روايات

بقلم نسرين زين

صحيت من النوم زي ما بصحي كل يوم علي صوت ماما العالي وهي بتزعق وتقولي قومي يا بنتي كفايه نوم كده الضهر هيأذن انتي تفضلي صاحيه طول الليل قدام الكمبيوتر وتنامي طول النهار. قومت من النوم وقعدت افرك في عيني وانفخ واقول يا فتاح يا عليم هو كل يوم الموال ده احنا مش هنخلص!

 

قومت من ع السرير بالعافيه وطلعت من الاوضه لاقيت ماما واقفه في المطبخ صبحت عليها ودخلت اتوضيت وصليت الضهر لانه كان أذن فعلا، ودخلت لماما المطبخ علشان اسمع اصطباحة كل يوم.

الأم: يا بنتي حرام عليكي نفسك وصحتك وقعدتك اللي مالهاش لازمة طول الليل قاعده قدام النت، انتي مبتزهقيش؟ مبتشوفيش شكلك بقي عامل ازاي وتخنتي ازاي من القعدة دي؟

رديت عليها وقولتلها: طب قوليلي اعمل ايه؟ بقالي 3 سنين متخرجة، خدت كورسات ودورت على شغل وقدمت في كل حتة، أنا تعبت من كتر التقديم في وظايف ومحدش معبرني، ولا حتي حد فكر يقولي تعالي انتي اتقبلتي.

ردت عليا ماما بمواعظها الجميله: يا بنتي لازم تخرجي، انتي هتفضلي قاعدالي كده؟ لا حد بيشوفك ولا بتشوفي حد، انزلي دوري ع شغل يمكن حد يشوفك ويتقدملك.

بصتلها باستغراب وقولتلها: انتي بتقولي ايه يا ماما؟ امشي في الشارع اقول عريس يا محسنين ليه؟ هو انا للدرجة دي؟

قالتلي: ايه بس؟ اللي قدك فاتحين بيوت، ما أصحابك كلهم اتجوزوا وانتي اللي قاعدالي كده.

بصتلها بصدمة كبيرة وقولتلها: بصراحة الكلام معاكي يا ست الكل يفتح النفس ع الحياه، أنا اروح اقعد قدام الكمبيوتر احسن.

فتحت الكمبيوتر وفتحت النت، صديقي الوفي من ساعه ما اتخرجت ومابقاش ليا اي اصحاب، طبعا الدنيا بعدت كل الناس عن بعض ومابقاش ليا اي صحاب وماليش غير واحدة بس اللي قريبه مني وهي صحبتي من ع النت.

دخلت النت وفتحت الفيس بوك، واول حاجة عملتها لما دخلت فتحت شات مع اسما، اقرب صديقه ليا واكتر واحدة بتسمعني وبتفهمني. بعد ما صبحت عليها واطمنا علي بعض لاقيتها بتقولي: مالك مش مظبوطة؟

قولتلها: يعني هو في ايه في الدنيا مظبوط؟

قالتلي: ايه الكلام اللي انتي بتقوليه ده؟

لقيت دموعي بتنزل مني غصب عني وقولتلها: حاسه اني تعبت من كل حاجة، وحاسه ان كل الابواب مقفله في وشي، كل ما أقدم في شغل محدش يعبرني، انا عارفه ان اكيد ربنا عاينلي حاجة كويسه بس انا بجد تعبت ونفسيتي مبقتش قادرة استحمل، مفيش في حياتي اي جديد، مبعملش اي حاجة غير اني بنام وباكل وبقعد ع النت، اكتر من كده مبعملش، دورت كتير علي شغل بس كل الابواب مسدودة، انا مش عارفه انا عملت ايه في دنيتي علشان اتعاقب اوي كده.

لاقيتها بترد عليا بطيبتها المعتاده وبتقولي: اوعي تيأسي، ولا تقنطوا من رحمة الله، اكيد ربنا عايزلك الخير ولسه نصيبك ماجاش وكل حاجة بتيجي في وقتها.

قولتلها: ونعم بالله، بس انا فعلا تعبت ومبقتش قادرة، دايما لوحدي وحاسه اني مخنوقه، انا كرهت البيت والقاعده فيه وكرهت البلد كلها ظروفها مش سامحة باي حاجة خالص لا شغل ولا جواز، انا حاسه بجد ان فيا عيب، اذا كانت امي نفسها بتقولي كده، امال الناس بره بتقول عليا ايه؟

ردت عليا وقالتلي: حرام عليكي، انتي لسه 24 سنه، امال اللي عندهم 30 يقولوا ايه؟ يا بنتي انتي لسه صغيره عيشي سنك وحياتك، مستعجله ليه ع المسئوليه؟

قولتلها: انا مش مستعجله بس انا نفسي حاجة تغير مجري حياتي لاني بجد تعبت منها، وانتي عارفه اني مش بفكر في الجواز بس ع الاقل اثبت ذاتي ونفسي، المجتمع قافل علينا وكاننا مش موجودين، شهادتي واخداها من 3 سنين ورامياها ماستفدتش بيها باي حاجة، وبجد تعبت ومبقتش قادرة استحمل.

قالتلي: استهدي بالله وان شاء الله ربنا يكرمك وتشوفي كل حاجة كويسه.

قولتلها: يارب يا اسما لاني بجد تعبت.

بدأت انا واسما نتكلم سوا، وحاولت تخرجني من اللي انا فيه، وفعلا عرفت بدمها الخفيف ومرحها انها تخرجني من الجو ده.

مكنتش بعمل اي حاجة غير اني اتكلم معاها، وكنت بقضي الوقت مابين الفيس والتنقل بين المواقع اي حاجة تضيع الوقت وبس، كتير كنت بحس بالملل منه بس ماليش حاجة تانيه اعملها غيره.

وكانت حياتي بتمر بشكل روتيني جدا، وكنت مستنيه معجزة من ربنا سبحانه وتعالي تغيرلي حياتي.

بس ياتري المعجزة هتحصل ولا هفضل زي ما انا محلك سر؟

الفصل الثاني: المقابلة المفاجئة والحادث الغريب
كانت الايام بتمر عليا بطيئه وممله وكلها شبه بعض، وطبعا اليوم ما بيخلاش من كلام ماما: “انتي مبتعمليش حاجة وانتي قاعده علي النت علي طول وكل ده نوم”، كنت بحاول استحمل علي قد ما اقدر بس اول ما احس اني خلاص مش قادرة اجري ع اسما واحكيلها تهديني وترجعني تاني لطبيعتي، كانت بتعرف ببساطة تمحي اي حزن جوايا وتبدله لسعاده.

وفي يوم كنت واقفه مع ماما في المطبخ ولاقيت الموبيل بيرن، استغربت! انا تليفوني في العادي مبيرنش نهائي، روحت جبته ولاقيت رقم غريب هو اللي بيرن، قررت مردش، قولت اكيد معاكسه يعني هو مين اللي هيتصل بيا؟ بس لاقيته بيتصل باصرار غريب وقررت ارد.

اول ما فتحت الخط سمعت صوت رجولي هادي وفيه رزانه وبيقولي:

انسه نادين؟

استغربت في الاول وقولتله:

ايوه انا نادين، تحت امرك.

رد عليا وقالي:

حضرتك كنتي مقدمه في شركة ” …….. ” من فتره.

حاولت افتكر من كميه التقديمات اللي كنت بقدمها، كنت مشوشه مش عارفه يقصد اي شركة بالظبط، حاولت أتذكر بس للاسف معرفتش، قولتله:

انا اسفه مش متذكرة بالظبط لو حضرتك تقولي العنوان.

قالي:

طيب احنا منتظرينك بكرة ان شاء الله الساعه 10 صباحا في مقر الشركة، واداني العنوان.

كنت حاسه اني طايرة من الفرحة، اخيرا الحظ ابتسملي! اول حاجة عملتها جريت ع الكمبيوتر فتحته وبلغت اسما، فعلا زي ما كنت متوقعه دعيتلي ان ربنا يكرمني ويوفقني وفرحتلي اوي.

بالرغم من انها اصغر مني في السن بس دايما بحس بكبر عقلها واحتوائها ليا كأنها اختي أو أمي.. وبالرغم من تعرفنا ع النت بس بجد كنا اقرب من اي اتنين يعرفوا بعض ومعاشرين بعض من سنين.

مر اليوم عادي جدا عليا وكانت مشاعري مختلطه بين الفرح والخوف والتوتر.

تاني يوم الصبح لاقيت اسما بتكلمني وبتديني الدفعه القويه علشان اثبت نفسي واكون واثقه من نفسي وانا بعمل المقابله. صحيح انا مكنتش عارفه ايه هي الوظيفه بس كنت راضيه بيها، اي حاجة تخرجني من عزلتي عن العالم.

اخدت الجرعه من اسما ولبست هدومي ونزلت روحت العنوان وانا بدعي ان ربنا يوفقني.. ولما وصلت وقفت قدام العماره ابص ع اللوحات علشان اعرف الشركة الدور الكام، وانا واقفه وببص لفوق وكنت مركزة في اللوحات وعماله ادعي ربنا يزيل التوتر اللي انا فيه ده.. وفجأه عربيه خبطتني وهي راجعه بضهرها!

وقعت ع الارض وصرخت جامد وكانت ناس قليله ماشيه في الشارع.. اللي كان سايق العربيه نزل يشوف في ايه لانه مشافنيش وانا واقفه.

راجل كبير قاله:

السابق1 من 3
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى