
مش تحاسب يا ابني؟ مش تبص وراك وانت بتركن كده تخبط البنت!
بصيت علي صاحب العربيه، كان شاب في اوائل التلاتينات أو ممكن يكون في اواخر العشرينات، بس كان ليه هيبه غريبه، اول ما شوفته حسيت بالرهبه منه بس مش خوف، وقاره كان غريب. اعتذرلي جامد وصمم انه يوديني مستشفي، وبالرغم اني فعلا مكنتش قادره امشي بس رفضت بشده وقولتله بصوت واهن:
لاء شكرا انا كويسه.
قومت من مكاني بمساعده الناس وهو فضل واقف لحد ما دخلت العماره، ركبت الاسانسير بس طلعت دور غير الدور ونزلت من الاسانسير وقعدت ع السلم ارتاح لاني فعلا مكنتش قادرة أقف. حاولت اظبط نفسي تاني وامسح دموعي اللي غرقت وشي بس مكنتش قادرة من الوجع والالم اللي في رجلي اعمل اي حاجة. قعدت شويه وركبت الاسانسير تاني ونزلت الدور اللي كان فيه الشركة، بس كان شكلي متبهدل خالص والتراب مالي هدومي، كنت مكسوفه اوي ومكنش ينفع ارجع البيت تاني، وقولت زي ما تيجي تيجي اللي ربنا كاتبه هو اللي هيكون.
دخلت الشركة وروحت مكتب السكرتاريه وقولتلها اني معايا معاد، كانت بتبصلي نظرات غريبه طبعا علي شكلي المبهدل بس اعمل ايه ده نصيبي ولازم أشوفه.
سابتني السكرتيره بعد ما اخدت اسمي ودخلت مكتب وقفلته وراها، بعد شويه خرجت وقالتلي:
اتفضلي.
دخلت المكتب وسبت الباب مفتوح، السكرتيره جت تقفله قولتلها بصوت واطي:
لو سمحتي خليه مفتوح علشان مينفعش.
بصتلي باستغراب كأنها بتقول ايه المجنونه دي! فعلا سابته مفتوح وانا دخلت المكتب. مدير الشركة كان مديني ضهره بالكرسي وكان بيتكلم في التليفون، فضلت واقفه شويه وهو كل ده بيتكلم في التليفون، اتنحنحت انتبه ليا ونهي المكالمه ورجع بالكرسي لوضعه الطبيعي.. وكانت الصدمة بالنسبه ليا ان هو نفسه اللي خبطني تحت!
اول ما شافني وقف وقالي:
معقول حضرتك انسه نادين؟!
رديت عليه وقولتلها:
ايوه.
قالي:
انا بجد بعتذر عن الخبطة اللي خبطهالك، اتفضلي اقعدي، واقفه ليه؟
قعدت شويه وحاولت اتمالك اعصابي، بصراحة مكنتش مصدقه نفسي.
لاقيته بيقولي:
تشربي ايه؟ اجيبلك عصير زمان اعصابك بايظة.
بصراحة كانت اعصابي بايظة جدا، مش من الخبطة لاء.. من الصدمة ان هو نفس الشخص اللي رهبني بوقاره، هو هيبقي مديري في الشغل! طب ازاي هقدر اتعامل معه؟
بس خرجني من شرودي وهو بيقولي:
رجلك عامله ايه دلوقتي؟ لو تعبانه ممكن نروح مستشفي.
رديت عليه وقولتلها:
لاء الحمد لله كويسه.
رجع تاني قعد علي مكتبه بعد ما طلبلي عصير وقالي:
انا سيف المنشاوي، صاحب الشركة.
قولتلها بخجل:
اهلا وسهلا يا فندم.
قالي:
انتي كنتي قدمتي من فتره عندنا انك تشتغلي في السكرتاريه.
قولتلها:
انا مش متذكرة بالظبط الوظيفه بس اللي فاكراه اني جيت فعلا الشركة هنا قبل كده بس مقبلتش حضرتك.
قالي:
فعلا..
سكت شويه وقالي:
انتي ارتبطي باي شغل؟
قولتلها:
لاء انا متفرغه.
ابتسم شويه وقالي:
تمام، تحبي تشتغلي معانا؟
بصيتله باستغراب وقولتلها:
اكيد، بس اشتغل من غير انترفيو؟
قالي:
اه هتشتغليه من غير انترفيو.
قطع كلامنا دخول السكرتيره وهي بتحط العصير، وهي خارجة قالها:
اقفلي الباب وراكي يا سماح لو سمحتي.
رديت بسرعه وقولتلها:
لا معلش خليه مفتوح علشان حرام.
بصلي اوي باستغراب وقالي:
حرام؟!
قولتلها:
ايوه حرام، لانها تعتبر خلوه.
لاقيته مش مستوعب الكلام اللي بقوله بس شكله خدني علي أد عقلي لأنه نهى الكلام وقال:
نرجع لموضوعنا، كنا بنقول ايه؟
قولتلها:
ازاي حضرتك هتعيني من غير انترفيو؟ مش حضرتك تشوف مهاراتي الاول؟
قالي:
انا اختارتك من وسط 10 علشان مهاراتك، انا محتاج سكرتاريه تكون عندها المام بلغات وكمبيوتر وانتي فيكي المهارات دي من خلال الابليكيشن اللي قدمتيه ولا انا غلطان؟
قولتلها:
صح.
قالي:
انتي متخرجة من كليه لغات وترجمة ايطالي صح؟
قولتلها:
صح.
قالي:
ومعاكي لغات ايه غير الايطالي؟
قولتلها:
معايا انجليش وفرينش واسباني.
قالي:
تمام اوي وانا متفائل بيكي يا انسه نادين، تحبي تبدأي الشغل من امتي؟
قولتلها:
علي طول كده؟
قالي:
انا انسان بحب شغلي جدا ومبحبش اضيع وقت، تحبي تشتغلي من بكرة؟
فرحت جدا وقولتلها:
اه احب.
