كنت قاعد في أو.ضة مكتبي ببحث في ملف القضـ,,ـية الوحيدة للكاتب عبد الفتاح عبد العزيز

ونزلت معاهم بعدها عشان اميره تعملي توكيل التقاضي والتوكيل الخاص بتاع قضية الخلع وبالمرة خليتهم يعملولي كل واحده توكيل بالبيع والشراء للطرف الآخر فيما يخص البيت والقطعة اللي وراه وصورت كل الورق اللي مع أمها
وبعد ما رجعت المكتب كانت اول حاجه عملتها إني صليت الضهر وشغلت صوت القرآن عشان يسمّع في الشـ,,ـقة كلها عشان ارتاح من هم الاعـ,,ـمال والسـ,,ـحر اللي ممكن يتعمل لي
وبدأت بعدها أشتغل وانا جوا راسي كلاب سعرانة بتجري ورا بعضها…
..الزوج،، على الرغم من اني واثق إنه السبب في اللي حصل الليلة اللي فاتت وإن الشيخة مسيطرة على دماغه،،بس في حاجات بتنفي إنه يكون طمعان في فلوسها او عامل لها عمل حتى
..أمها،، مش مرتاحلها وحاسس إن وراها سر،،
..أميرة،، دي الكورة اللي بيتلعب بيها،، وحاسس إن فعلا حد بيعملها أعمال من زمان
..حد غريب يكون عاملها عمل،، طب مين؟؟
ولو حد غريب فأكيد أمها ممكن تتوقع هو مين او تقول حتى اي تفاصيل او اي بيانات
وكالعادة نفضت عن بالي كل دا وقلت أنا محامي مش مصلح إجتماعي ورجعت اركز في عقود البيع وفي قضية الخلع وبدأت أقلب في باقي الورق لغاية ما في الليل لقيت حاجه غريبة جدا في القيد العائلي بتاع الأب،، بخصوص أسرة أميرة كلها،،
حاجه مش طبيعية أبدا،،
ومع شكوكي كان ممكن أبدأ أرسم تصور معين،،
لكن التصور دا كان محتاج بيانات وورق كتير وجري ومرمطة،، عشان يتأكد أو يتنفى،، فرجعت لنفس مقولتي،، انا ماليش دعوة،، انا مش مصلح إجتماعي،، انا ليا قضية وبيعة أمشي فيهم وخلاص
وبعد العشا بساعة طفيت نور أو.ضة المكتب وروحت اتوضيت وصليت العشا في اوضتي وقرأت أذكاري وبعد ما خلصت سهرتي وتليفوناتي طفيت نور أوضتي وسبت التليفزيون شغال على قناة المجد لكن ماعرفش بردو هل كنت روحت في النوم ولا ماروحتش لما حسيت بصوت خطوات في الأو.ضة فرفعت راسي عشان أشوف على نور التليفزيون أميرة بتقرب وعلى وشها ابتسامة ،،
بس المرة دي كانت لابسه عباية بيضة وكأنها كفن فحاولت انتفض واقوم لكن جـ,,ـسمي كان زي ما يكون مشلول مش قادر احرك ايديا او رجليا او حتى اصرخ حتى حاولت أقرأ آية الكرسي بصوت بمسموع لكن كان لساني زي ما يكون مشلول فبدأت أقرأ فيها بذهني لكن الغريب ان ابتسامتها كانت بتوسع مش بتقل،، لغاية ما وقفت جنب طرف سـ,,ـريري،، فكانت ملامحها حلوه وشكلها أصغر بسنين،، وانا كنت مفزوع ومبرق عينيا،، لكن بدأت الاحظ ان ابتسامتها ابتسامة رضا مش ابتسامة شر،، خاصة لما مدت إيدها وحطتها على صدري وقالت
=امشي ورا حدسك وضميرك وماتخافش،، مافيش حاجه هتأذيك
وبعدها اختفت فجأة
فانتفضت من سـ,,ـريري وانا بتشاهد وقعدت على طرف سـ,,ـريري
لكن لما هديت حسيت إنها روح طيبة مش روح خبيثة،، فبعدها بشوية رجعت مددت تاني وانا طول الليل بيتردد في ودني صدى كلامها لدرجة إني لما صحيت من النوم الصبح لقيت نفسي تلقائيا لبست هدومي وروحت على السجل المدني،، عشان أتأكد أو انفي غرابة الحاجة اللي شفتها في القيد العائلي
وقدرت من خلال حبايبي هناك وبعد كام إكرامية إني أجيب كل البيانات اللي كنت محتاجها،، عشان اتفاجىء إن تصوري بيتأكد أكتر،،، لكن كان فاضله تكه صغيرة…

فطلعت من السجل المدني على الموقف ومن هناك ركبت عشان بعد سفر خمس ساعات اوصل قريه تابعة لمحافظة البحيرة وبدأت أسأل هناك عن عيال الحج محمد الورداني واللي كنت عارف إنه مـ,,ـات من زمان،، فمالقيتش الا واحد من ولاده الاربعه وعرفت ان باقي ولاده منهم واحد وواحدة ميـ,,ـتين والرابع عايش في الخليج فلما قعدت مع ابنه وحكينا،،،
كان تصوري وصل لتمام الاكتمال فرجعت يومها على بلدنا في الشرقية،، وبعد يومين كنت حاسس فيهم إن ذهني صافي جدا وبنام وانا مطمن ومرتاح وكنت خلالهم ظبطت شوية أمور
طلبت إني أقابل أم أميرة لوحدها..
ولما جات لي المكتب وقعدت على الكرسي ابتسمت وقلت لها_لما اغلط في حاجه صححيلي كلامي…من ٣٢ سنة وتحديدا في ٧/٢/١٩٨٨
جوزك ابراهيم خليل الله يرحمه اتجوز واحده اسمها عفاف محمد الورداني،، وجا هو وعفاف من البحيرة ورا أكل عيشه هنا في الشرقية بعد ما ساب بلده وبلد مراته.،، وفي شهر عشرة في نفس السنه تحديدا يوم ٢١/١٠/١٩٨٨ مراته مـ,,ـاتت وهي بتولد بنتها،،
حماه وحماته واخ من اخوات مراته كانوا متوفين واخ ليها كان في الخليج شبه منعزل،،،
واخ واحد فلاح هو اللي كان حاضر دفنة اخته اللي اندفنت هناك في بلدها جنب ابوها وامها واخوها،،
وأهل عفاف هناك عارفين إن بنتها اللي مـ,,ـاتت وهي بتولدها قعدت في الحضان تلات شهور واما سألوا عليها بعد فترة،، أبوها قالهم إنها ماتت في الحضان،، كلامي صح؟؟

فابتسمت وقالت=ودي الحقيقة
_امممممم بس في شوية تفاصيل صغيرة مابيخدش باله منها الا راجل قانون،، راجل شغلته الورق والثغرات الصغيرة اللي بين السطور،،
عارفة الثغرة الصغيرة كانت إيه؟؟
بدأ وشها يتوتر لما قالت=ثغرة ايه؟؟
_هقولك ثغرة إيه،، أي حد بيشوف تاريخ ميلاد أميرة في ٢٥/١/١٩٨٩ بيقول إنها أكيد بنتك خاصة إنها كده مولودة بعد وفاة عفاف مرات جوزك الاولى بتلات شهور ،،
لكن الغريب اني لما شوفت إعلام الوراثة والقيد العائلي وباقي الاوراق لقيت إن جوزك اتجوز عفاف محمد شعيب في ٧/٢/١٩٨٨ وعفاف مـ,,ـاتت في ٢١/١٠/١٩٨٨ يعني بعد جوازها بتمان شهور
ومتجوزك انتي في ٢٥/٦/١٩٨٨
يعني بعد جوازه من مراته باربع شهور،، عادي حلاله،،
ومتجوزك ومراته عايشه،، عادي بردو وحلاله،، لكن الغريب إن أميرة اللي مفترض إنها بنتك اتولدت في ٢٥/١/١٩٨٩ يعني بعد جوازكم بسبع شهور بالظبط،، يعني انتي لقطتي الحمل في اميره من اول يوم وقعدتي بعدها ييجي ١٥ سنه عشان تجيبي ابنك التاني،، لكن كل الشبهات في كل الكلام اللي فات مش مهمه،، عارفه المهم إيه؟؟
=إيه؟؟

_لما اتنين بيغلطوا مع بعض ويحصل خلفة،، ونعوز نلم الدور ونصلح اللي اتكسر في النور ونسجل المولود بنعمل لعبة حلوة عشان يوافقوا يسجلوه،، بنروح نعمل حاجه اسمها وثيقة تصادق على عقد زواج وبنحط فيها تاريخ الزواج بتاريخ سابق على ميلاد الطفل بسبع شهور او اكتر فبيكون تاريخ إصدار وثيقة التصادق بعد ميلاد الطفل اما تاريخ الزواج نفسه اللي في الوثيقة فبيكون سابق عن ميلاد الطفل بسبع شهور،،
فكان بالنسبة لي الفيصل في الموضوع بعد ما أثار شكوكي التواريخ اللي موجوده في القيد العائلي
هو انتي وجوزك متجوزين بقسيمة جواز طبيعية ولا بوثيقة تصادق،، خاصة ان اللي بيتسجل في القيد العائلي اللي شفته هو تاريخ الزواج نفسه ومابيتكتبش نهائي دا بناءا على قسيمة جواز طبيعية ولا وثيقة تصادق ،،
ولاجل بختك بعد ما استعلمت عرفت إن انتوا متجوزين بوثيقة تصادق على عقد جواز صادرة في شهر واحد ١٩٨٩ وكتبتوا فيها تاريخ الجواز بتاريخ قديم اللي هو ٢٥/٦/١٩٨٨،، يعني انتوا متجوزين اصلا في شهر يناير ٨٩
=قصدك إيه من كل دا؟؟
_قصدي إن جوزك الله يرحمه مراته عفاف ماتت واندفنت في بلدها،، وتقريبا ماحدش كان بيسأل عنه ولا عن بنتها اللي في الحضان،، وتقريبا جوزك كان شايف إنه مش هيعرف يعيش من غير جواز،، او لما بنته اتحسنت في الحضان قال لازم يشوفلها ام،،
وزي ما تقولي كده إن البنت كانت في الحضان وابوها كان ملهي في دفنة مراته،، وفي الحياة من بعدها وماكانش سجل البنت لسه وايامها كانت اجراءات تسجيل الاطفال مش بالتشدد الحالي،،
وعلى ما خرجت البنت من الحضان بعد تلات شهور في شهر يناير كان أبوها اتجوزك،، ومش عارف ايه السبب اللي خلاه يعمل وثيقة تصادق على عقد جواز بينكم ويخلي فيها تاريخ الزواج قبل وقت تسجيل الطفلة بسبع شهور عشان يعرف يكتب البنت باسمك انتي مش باسم امها الحقيقية واكيد دفع قرشين في المستشفى على قرشين في المركز الطبي عشان يعرف يظبط الدنيا كلها باسمك،،