حماتي عندها حساسية شديدة من حاجات معينة، وتحديداً الحاجات اللي أكون أنا شرياها وعايزاها. الحساسية دي مابتظهرش إلا لما أنا أجيب الحاجة؛ يعني لو ابنها جاب زيها بتاكلها عادي. كنت فاكرة الموضوع هياخد فترة ونخلص، لكن بقى يزيد أكثر وأكثر لحد ما عرفت أعالجلها حساسيتها بطريقتي!
من وقت ما حماتي تعبت وجوزي قرر يجيبها تعيش معانا وهي مجنناني، أي حاجة أجيبها البيت تصرخ وتقول إن عندها حساسية، رغم إن لو ابنها جاب نفس الحاجة مبترفضهاش.
يعني نفس كيلو البرتقال، لو أنا اللي شايلاه وجاياباه البيت، تقف على بعد خطوتين منه، وتبتدى تصرخ وتسند صدرها وتقول: “ألحقني يا حبيبي.. حشرجة في زوري وجلدي بيحرقني ومش قادرة أتنفس!”
لكن لو ابنها هو اللي جايبه؟ تقعد قدام التلفزيون تنزل في البرتقال واحدة ورا التانية، وتاكل وتهني وتقول: “يا سيدي على السكر! الله يباركلك يا ابني.”
ملايات السرير نفس الكلام؛ أجيب أنا الملاية وأفرشها، تنام ليلة واحدة وتقوم تقول جسمي كله اتملى بقع وحكة. يجي جوزي يشيلها ويفرشها هو بنفسه، تنام نومة أهل الكهف!
في مرة ما قدرتُش أمسك نفسي وسألتها في وشها:
“يا طنط، لو حضرتك مش طايقاني قوليها لي بلاش الشغل ده!”
هي كلمة واحدة من هنا، ولقيت “نعيمة” (حماتي) زعلت، وقعدت تبكي لابنها وتتمسكن، وهو فضل يزعق ويقولي: “مش قادرة تستحمليها دي ست كبيرة وعيانية!”
سكت واستحملت مرة ورا مرة… لحد اليوم اللي بابا وماما سافروا فيه وسابولي “سمسم” عشان أخد بالي منه كام يوم.
“سمسم” ده قطتي اللي متربية في حضني بقالها عشر سنين. أول ما حماتي شافت القطة من هنا، مسكت رقبتها وقعدت تصوت وتقول إن عندها حساسية من شعر القطط وبتموت! في نفس الليلة، جوزي خرج القطة في الشارع من غير علمي وخسرناها ومقدرناش نرجّعها.
والمصيبة بقى، إن بعديها بفترة قليلة، لقتها حاضنة قطة شوارع بلدي كان جوزي “سامح” جايبها من الشارع، وقاعدة تطبطب عليها وتضحك ولا كأنها الست اللي كانت بتموت من شعر القطط!
يومها أنا اتجننت، صرخت، وبكيت، وحاسبتهم… وفجأة، طلعت أنا الشريرة والمفترية! قالوا إني بتبلى على ست كبيرة وبضايقها عشان خاطر قطة! وحتى “سامح” جوزي وقف مع أمه ضدي، وبعدها بكم شهر طلقني. (ثم تزوجنا مرة أخرى لاحقاً بعد محاولات الصلح وفهم الأمور).
عشت سنين زعلانة على قطتي لاني خسرتها من غير سبب. وبعدها بكام يوم كنت راجعة تعبانة من الشغل وفي إيدي كام كيلو برتقال… أول ما فتحت باب الشقة، سمعت صوتها جاي من الصالة:
“شيلي البتاع ده من هنا! شيلي القرف ده بره فوراً!”
كانت نايمة نص نومة على الكنبة، إيد ضاغطة بيها على صدرها والإيد الثانية بتترعش وتشاور بيها على شنطة البرتقال.
“مش قادرة أشم الريحة! هتخنق يا سامح!”
سامح كان قاعد على ركبه جنبها، عمال يطبطب على ضهرها ويقول: “اهدي ياما.. اهدي وخذي نفسك بالراحة.”
أول ما شافني مخرجتش الكيس ولا رديت حتى، بصلي بغضب وقال لي:
“جرى إيه يا نيرة؟ هو أنتِ متعرفيش تسألي قبل ما تجيبي حاجة البيت؟ أنتِ عارفة إن أمي جسمها حساس وبيتحسس من أقل حاجة، ولا بتنسي؟”
وقفت عند باب المطبخ ومردتش. أنا عارفة الحوارات دي كويس جداً… في الأول كنت أجري وأخبي الشنطة أو أرميها، وكانت شنطة البرتقال بداية الشريط. بعدها جه الورد، والسجاد، وملايات السرير، وحتى كريمات وشي! أي حاجة أنا أشتريها وأدخلها البيت، حماتي تطلعلي فيها ألف عيب وتقول: “عندي حساسية منها!”
المرادي… مش هعمل اللي هي عايزاه ولا حتى هجادل، ولا هحاول أثبت إنها كدابة. مش هي بتحب التمثيل؟ تمام، أنا هبني لها مسرح مخصوص تمثل عليه… وبس رجليها تطلع المسرح ده، مش هسيبها تنزل منه أبداً. أنا عارفة إزاي هعالج حساسيتها، واللي عملته صدمها صدمة عمرها وخلاها تقفل الاسطوانة دي للأبد!
وقفت مكاني وبصيت لحماتي وهي ماسكة صدرها وبتنهج، وبعدين بصيت لسامح.
قلت بهدوء: “حاضر.”
سامح استغرب إني ما اتخانقتش، وقال: “حاضر إيه؟”
قلت: “هشيل البرتقال.”
دخلت المطبخ، وخدت الشنطة وحطيتها جوه الثلاجة، وبعدها رجعت الصالة وقعدت على الكرسي المقابل لحماتي. هي بصتلي باستغراب وقالت: “إيه؟”
ابتسمت وقلت: “ولا حاجة.”
من اليوم ده، بدأت أعمل حاجة مختلفة تماماً. أي حاجة تقول عليها عندها حساسية منها، مكنتش أناقشها، ولا أقول إنها بتكدب، ولا حتى أقول لسامح: “شوف أمك بتعمل إيه.” كنت بس بقول: “حاضر.”
لكن في نفس الوقت، بدأت أكتب كل حاجة في نوتة على موبايلي:
برتقال.. عندها حساسية منه لو أنا جبته.
ورد.. حساسية.
ملايات.. حساسية.
سجاد.. حساسية.
كريم وشي.. حساسية.
منظف معين.. حساسية.
حتى مرة جبت علبة بسكويت، وأول ما شافتني حطيتها على الترابيزة قالت: “أنا عندي حساسية من النوع ده.”
بصيت للعلبة وقلت: “حاضر.” وكتبتها.
وفي يوم، سامح دخل البيت ومعاه نفس البسكويت بالضبط. أمه أول ما شافته قالت: “يا حبيبي، حطهم هنا عشان آكل منهم بعدين.”
وقتها أنا ما اتكلمتش، بس كتبت في النوتة: “البسكويت: آمن جداً لو سامح جابه.”
وبعد أسبوع، كانت النوتة مليانة. وفي يوم سامح رجع من الشغل، لقى على السفرة ورقة كبيرة. بصلها وقال: “إيه دي؟”
قلت: “دي خطة علاج أمي.”
وشه اتغير وقال: “علاج إيه؟”
قلت: “حساسية أمي.”
بصلي بقلق: “نيرة، إنتِ ناوية تعملي إيه؟”
قلت: “ولا حاجة تخوف. بالعكس.. أنا هريحها.”
ضحك بسخرية وقال: “هتريحيها إزاي؟”
قلت: “هعمل لها بيت مخصوص للحاجات اللي بتتحسس منها.”
