربت على كتفها مطمئناً إياها قائلا: – متقلقيش يا أمي، بابا مظلوم وهيطلع منها، يلا يا حبيبتي روحي ريحي في أوضتك… وبعد محاولات من الإقناع صعدت إلى الأعلى والبقية، وتبقى مصطفى الذي أخذ سليم إلى مكتب والده ليروا ما سيفعلانه غداً…
دلف يدلك مقدمة رأسه من التعب، ثم جلس على أحد المقاعد بعد أن ألقى التحية على والدته التي تنتظره كالعادة… هتفت بقلق: – مالك يا حبيبي؟! إنت تعبان؟! هتف بهدوء: – لا يا أمي متقلقيش، شوية صداع من شغل النهاردة. سألته بإهتمام: – مفيش مستجدات في القضية؟! نظر لها قائلا بهدوء: – أه في، تخيلي بقى إن البيج بوس بتاع الليلة دي كلها يبقى عمي حامد! نظرت له بصدمة قائلة: – نعم؟! حامد؟! إنت بتكلم جد؟! هتف بسخرية: – أه، حامد اللي نعرفه ومستغفل الكل! شرد طفلة بعيد عن أهلها، دة حتى ما سابش بنت أخوه بعدها عنهم! هتفت بعدم تصديق: – لا حول ولا قوة إلا بالله، معقولة؟! يااااه… أكمل بسخريته اللازعة: – لا، ومش بس كدة، لا دة طلع مهرب دولي كبير مخدرات وأسلحة إيه مقولكيش… طالعته بصدمة وعجز لسانها عن الكلام، فتحدث بحزن قائلا: – للأسف يا أمي في ناس كتير بتظهر الوش الحلو لينا مع إنه مش فيها أصلاً وتداري تحته وساختها… تنهدت بحزن قائلة: – ربنا على الظالم والمفترى يا ابني… ثم سألته بحذر: – هتعمل إيه دلوقتى؟! بلاش أي تهور منك يا مراد، سيب العدالة تاخد مجراها يا ابني. إبتسم بخفوت قائلا: – متقلقيش يا أمي، أنا من صدمتي مش قادر أصدق ولا قادر أصدق اللي وصلنا ليه دلوقتى، بعد ما كنا أعز أصحاب بقينا ألد أعداء لبعض… ربتت على يده بحنان قائلة: – متزعلش يا حبيبي، وإن كان على علاقتك بعمر فهترجع للأحسن إن شاء الله مع الوقت… هتف بتمنى شديد: – ياريت يا أمي، بس ما أعتقدش، دة نقل مكتبه ومبقاش يطلع معايا أى مهمة بنتكلف بيها… إبتسمت بتشجيع قائلة: – لا، متيأسش كدة يا حضرة الظابط، خلص قضية أبوك الأول والباقي سيبه عليا أنا… ثم هتفت بخبث دفين: – وبعدين البت لمار موحشتكش ولا إيه؟!
تسارعت نبضات قلبه بين أضلعه فور سماعه لاسمها، فإبتسم إبتسامة باهتة قائلا: – دي بالذات مش هتسامحنى، والصراحة عندها حق. ضربته بخفة على كتفه قائلة: – يا واد يا بكاش، بتهرب من سؤالي ليه؟! طالعها بإبتسامة خجولة قائلا: – مبهربش ولا حاجة يا أمي.. بس الموضوع صعب، مش ساهل زي ما إنتي فاكرة. هتفت بتأكيد: – قولي أه إنت بس، وحياتك عندي هسوي الهوايل علشان ترجعلك. نظر بعيداً بتهرب قائلا: – أقول إيه يا أمي بس؟! نظرت له قائلة: – بصلي هنا وقلي إنك بتحبها وباقي عليها، وأنا مستعدة أهد الكون كله في قصاد سعادتك يا حبيبي! ضحك وهتف بإستسلام قائلا: – وبعدين معاكي يا أمي؟! أه يا ست، بحبها، ما أعرفش امتى ولا إزاى بس بعد ما مشيت حسيت بفراغ كبير في حياتي ملتهولي من غير ما أحس، دة حتى لما كنت بقسى عليها كنت بتقطع.
من جوايا بس غصب عنى يا أمى، والله غصب عنى…
ضمته إلى صدرها وربتت على شعره بحنان قائلة:
– عيط يا حبيب أمك، فضي اللي جواك.
وكأنها أعطته شرارة الإنطلاق؛ فبمجرد أن انتهت من كلامها أخذ يردد بدموع:
– تعبان.. تعبان أوى يا أمى! أصحابي ضاعوا مني مرة واحدة، وحتى البنت اللي حبيتها راحت.. موجوع أوي منهم! المفروض يفهموا ويقدروا موقفي، مش يبعدوا وينسحبوا كدة! والتانى أبوه اللي قتل أبويا فمش هقدر أقرب ولا هقدر أبعد، مش عارف.. مش عارف أعمل إيه؟!
قال ذلك ثم أخذت دموعه تنزل بصمت إحترمته والدته، ظل هكذا إلى أن قالت أمينة بمرح وهي تلكزه بخفة قائلة:
– خلاص بقى، بطل عياط، في ظابط بيعيط؟!
إبتعد عنها قليلاً ثم مسح الدموع العالقة في أهدابه قائلا:
– يعني الظابط مبيحسش ومعندوش مشاعر؟! يلا ما علينا، أنا طالع أنام.
هتفت بحب:
– طيب، مش هتتعشى؟!
هز رأسه بنفي قائلا:
– لا يا أمي مليش نفس…
تنهدت بحزن قائلة:
– ماشي يا حبيبي على راحتك، تصبح على خير.
إبتسم لها قائلا:
– وإنتي من أهل الخير…
صعد إلى جناحه بسرعة، فتنهدت والدته ناظرة في أثره قائلة بحزن:
– يا رب هون عليه وأوقف جنبه…
قالت ذلك ثم صعدت إلى غرفتها تنال قسطاً من الراحة.
كانت ورد تنام بعمق وهي تمسك بصورة سليم، تضعها تحت الوسادة تخفيها وكذلك يدها الممسكة بها…
دلف سليم خلسة إلى غرفتها، فهو إعتاد أن يأتي لها خلسة في بعض الليالي وينام إلى جوارها، ويستنشق عبيرها الخلاب، ويدخلها بين ذراعيه وينام بسعادة ثم يستيقظ باكراً ويدعي أنه كان نائماً بمكتب والده.
جلس بخفة يتأملها بعشق إستشعره مؤخراً، إبتسم بخفة وهو يسمع همهماتها وهي نائمة، ولكنه لاحظ يدها الممدودة أسفل الوسادة فسحبها برفق كي يضعها بشكل مناسب، ولكنه تصنم في مكانها وإتسعت عيناه على آخرهما حينما رأى صورته في يدها تتشبث بها بقوة…
سحب الصورة برفق من يدها فوجدها مقصوصة من إحدى المجلات، فتنهد براحة قائلا:
– هتجننيني معاكي يا بنت الداغر! بس كان مالي ما كنت في حالي؟!
ثم إبتسم بأمل قائلا:
– بس واضح إنك كمان واقعة، ولا مش هتشعبطى في الصورة بالشكل دة…
لا يعلم ذلك الأحمق إنها تعشقه منذ صغرها…
ملس على رأسها موضع الجرح، ثم تمدد إلى جوارها وأدخلها بين ذراعيه مشدداً على خصرها بقوة، أما هي فكأنها تنتظره في أحلامها فتضع رأسها على صدره تدفن رأسها فيه وتبتسم بسعادة كونه إلى جوارها، ولا تعلم إنه حقيقة…
صباحاً على طاولة الطعام، كان عمر يأكل بشرود، وكانت والدته وشقيقته تطالعانه بفضول عما يعتريه من الداخل…
لاحظ نظراتهم فضيق عينيه قائلا:
– مالكم في إيه؟! بتبصولي كدة ليه؟!
هتفت خديجة:
– أبدا يا حبيبي، بس أصل يعني إنت إمبارح كنت.. كنت يعني متضايق وواضح بردو لحد دلوقتى، فقلنا نسيبك تهدى.
هتف بهدوء وهو يقلب في طعامه:
– مفيش حاجة، أنا كويس متقلقيش.
ثم مسح المكان بعينيه قائلا:
– أومال فين العبيطة؟! مش قاعدة معاكم ليه؟!
