رقية كانت داخلة كلية الحقوق وهي شايلة فوق كتافها حلم أبوها عبد المنعم اللي طول عمره كان نفسه يشوفها محامية قد الدنيا بتجيب حق الغلابة، أبوها راجل على قد حاله سواق ميكروباص بس عزة نفسه مخلياه ملك في نظر بنته، وكان كل يوم وهو بيوصلها يقولها يا رقية خليكي جامدة القانون عايز قلب ميت ولسان بينقط حق. رقية مكنتش بنت عادية كانت عنيدة عناد السنين، دماغها ناشفة زي الحجر، لو اقتنعت بحاجة مستحيل حد يرجعها، وعنيها بتلمع لما تدخل في نقاش كأنها داخلة خناقة ولازم تطلع كسبانة. أول يوم ليها في سنة تالتة سمعت عن دكتور ممدوح، دكتور القانون المشهور بقسوته، الراجل اللي الطلبة مسمينه دكتور العناد، مبيهزرش، مبيضحكش، وبيسقط أي بنت تحاول تتقرب منه بضحكة ولا كلمتين حلوين، كان بالنسباله البنات دول جايين يتمرقعوا مش يتعلموا قانون. دخلت المدرج متأخرة شوية، لابسة شنطتها على كتفها وماسكة الكتاب كأنها ماسكة سلاح، وهو واقف على المنصة بيبص للطلبة بنظرة تخلي الواحد يبلع ريقه، قالها بكل برود اتفضلي يا أستاذة احنا بدأنا من عشر دقايق، قالتله بمنتهى البجاحة آسفة يا دكتور الطريق كان زحمة وبعدين المحاضرة لسه في أولها يعني مخسرناش كتير، المدرج كله سكت كأن حد رمى فيه قنبلة، محدش قبل كده رد على دكتور ممدوح بالشكل ده
. من اللحظة دي الحرب قامت، كل محاضرة رقية تقعد في أول بنش وتناقشه في كل كلمة، يقول المادة الفلانية بتقول كذا تقوله بس يا دكتور فيه ثغرة هنا، يقولها القانون مفيهوش ثغرات يا آنسة، ترد تقوله القانون اللي مفيهوش ثغرات ده يبقى قرآن مش قانون من صنع البشر، الطلبة يضحكوا وهو وشه يحمر من الغيظ، بقت بالنسبة له شوكة في زوره، وبالنسبة ليها بقى تحدي لازم تكسبه. صاحبتها مها كانت كل شوية تقولها يا بنتي لمي الدور ده ممكن يسقطك بجد، ورقية تضحك وتقولها يسقطني؟ هو فاكر نفسه مين، أنا حافظة الكتاب صم، وصاحبتها التانية صفا اللي كانت هادية وبتحب تذاكر في صمت كانت بتقولها الدكتور ممدوح مش سهل ده لو حط حد في دماغه بيجيبه الأرض، بس رقية مكنتش بتسمع كلام حد. جه يوم المناقشة الكبيرة، دكتور ممدوح كان عامل مناظرة بين الطلبة عن قضية
، ورقية وقفت قدامه وقعدت تفند كل كلامه حتة حتة، جابتله سوابق قضائية هو نفسه مكنش فاكرها، قلبت المناظرة لمسرحية وهي البطلة، والمدرج كله صقف لها، هو سقف كمان بس تصقيفه كان بارد زي التلج، وقالها برافو يا أستاذة رقية شكلك هتبقي محامية شاطرة لو عديتي من مادتي، والجملة دي كانت تهديد صريح. أيام الامتحانات جت، رقية دخلت مادة القانون الجنائي اللي بيدرسها ممدوح وهي واثقة مليون في المية إنها هتجيب امتياز، حلت كل الأسئلة وكتبت إجابة نموذجية تخلي أي دكتور ينبهر، وطلعت تقول لمها وصفا أنا ضمنت الامتياز خلاص. النتيجة ظهرت، راحت تشوف اسمها في الكشف، لقت نفسها جايبة
ضعيف، ضعيف يعني ساقطة، الدنيا لفت بيها، راحت لمكتب الدكتور ممدوح وهي بترتعش من الغضب، خبطت الباب ودخلت من غير ما تستأذن، قالتله انت سقطتني ظلم، أنا حاله كويس جدا، قالها بكل برود القانون بيقول إنك ساقطة، يبقى انتي ساقطة، قالتله قانون ايه اللي بتتكلم عنه ده قانونك انت مش قانون الكلية، انت بتعاقبني عشان بناقشك، انت دكتور عنيد ومريض بالسلطة، هو قام وقف وقالها اطلعي بره مكتبي ولو عليتي صوتك تاني هعملك مجلس تأديب. رقية خرجت بتعيط بس دموعها كانت دموع غضب مش ضعف، راحت على طول لكرم، كرم ده كان معيد شاب في الكلية وبيحب رقية من بعيد لبعيد، وكان دايما يقولها انا معجب بعنادك ده، قالها مالك، حكتله كل حاجة، كرم قالها بصي يا رقية دكتور ممدوح عامل كده مع بنات كتير قبلك، بس محدش قدر يثبت حاجة عليه
عشان هو مسنود من ناس تقيلة، بس أنا هساعدك نجيب ورقة إجابتك ونصورها. راحت رقية مع مها وصفا ودوروا على ورق الإجابة في الكنترول، وبالصدفة لقوا ورقتها مرمية ومتعلم عليها باستهتار، الدرجات اللي تستحقها متشال منها كتير، صوروا الورقة بالموبايل، وهنا رقية قررت إنها مش هتسكت، راحت كتبت شكوى طويلة عريضة وقدمتها للعميد، العميد كان راجل محترم اسمه دكتور عبد المنعم تشابه أسماء مع أبوها، وكان معروف عنه العدل. العميد استدعى دكتور ممدوح، وقاله فيه طالبة بتشتكي إنك ظلمتها، ممدوح ضحك وقال طالبة فاشلة وبتتلكك
