روايات

سارة مجدي 2

يلا بينا.

عاد سفيان إلى جودى وأمسك يديها وهو يقول:

تعالي ومتخافيش، ماستهلش أكون أخوكى لو ما جبتليكيش حقك.

وتحركوا جميعًا إلى مكتب سيادة العميد. طلب حذيفة من ساعي مكتب رئيس الجامعة أن يخبره أنه يريد رؤيته، وبعد دقيقة واحدة سمح لهم بالدخول. كان حذيفة مقطب الجبين حين دخل إلى رئيس الجامعة قائلًا:

صباح الخير يا دكتور جمال.

ضحك الدكتور جمال قائلًا:

صباح النور دكتورنا الهمام، أخبارك إيه؟

قال حذيفة دون رد على مزاحه:

دلوقتي يا دكتور جمال فى مشكلة كبيرة، وأنا ما حبّيتش أتصرف لوحدي لأن الأنسة لازم ليها رد شرف واعتبار.

قطب الدكتور جمال جبينه قائلًا:

إيه المشكلة؟

وضع حذيفة الصور أمام الدكتور جمال وقال:

دي الأنسة جودى وده الأستاذ سفيان أخوها، أما بقا الصور دي فالصور دي مفبركة، لأن الصور الأصلية ليا أنا ومراتي الله يرحمها من شهر العسل من أكثر من أربع سنين فى ألمانيا. فى ولد هنا اسمه حازم العامري كان أتعرض ليها قبل كده وأنا وقفته عند حده لأن الموقف حصل فى محاضرتي، بعد كده استنى لحد معاد المحاضرة التانية وجه قدام الجميع وأعتذر منها بطريقة غريبة بعد ما قالها “أنت فاكرة نفسك محترمة بجد!”، وبعدها على طول نلاقي الصور دي.

هز الدكتور جمال رأسه وهو يقول:

فهمت، بس ممكن تورينى الصور الأصلية؟

فتح حذيفة هاتفه وفتح إحدى مواقع التواصل وأخرج منها نفس الصور الموجودة بين يدي الدكتور جمال، ولكن بدلًا من وجه ماري وجه جودى، وأراهم إياه. وقف الدكتور جمال وهو يقول:

تمام…

ووقف أمام جودى وهو يقول:

الولد ده ضايقك قبل كده؟

ربت سفيان على ظهرها يطمئنها وهو يقول:

قولي يا جودى، مفيش حاجة تخافى منها ولا تتكسفى.

نظر له الدكتور جمال بإعجاب وهو يقول:

يا ريت كل الأخوات كده، متفهمة وواعية.

نظر له سفيان وقال:

أنا أشك فى نفسي لكن جودى لأ، ومهما الناس قالت.

ابتسم له الدكتور جمال ثم عاد بنظره إلى جودى وقرر سؤالها:

ها، ضايقك قبل كده؟

أجابته قائلة:

أيوه، أكثر من مرة يحاول يكلمنى وأرفض، وكل مرة يفضل يقولى “أنت فاكرة نفسك محترمة، أنا هخليكى تيجى تبوسى جزمتي” وحاجات كده.

سألها مجددًا:

كان فى شهود على الكلام ده؟

نظرت جودى لسفيان الذى شجعها بنظراته وقالت:

أيوه، فى، وفى مرة زهرة صاحبتى صورت إللى حصل فيديو.

عاد إلى مكتبه وهو يقول:

والفيديو ده موجود معاكو؟

هزت رأسها بنعم، فنظر لحذيفة وهو يقول:

دكتور حذيفة، من فضلك خليهم يستنوا فى مسرح الجامعة الكبير وارجعلى تاني.

نظر له حذيفة باندهاش وهو يفكر لما يريد إرسال سفيان وجودى إلى المسرح الكبير. لم يستطع أن يلتقط أي إشارة لما يفكر به العميد فنفذ دون كلام وهو يشير لسفيان ليخرجوا جميعًا. حينها أوقفه سفيان سائلًا:

أنا مش فاهم حاجة، هو ليه طلب أننا نروح المسرح ده دلوقتي؟

نظر حذيفة للباب المغلق خلفه ثم نظر إلى سفيان وقال:

صدقني ما أعرفش، بس أنا جيت ليه هو بالتحديد لأنى أعرفه كويس ومتاكد إنه هيجيب حق جودى.

أوصلهم إلى المسرح وعاد سريعًا إلى الدكتور جمال، وحين دخل إلى غرفة المكتب كانت زهرة تقف أمام العميد وهو يشاهد شيئًا ما فى يديه. تقدم منهم حذيفة، نظر له العميد وقال:

أنا تأكدت أنها مش بتكذب، هتاخد الفيديو ده وترروح لحسام مسؤول المسرح وهو عارف هيعمل إيه.

خرج حذيفة من المكتب ومعه زهرة، ثم نادى الدكتور جمال بصوت عالٍ على ساعي مكتبه ثم طلب المسؤول عن أمن الجامعة.

فى خلال ساعة واحدة كانت الجامعة بأسرها تَتَجَمَّع فى مسرح الجامعة الكبير، وكانت هناك شاشات عرض كثيرة موجودة خارج المسرح لباقي العدد الذى لم يستطع الدخول. وقف الدكتور جمال على المسرح وبيده الميكروفون وبجانبه حذيفة وقال:

النهارده انتشرت ما بينكم صور لدكتور حذيفة مع إحدى الطالبات، والكل دلوقتي طبعًا بيقول إن فى علاقة مشينة ما بينهم. طيب، مفيش حد فيكوا فكر للحظة يا ترى زميلتنا دي فعلا ممكن تعمل كده ولا لأ؟ على العموم أحب أقول إن الصور دي مفبركة! الصور اتسرقت من على الموقع الرسمي لدكتور حذيفة، والصور دي ليه هو وزوجته المتوفاة، وأنتوا شايفين أهو الصور إللى بتتعرض؛ نفس الفستان، نفس الوقفة، نفس الخلفية!

كانت فى تلك اللحظة الصور الأصلية تُعْرَض على شاشة العرض الكبيرة لكى يراها الجميع. كان سفيان واقفًا على المسرح ولكن لا يراه أحد، وبين ذراعيه جودى، ابتسم حين بدأ عرض الصور وقبل رأس أخته بسعادة. أكمل الدكتور جمال حديثه قائلًا:

دلوقتي تأكدنا كلنا إن الصور دي زميلتكم بريئة منها. طيب نفكر كده للحظة، مين إللى جاب الصور دي ومين إللى فبركها؟ مين حابب إنه يأذي زميلتكم بالشكل البشع ده وكمان يضر سمعة دكتور حذيفة؟ خلينا نشوف!

وبدأ عرض الفيديو الخاص بحازم وهو يحاول مغازلة جودى وهى تصرخ فى وجهه وتنهره، وبالأخير يقوم بتهديدها وسبها. ساد الهرج بين الطلاب وعلت الهمهمات المستنكرة، وبإشارة من الدكتور جمال عاد الصمت إلى المسرح. أكمل قائلًا:

دلوقتي عرفنا ولو مجرد تخمين مين إللى ممكن يكون عمل كده.. طيب، احنا لازم نتأكد ولا إيه؟

علت الهمهمات والصيحات فى المسرح وخارج المسرح. أشار الدكتور جمال بيديه ليتقدم أصدقاء حازم ووقفا أمام الدكتور جمال منكسي الرأس. سأل الدكتور جمال سؤالًا مباشرًا دون مراوغة:

مين إللى فبرك الصور ومين نشرها هنا فى الجامعة، ومين إللى خطط لكل ده؟

كانت الإجابة كلمة واحدة من أربعة حروف خرجت من الاثنان فى نفس الوقت:

حازم!

وحينها دخل حازم المسرح يمسك به ضابط الأمن، وفى نفس اللحظة دخل سفيان إلى المسرح ومعه جودى. أوقفها بجانب حذيفة واتجه إلى الجانب الذى يقف به حازم ووقف أمامه مباشرة بحزم وقوة ليردعه عن فعله المشين، ووجه إليه كلمات حاسمة قاطعة توقف جبروته عند حده وتظهره على حقيقته أمام الجميع، ثم ترك الأمر للجهات المسؤولة لتاخذ مجراها القانوني فى الجامعة. ظل الدكتور جمال يتابع الموقف بثبات، وبعد أن انتهى سفيان وعاد إلى مكانه قال:

لو كنت مكانك لكنت اتخذت نفس الموقف الحازم. على العموم حضرتك أخدت جزء من حق أختك وباقى الحق عندنا.

صمت قليلًا حتى يعود الهدوء إلى المكان بعد أن زادت الهمهمات، وأكمل الدكتور جمال حديثه قائلًا:

وبعد إللى احنا شفناه وعرفناه، حازم مذنب ولا لأ؟

جميع من بقاعة المسرح ومن بخارجها بصوت يهز القلوب:

مذنب!

ابتسم الدكتور جمال وقال:

إذن قررت إدارة الجامعة فصل الطالب حازم العامري فصلًا تامًا ونهائيًا ولا رجعة فيه عن الجامعة لسوء سلوكه والتشهير وتشويه السمعة لدكتور بالجامعة وزميلة له، وتقديم بلاغ باسم الجامعة فى الطالب.

ثم نظر لسفيان وقال:

وممكن كمان الأنسة جودى تقدم بلاغ باسمها، وكمان الدكتور حذيفة.

ابتسم سفيان وقال:

لا، احنا مش هنقدم بلاغ، بس أحب أقوله كلمة واحدة: لو فكرت بس تدوس على خيالها، افتكر إنك هقف قدامى أنا، وأنا ممكن أموت علشانها.

كان حذيفة يتابع كل ما يحدث بصمت، عيناه مثبتتان على تلك الصامتة الخائفة الباكية شارد فيها. تقدم خطوة ووقف أمام سفيان وجودى ونزل على ركبة واحدة وقال:

آنسة جودى، تقبلي تتجوزيني؟

صمت تام.. الجميع عيونه مثبتة على جودى التى تقف كالصنم، الجميع ينتظر ردها. والمفاجأة الكبرى أنها رجعت خطوة للخلف واحتمت بظهر سفيان وقالت:

لأ.

همهمات وأصوات مستنكرة. ظل حذيفة ينظر إليها دون كلمة أو حركة وكأنه يتمنى منها تغير رأيها، ولكنها ظلت كما هي. أفاق حذيفة من شروده على صوت الدكتور جمال ليجد نفسه واقفًا فى مكانه؛ لقد كان حلم يقظة! ولكنه يشعر بالضيق، لماذا وكيف يحلم بذلك الشيء؟ عاد بتركيزه للدكتور جمال وهو يقول:

وبكده لازم يا شباب قبل ما تصدقوا أي حاجة سمعتوها أو شفتوها لازم تتأكدوا، علشان في حاجات كتير بتبان أنها الحقيقة وتتبقا فى الأخر كذبة كبيرة.

ثم تحرك خطوتين ليقف أمام جودى ونظر إليها وقال:

وأنا باسمي وصفتي بعتذرلك يا آنسة جودى.

صفق الجميع وأصبح صوت التصفيق يرج المسرح، وبدأ جميع من على خشبة المسرح يغادر وصوت التصفيق يزداد. وقف سفيان وشكر الدكتور جمال وأخذ جودى وزهرة وتوجه إلى بوابة الجامعة، وفى الطريق كل من كان يقابلهم يعتذر لها ويحييها، وكانت دموعها لا تتوقف. كانت تعرف جيدا أنها أخدت حقها وأن لن ينظر أحد إليها تلك النظرة القاسية مرة أخرى، لكنها تشعر بالألم، ألم قوي داخل صدرها، تشعر أن قلبها ينزف ولا أحد يشعر، تتألم لأن ما حدث حدث مع حذيفة، لما هو من وسط الجامعة كلها؟ لماذا هو؟

وصلوا إلى السيارة وكانوا على وشك التحرك. استمع سفيان لرنين هاتفه، قبل الاتصال وهو يقول:

أيوه يا حذيفة.

صمت للححظة ثم قال:

لأ، لسه بره.

استمع لكلمات صديقه ثم قال:

لأ طبعًا مش هنعرف ماما حاجة.

صمت لفترة ثم قال:

خلاص، هعرفها إنك هتيجي الجمعة يا طفس، سلام.

كانت مهيرة تقف بالمطبخ مع السيدة نوال يتحدثان؛ لأول مرة تشعر مهيرة بإحساس أن تقف البنت بجوار أمها بالمطبخ تتعلم منها فن الطهي، يتحدثان فى كل شيء وأي شيء. كانت نوال تكلمها عن جودى وهى صغيرة وكيف كان سفيان دائمًا يعين نفسه حارسًا لها وكيف كان دائمًا يأخذها معه فى أي مكان. ضحكت مهيرة وهى تقول:

وهو كان بيخاف عليها من إيه؟

نظرت لها نوال وهى رافعة حاجبها الأيسر كابنها تمامًا وقالت:

كان بيغير! أصل البت جودى وهى صغيرة كانت بيضة أوى وشعر أصفر بقا وشفايف لون الفراولة، حاجة كده أجنبي خالص، فكان بيغير!

سكتت مهيرة وكسا ملامحها حزن شديد، شعرت بها نوال فاقتربت منها وجذبتها من ذراعها لتجلس على ركبتيها أمامها ثم ضمتها إلى صدرها وهى تقول:

متزعلش، صدقيني إللى جاي هيكون أحسن وهتعيشي كل إللى اتحرمتي منه، وأنا متأكدة إن سفيان لو يقدر هيجيبلك الدنيا كلها تحت رجليكى.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى